【我要離地】未夠秤都可以揸飛機 扮做Sam哥不是夢
1 :
GS(14)@2016-08-19 06:56:21國泰航空社會計劃今年揀出30位中三至中五學生到阿德萊德飛行學校，一嘗做飛行員滋味。
睇到標題，唔好以為又係標題黨，此揸飛機唔係同你講打機，而係認真埋牙嚟一個「空中自駕遊」。不過，未成年莫講話車牌都未有得考，今次仲要揸埋飛機？
飛行學校Flight Training Adelaide的Parafield機場（飛行學校機場）本身有四條跑道，加上天氣穩定，成為不少飛行訓練學校基地。
當然，要做出咁離地之事就要跳出香港。位於澳洲阿德萊德的飛行學校Flight Training Adelaide（FTA）由1982年開始營運，九十年代初期已經同國泰航空合作訓練機師，依家就連港龍航空、中華航空同香港政府飛行服務隊都係喺呢度訓練飛行員。FTA唔只提供專業航空課程，亦有「Trial Instructional Flight」，俾各位喺正式機師指導及陪伴下試玩小型飛機。「好好玩！一開始很緊張，因為不知道可以做甚麼。」矢志要做機師嘅中五學生郭家欣，早前隨航空公司社會計劃嚟到阿德萊德一嘗做飛行員滋味，「Instructor飛到穩定高度後俾我試吓控制飛機，上升下降都讓我試，超級興奮！」聞說控制杆精確度高，郁少少都會左右搖擺不定，「一開始時都唔敢太大力捉緊，但都冇手震嘅。」飛到二千呎高空，望住個藍天同地面似足樂高積木嘅屋仔，個景真係靚到影張相都呃到多like啲。不過，可唔可以真係飛到上天都好睇天意，皆因萬一遇上惡劣天氣，為安全起見，飛行學校都不會容許大家起飛。下次遊澳洲，記得唔好淨係睇袋鼠同樹熊啦！記者：黃樂雯
tag:
來源:
http://hk.apple.nextmedia.com/su ... t/20160819/19742550