📖 ZKIZ Archives

財爺曾俊華初頭話入6000蚊落打工仔嘅強積金戶口，結果全城喊打，其後轉軚現兜兜派錢，仍俾人鬧。其實有冇人like佢嘅方案呢？有！希慎（014）行政總裁嚴磊輝話，派6000蚊緊係好啦，市民要有現錢先可以有能力消費嘛！

不過，希慎係銅鑼灣大地主，可以立足嗰區嘅商舖都唔嘢小，唔係點頂得順高昂租金，難怪嚴磊輝話，其實政府派錢，希慎受惠程度有限，因為直接受惠嘅未必係佢哋商場target嗰批客。話晒希慎旗下嘅商場好似利園咁，名店林立，揸住6000蚊入去都唔知買到乜。

順帶一提，噚日希慎宣佈，利蘊蓮將會接替退任嘅鍾逸傑，做希慎非執行主席。自從利定昌09年10月離世後，就搵咗鍾逸傑暫代，一直到家陣，先至再由利氏家族成員做番當家，但仍然係非執行主席，唔知幾時先有個正式主席呢？

本刊上星期揭發香港國際貨櫃碼頭（HIT）董事總經理嚴磊輝，身兼碼頭承辦公司「香港成功碼頭有限公司」（Sakoma）董事，該公司更染指外判工作。報導刊出後，嚴磊輝高調召開記者會，聲言並無假外判，更指Sakoma只是集團用來跟外判商簽約的公司，「唔係用嚟運作」；不過，其實他又再講大話！Sakoma原來擁有車隊，而且更有多次被入稟索償記錄。

上週三，嚴磊輝召開記者會，聲稱要「嚴正澄清」，指今次碼頭罷工事件中，「永豐」員工的工作證上，承辦公司名稱寫明是「Sakoma」，其實只是「行政失誤」、「寫錯咗」，聲言「永豐」員工是外判工人，與「Sakoma」無關。他又指Sakoma雖然曾代表集團與外判商簽約，但有關工作，目前已經交由另一間名為「Hutchison Logistics」的公司負責。不過，被問到Sakoma目前在集團的角色，甚至本刊記者表明身份要求逐點對質時，他卻拒絕回應。嚴多番強調Sakoma「過去只係用嚟同外判商簽合約嘅公司」，但其實又係講大話！本刊翻查法庭記錄，這間被嚴磊輝指為「唔係用嚟運作」的公司，實際上擁有車隊，更曾多次被入稟索償。法庭文件顯示，在○九年一月，一名黃姓司機駕駛Sakoma名下貨車，在青衣楓樹窩路與青衣西路交界，撞傷途人遭入稟地區域法院索償，當時，司機與Sakoma同列為被告。另外，在○八年，一名潘姓司機，駕駛Sakoma名下貨車與另一汽車相撞，司機與Sakoma同被入稟小額錢債審裁處，追討二萬多元汽車維修費。兩宗事故的肇事車輛，都屬貨櫃拖頭，許可總重達十六公噸，而根據運輸署記錄，涉及○八年撞車意外的拖頭，至今仍屬Sakoma名下，換言之，Sakoma擁有車隊，並非單純一間負責簽約的公司。本刊曾向該兩名涉事司機查詢，希望了解司機當時是否受聘於Sakoma，抑或是其他外判公司，惟兩名司機都拒絕回應。

大話冚大話

嚴磊輝在週三高調召開記者會後，便一直龜縮，未有再現身解畫，本刊除了發現Sakoma擁有車隊外，亦發現HIT集團在○四年的季刊《HIT News》，其中一篇文章寫着︰「Sakoma及富大（Floata）是行內具領導地位的服務供應商（leading service providers），為航運公司提供多種貨櫃服務。」由此可見，Sakoma並非只用以統籌服務合約的公司，HIT的季刊，亦踢爆了嚴磊輝的謊言。嚴磊輝早於三月底接受電台訪問時，曾斬釘截鐵聲言碼頭「只聘同一個分判商、沒有判上判」，不過根據查冊，Sakoma由亞洲港口聯運（APS）及和黃高層持有的Colonial Nominees共同持有，而APS則由和記港口信託持有，換言之，集團最低限度已經將碼頭的有關工作判上判。事實上，在季刊《HIT News》亦曾指出，APS負責分判工作，例如外判船上抓結服務等。碼頭先將工作「內判」予Sakoma，然後再外判。職工盟秘書長李卓人直指嚴磊輝玩弄語言偽術：「左手判落右手、右手先判出去永豐，擺明隔多一層、搾乾工人，仲唔係判上判？唔好再玩呢啲語言偽術喇佢！」

一直以來，不少碼頭工人只知自己「幫碼頭打工」，但卻不知誰是其真正老闆。本刊在葵涌貨櫃碼頭外，訪問了不少外判員工，他們至今仍堅稱「永豐」即是「成功」（Sakoma）。「我做咗咁耐，都無人叫我哋做永豐工人，控制室都係叫我哋做『成功姑爺』、『成功科文』！」其中一名在碼頭工作超過了十八年的吳先生說。就連HIT發給碼頭前線員工的內部文件，亦同樣沒有提及過「永豐」這名稱，一直只以「成功伙記」稱呼永豐轄下工人。本刊得到三份分別於二○一一及二○一二年發出的工作指引，文件將「成功」的名字清楚地與其他兩間外判商「現創」及「高寶」並列；更甚者，本刊取得一份用作正式報稅的糧單，白紙黑字列明「永豐」工人支取的是「HIT Salary」。

「永豐」幕後老細

「永豐」跟Sakoma及HIT的關係撲朔迷離，根據查冊，「永豐」的股東是海外註冊公司，真正幕後老闆身份無法查知，不過，一名現職「永豐」員工向本刊出示過去多年的報稅表，發現原來他曾多次「被」轉工，但卻懵然不知。「公司每隔幾年就會叫我哋去寫字樓簽一次名，話係新合約，人工同福利乜都無變。」他說。根據有關報稅表，該名「永豐」員工早在九十年代，先是受僱於「權記國榮（香港）起卸貨運有限公司」，其後到二○○三年改為受僱於「權記國榮起卸有限公司」，而直到二○○五年再變為受僱於「永豐港口服務有限公司」。這名員工一直理解「權記國榮」是「永豐」前身，而幕後老闆為林氏三父子。人稱「差哥」的林樹根是第一代「權記國榮」話事人，公司全名是「權記國榮起卸貨運有限公司」，在九六年成立，專做碼頭起卸服務。林有兩名兒子，長子林展賢曾擁有四間公司，全部已解散，現僅為一間名為「時達集團」的公司股東；幼子林家駿是「永豐」的行政經理，同時亦為「華比工程」公司的董事。「時達集團」與「華比工程」申報地址與「永豐」的地址相同，同樣位於佐敦南京街。據了解，自從「永豐」成立後，林樹根逐漸淡出，業務主要交由幼子林家駿打理，「我哋叫佢太子爺，因為佢好有錢唔使點做，每隔兩三個月就換架新車，成日揸車落碼頭巡場。」一名永豐員工說。至於長子林展賢，根據法庭記錄，其名下公司有多次被入稟追討僱員補償、服務費記錄，而同名同姓的林展賢則有多次被入稟記錄，包括管有危險藥物、醉駕、藥駕及不小心駕駛等。

呃工人強積金

根據公司註冊處資料，本港曾先後出現多間以「權記國榮」為名稱的公司，全部都涉及碼頭業務，其中包括在九九年成立的「權記國榮（香港）起卸貨運有限公司」及在○二年成立的「權記國榮起卸有限公司」，股東同屬海外註冊公司，但最終兩者均被強制清盤。兩間公司共有多次被入稟記錄，例如人身傷亡賠償、因司機駕駛時撞毀政府車輛被索償、有關強積金等賠償。更離譜是，「權記國榮（香港）起卸貨運有限公司」更曾涉嫌欺騙工人強積金。「我哋呢啲碼頭工，竟然都有房屋津貼，你話幾離譜！」根據工人的報稅表，原來早在○四年，「權記國榮」為工人報稅時，竟將工人薪酬分拆成薪金及房屋津貼兩部分，由於當年法例容許房屋津貼不用供強積金，在這安排下，僱主亦變相慳了一筆強積金供款。不過，這個做法其後被工會揭發，工人亦追回款項。對於Sakoma為何擁有車隊，以及為何HIT的內部通告，仍然將「成功」與其他外判公司齊名。香港國際貨櫃碼頭有限公司回覆指，早前已在聲明中提供了有關「成功」的資料，如有需要才會作進一步聲明。

年薪千萬大話精

經濟及會計師出身的嚴磊輝，現年五十三歲，曾跟隨前怡富集團董事劉志敏工作多年，後過檔到由劉成立的百德能證劵任董事，九九年七月加入星島集團任財務總監，再被委任為公司董事及聯席行政總裁，其後曾於投資銀行凱利融資任高層，○三年轉到和記港口信託任職財務部總經理，後擔任董事總經理，負責美洲、中東及非洲業務。○九年，他加入希慎興業擔任執行董事，其後更扶搖直上，成為希慎興業首個利氏家族以外的行政總裁，離職前年薪超過一千一百六十萬元。直至去年五月，嚴磊輝「以尋求個人發展」為由離開希慎，轉到HIT擔任董事總經理，現時居於山頂僑福道環翠園一單位，連車位市值約六千八百萬元。

踢爆嚴磊輝

工聯會潛水梁振英無能

「你見我揸住個袋、著到咁樣係咪高層吖？」早前被《南華早報》揭發，工聯會旗下貨櫃運輸業職工總會理事，同時身兼HIT其中一間外判商高寶管理人員的邱美光，上週五晚上駕駛其平治房車返回上水寓所附近時，本刊記者上前詢問其「雙重身份」是否工聯會替工人爭取加薪放軟手腳的原因，他一臉無奈地拒絕受訪，僅說：「我依家都周身蟻，真係好淒涼，一言難盡！」

邱美光涉利益衝突

邱美光被指利益衝突事件，迫使工聯會六名立法會議員一直潛水。直至上星期四，副理事長黃國健才現身接受無綫《東張西望》訪問，指上月廿日跟HIT召開第一次會議，其後準備諮詢工友對資方提出加薪5%方案的意見前，職工盟便發動罷工，使工聯會前功盡廢。除了把責任往職工盟身上推，黃國健上週五接受本刊查詢時再提出新建議，減輕政治壓力：「由政府出面安排一個會議，包括埋碼頭入面所有嘅工會、HIT、外判商同政府，傾一傾有無辦法解決呢一次工潮。」工聯會認為，HIT絕不接受跟職工盟談判，該會可以充當和事老，替HIT鋪設下台階解決工潮，收復失地。然而，由於《東張西望》內容偏頗惹公憤，市民更將對無綫的不滿遷怒於工聯會，工聯會評估後自知解決工潮的空間大大收窄，如意算盤打不響。

李嘉誠不信任梁振英

跟工聯會一樣，工潮初期勞福局長張建宗保持低調，面對工會發出「尋人啟事」才被迫現身「關注」事件，但他其實沒有擺平工潮的把握。由於李嘉誠跟梁振英沒有互信基礎，前者對張建宗毫不賣賬，梁振英手上也沒有足夠政治籌碼，誘使HIT坐上談判桌。此時，有人向政府獻計，研究對佔用馬路的工人展開清場行動，以圖打散整場工潮。不過，職工盟秘書長李卓人認為，工人意志堅定，加上輿論強烈支持，他有信心罷工可以長期堅持下去。代表商界利益的自由黨主席周梁淑怡週日把矛頭指向政府，顯然已把梁振英逼入牆角。張建宗本週二使陰招，安排職工盟與工聯會及勞聯分開與資方談判，企圖分化工人，引起罷工工人強烈不滿。HIT亦改變策略，把惹火的嚴磊輝「收埋」，改派外判商面對傳媒，試圖扭轉輿論。不過，政界人士估計，短期內工潮仍然會陷入僵局。

貴為HIT董事總經理嘅嚴磊輝，年薪千五萬，一個水上姑爺要做一百年先有咁嘅薪水，但佢老哥仲同老友呻，家陣搵嘅錢唔及以前咁和味。嚴磊輝咁值錢係有原因嘅；九十年代，佢喺Jardine Fleming跟羅慧娟老公，來自新加坡嘅劉志敏學師時，正值怡和系內公司大重組，繼遷冊百慕達之後，怡和再分別轉到倫敦同新加坡作第一及第二上市，從九四年起怡和撤銷香港上市地位。當時金融市場上搞遷冊，到海外上市嘅人才唔多，就係咁嚴磊輝成為搶手貨。

和黃港口信託前年喺新加坡上市，公司即從希慎翻兜嚴磊輝坐鎮，除咗睇中佢熟悉新加坡金融市場，會唔會仲貪佢來自Jardine Fleming呢？在新加坡掛牌的置地，九七年曾一度獲誠哥垂青，掃貨至4%；如果誠哥對置地未死心，嚴磊輝應該仲有運行喎。

Give me a break最豪廁 「去」得奔放

香港高級食府唔少，但肯揼本整靚個廁所卻唔多。好多中環人去食飯嘅尖沙咀半島酒店廿八樓Felix Bar，可以話係全港最豪華嘅廁所，呢個出自法國設計師手筆嘅男廁，尿兜由雲石打造，小宗站於落地玻璃前如廁，可俯瞰九龍景觀，實在有「大地在我腳下」嘅氣派，仲有「飛流直下三千尺」嘅暢快之感。不過酒店都有考慮客人私隱，所以加番高身少少嘅板遮擋。英國作家Luke Barclay寫咗本《廁所景觀大全》，世界第一廁係美國華盛頓北喀斯特國家公園，用家喺開放型馬桶上如廁，同時欣賞巍峨雪山嘅山脈。香港嘅Felix Bar有幸排第六，難怪小宗方便時，見到有遊客係咁影，鬼死咁尷尬。廁所級數有番咁上下，所以酒店規定，如廁者，拖鞋背心免進！

永泰廿億賣祖屋

永泰去年賣殼予萬科後，令市場譁一聲。近來又有傑作，鄭家三公子鄭維強叫天價三億坡紙（約廿億港元）放售鄭氏祖屋。永泰亞洲創辦人鄭翼雄，喺深水埗做製衣起家，後來到星洲發展地產，離世前一直住在這大屋，直至○四年在家去世，鄭家更跟足當地習俗，為防先人「迷路」在家設靈。對於香港人來說當然「大吉利是」，不過當地經紀話鄭翼雄乃星洲巨富，就算喺屋內離世亦無人怕，啲人最驚嘅都係鄭維強嗰口叫價。雖說Nassim Road好近植物公園，而且轉個彎就到購物熱點烏節路。之不過去年二月的成交價，都係二千銀呎坡紙，但鄭維強的叫價卻逾三千五百銀坡紙，貴足七成七！仲有，好似呢啲別墅，喺星洲叫free-hold land，係唔賣得俾非星洲公民，咁又少咗一批潛在買家嘞。下月截標，若有願者上釣，真係嚇死唔少坡佬喇。

燈神決戰金價之「癲」

塞浦路斯話要賣金還債，美國又嗌收水，嚇到金價一個星期內跌咗成千蚊港幣。另一邊廂，日本「紮行馬」印銀紙，好多「o架妹」即刻賣曬屋企嘅金條，換番啲Yen傍身及消費。白銀戰隊隊長孫柏文就話：「人人都賣金，係見底信號，買！」佢覺得白銀會跟黃金在三年內升四倍，仲話佢屋企有成三個大喼嘅白銀。之不過，佢老友沈振盈聽到，就標曬汗：「你同我祝佢好運啦，我好擔心佢，黃金已經進入熊市，會跌到去千一美金，佢今鋪真係好大鑊！」之但係，兩位都係出曬名嘅燈神，今鋪信邊個好呢？

金牙大狀講嘢永遠的空櫈

林奮強卒之就佢行會成員地位開聲，表示冇時間表復職，亦冇打算請辭，即係維持原判無限期休假。咁都得？試問香港有邊份工係一開波即無限期休假，更莫說係行會成員咁吃重嘅任命。林奮強喺舊年七月一日加入行會，四個月後喺十一月二日開始無限期休假，於今五個幾月矣。即係佢休假時間已經長過佢服務行會嘅時間矣。呢五個幾月嚟，行會繼續每個禮拜開會，林奮強休假顯然並無對其運作造成負面影響。此又不禁令人要問，行會係咪真有需要林生嘅參與先？如果係，咁點解俾佢無限期休假？如果唔係，咁又點解俾林生孭住個行會成員括弧無限期休假嘅招牌喺江湖行走？行會成員從來只有一個功能，就係為香港人嘅福祉出謀獻策。無限期休假中嘅林生顯然唔可以履行呢個責任，既唔填補林生嘅空缺，又唔叫林生借歪等第二個人頂上，梁振英真係有心幫香港人做嘢？唔似囉！