📖 ZKIZ Archives

要買最新嘅外國潮牌，有乜平得過買水貨？原來仲有。

兩個後生仔馬創森（Trevor）和郭文謙（Ivan），開設網站GeTheMall，代客人於外國網站買潮牌，再運回港，經營模式類似宅急便。由於唔賺差價，只賺運費，無論賣New Balance、TOMS或COMME des FUCKDOWN，可謂全城最平。記者採訪當日，竟見水貨鞋店職員都來掃貨。

這兩個老闆，本來一個是未來Banker，一個是準測量師，代訂外國潮牌，亦只是「秘撈」一份，但愈做愈興奮，更悟出愈「快」愈搵得多的道理。今年四月齊齊辭職，瞓身創業，高峰月賺五萬，家人由不看好變支持，「總算做到啲嘢俾屋企人睇。」執貨至深夜，夜闌人靜，他們眼濕濕說。

在旺角花園街不足一百呎的樓上鋪內，老闆Trevor和Ivan一人一部電腦，三部電話擺放枱頭，猶如「七折的」司機。雙手不斷查看whatsapp、Line、facebook及email。電話嘟聲響起，「有order，即覆」。訪問進行中，Trevor雙目卻定睛看電腦，話音未落，眼尾看到美國網站Karmaloop傳來會員七折優惠通知，即把消息轉發至facebook。要快，還接受客人報料，「之前知道Birkenstock拖鞋低至三百幾蚊，多得佢哋咋。」有些搶手牌子，更先落單買後post上網搵客。

太快導致撞板

只是，他們不時撞板。採訪當日，對着剛送來的一個貨箱，Trevor大叫：「中伏2.0」。他們向客人收運費，除了小型物品，如首飾、銀包，會固定收取四十至六十元外，其餘貨品以重量及體積計。這個代訂的Be@rbrick，有近三呎高，應收運費五百元，卻因太急落單而看漏眼，只收了二百元。「做住阿媽先囉，失敗乃成功之母呀。」Trevor「肉赤」得趴在紙箱上說。「一向啲貨都用mm計，點解呢隻熊變咗cmo架。」他們知道今年四月Victoria's Secret進駐香港，趁熱潮預先訂購一批護膚品，兩個「急驚風」卻錯估女性口味，令貨品滯銷：「呢十幾支嘢，完全無人問。」他們知道女人錢易賺，卻只熟悉男裝，唯有靠看雜誌及看論壇惡補知識。Ivan不解道：「完全唔明白點解女仔會鍾意ISSEY MIYAKE手袋。」最近品牌官網如Coach等對客人訂購數量及次數作出限制，亦讓他們十分苦惱。Trevor表示：「限死咗每人訂貨數量，記錄晒信用卡、email及送貨地址，連ip都mark低埋，我哋仲未破解到，依家暫停供應。」

訂四十件賺一千蚊

這盤生意，本來是很簡單的。兩個小學同學，Trevor和Ivan嫌銀行及測量師行工作苦悶，上班時瀏覽外國購物網站Amazon、樂天及香港沒有代理的潮牌網站。看中的東西，為分擔運費，便一同落單。他們發現每次寄得愈多貨，邊際成本就愈低。後來更在facebook開專頁，投資六千元購入一批熱門貨品作現貨出售，吸引客人，亦再找一些志同道合的人一同「集運」，務求令更多人參與，可賺取運費。以英國品牌Jack Wills為例，訂單數量多少，都只收受固定運費。「買一件衫Jack Wills收二百蚊運費，我試過最多買三十幾件衫都係收二百蚊。我哋代購連運費收三十蚊一件，夠七件訂單就唔會蝕，有四十件Jack Wills訂單，就賺到一千蚊。」Ivan解釋道。另一方法，是他們先在美國及日本找朋友做合作夥伴，對方代為接收貨品，儲夠一定貨量，再用FedEx及DHL等集運回港，拍檔按貨量收取佣金。這類貨運公司設最低消費，加上是累退制，貨品愈重，平均運費愈平。「外國都有大型物流網站MyUs及comGateway，代客人喺美國收貨再轉寄返港，但除運費外仲要收行政費用，又貴又煩。」

營造咪執輸氣氛

不過這盤「秘撈」生意，收入不穩定。「客人幾時落單都得，有時要等好耐先收齊單，會得失一批客。」市場上，更出現類似鋪頭，分薄客源。於是他們推出限時團購，以優惠「迫使」客人盡快落單。他們訂閱逾百個熱門牌子，如MLTD、Kate Spade及Marc Jacobs等網站資訊，網站每有優惠便發電郵通知。在晚上七至十二點最多人上網的時段，他們再把資訊加上「仲有兩日」、「光速團」、「得番小量貨」等字眼post上facebook，營造快手、咪執輸的氣氛。「但要小心，唔係次次都着數，好似Timberland話有九折，都唔會開團住，因為佢最平可以做到六折。」為簡化購物流程，客人只須copy & paste貨品的網址，填上訂購的款式和數量，收到報價後再入數，貨品約兩星期後到港。他們非水貨客，不賺差價，貨品以官方原價出售。如近年十分流行的TOMS布鞋，一對四十八美元（約港幣三百八十四），連同他們收取七十五元運費，總額才四百六十，香港行貨店卻賣六百五十元。「TIMEX有款手錶代購價二百幾，LCX賣六百幾，貴到完全唔合理。」Trevor激動地說。New Balance、Timberland、Herschel背囊等是熱門貨，價錢比市價低一至五成。任職水貨鞋店的售貨員黃先生是熟客，說：「呢度賣嘅New Balance仲抵過我鞋鋪嘅來貨價，唔係假嘢，我都想知點解可以咁平！」客仔Ricky指全身衫褲鞋襪皆購自GeTheMall，「唔使走嚟走去就可以買齊咁多個牌子，在花園街交收，位置好方便！」

辭工瞓身鬥快

他們一直都是在工餘時間才整理訂單，為做到夠快，他們於今年四月更放棄正職，在旺角花園街租樓上鋪。兩個二十四歲仔，人工二萬元，若考獲牌照，前途更一片光明。現時人工減一截，工作通宵達旦，「洗濕咗個頭喇，不過好有滿足感。」最擔心的卻是家人，Trevor說：「家人本身唔支持，但見啲貨多到要擺喺屋企，先知我落力，慢慢接受。」Ivan靜默數秒再說：「媽媽一直都唔支持，直至最近搬屋，佢問我仲要唔要測量師考牌的文件和工具，我相信佢咁問係唔想再逼我。有次唔見咗疊公司卡片，原來爸爸偷偷攞去派。」瞓身做生意，他們更積極宣傳。每月初在facebook提供promotion code，客人可於該月獲九五折運費。上月為慶祝facebook突破萬人，他們又推出限量福袋十多個，Trevor說：「為免客人覺得中伏，每個福袋都有筍貨，賣一個蝕一百蚊，用咗千幾蚊當係宣傳費。」他們又推出追蹤服務，讓客人知道貨品的物流狀況。除了一般的潮流服飾外，客人提出訂購除塵蟎機、晾衫架、小提琴弦線，二人也一一照辦，客人