開片喇！
2015-06-04 NM
譚華昕（Francis），知專設計學院學生，和另外四個「九十後」同學，開設製片公司「開片OPEN VIDEO」。在一年前，他們將講述一對情侶故事的網上潮文拍成短片《深宵小巴》，並自度對白：「如果30歲人仲住緊公屋而感到滿足，我覺得你好可憐。」道出港人心酸，點擊率至今超過四十四萬。現負責度橋拍攝廣告短片，還包括幫《100毛》拍毛記電視短片加後期製作。不過公司開始搵錢，即惹來高登仔眼紅圍插，Francis深感無奈，並道出行內競爭之激烈及辛酸。
最近我哋幫《100毛》拍毛記電視嘅短片同後期製作；當中《六點半左右新聞報導》，喺網上反應好好！通常係100毛同事即日度橋，我哋即日跟進拍攝及剪片。有時佢哋三點幾先俾idea我哋，我哋都拍得好急。嗱，佢哋標榜劣質製作，同我哋有質素嘅拍攝手法有好大分別o架，哈哈！我本身讀電影嘅，同幾個同學──呂榮棟、姜海銘、張寒山同黃貓，都鍾意拍片，兩年前畢業想開production house，但因為冇錢，就諗到拍片再放上網谷人氣。網上咁多YouTuber，淨係拍片唔夠嘅！於是諗到將討論區嘅潮文改編，拍成短片。咁有一定嘅讀者群認識，又容易引起大家共鳴。於是拍咗第一套短片《Come on James》，主要改編咗陶傑兩篇專欄文章《大學四年制》同《小師傅》，點擊率有成廿幾萬，證明我哋呢條橋係work嘅！之後得香港電台賞識，幫政府拍咗一條宣傳片，收咗廿萬，可以買器材同租office，就成立「開片OPEN VIDEO」，後來連鴻福堂同MaBelle都搵我哋拍廣告，呢個興趣亦開始賺錢。
高登仔眼紅
不過，高登仔就覺得我哋利用會員嘅創作，鬧我哋侵犯版權。我想解釋，其實我哋有改編亦有創作。改編陶傑文章，亦有問佢拎授權，佢睇完片後仲讚我哋拍得好！無錯，我哋靠改編潮文拍短片而爆紅，而家每個月有六位數字生意，但其實扣除成本同添置器材，根本冇幾多錢落袋。我唔係想澄清或者反駁啲咩，但其實我製作花咗好多心思，不知幾辛苦。好似拍《深宵小巴》嗰陣，我哋去小巴站逐個司機問佢哋借小巴拍片，拍通宵先有幾分鐘片段。不過放完條片上網，有人讚我哋，仲話喺馬路見到我哋拍，都幾有滿足感，我哋想要嘅就係呢啲感覺。回想初初拍片，成日俾人搵笨，好似某間廣告中介公司，請過我哋出去食飯，傾得好開心，我仲以為可以做得成生意，但原來係呃人嘅，向我哋套完料，就唔再聯絡我哋。有啲中介公司又壓價，例如向我哋開十萬，但轉頭向個客要廿萬，食水深得嚟又趕走個客嘛。之前某間中成藥公司，想請我拍片，咁我就度好晒橋先交計劃俾佢哋，點知間公司原來係想免費拍一條片，仲話而家係俾機會我去度橋！你話幾離譜？佢哋以為創作係免費o架！
同行頂爛市
兼夾而家行業拖數都幾嚴重，之前有個出晒名，成日見報嘅魔術師，佢都拖我數啦！除咗俾人呃，同行亦頂爛市，好似有間公司竟出一萬元去搶客。一萬全包喎，即係包晒度橋拍攝及後期製作，根本就冇可能做到，出糧都唔得啦，係惡性循環。以前拍廣告，係個客搵咗你先再度橋，仲可以收好晒錢，但而家係你度好橋再拎上去俾中介公司或客人，有陣時同啲客開會，仲會有個導演喺度寫低你啲橋，你都吹佢唔脹。雖然係咁，我嘅電影夢，未完o架。政府成日話支持電影業，又話成立電影發展基金，但資助得二百萬邊夠拍一部電影？我覺得政府根本冇幫個行業。例如我畢業嗰年一班六十個同學，人才係好足夠嘅，但政府喺施政報告竟然話要引入大陸嘅電影業人才嚟香港，有冇搞錯？其實好多大陸製作公司都請香港人上去做管理，證明香港好多人才，欠缺嘅係機會。咁點解要特登請大陸人呢？而家我哋計番條數，每個拍檔月入只係一萬左右，未來仲要請多個剪接員工，都唔知幾時圓到自己嘅電影夢。我哋拍嘅片，正係反映社會現象，反映後生諗緊咩，呢啲就係我哋嘅共鳴！