胡孟青：擸得就擸
1 :
GS(14)@2012-03-31 00:02:28http://www.sharpdaily.hk/article/index/15307/20120330/73923
「穩中求變、適度有為」的意義既廣闊又空泛，身邊揸了成手貨的朋友，問可否變中求穩，看罷昨天城中大事件，只覺地球愈來愈危險，大家仍然唔明甚麼叫今時唔同往日，不是你想穩就穩，求變者要大家清楚今天係邊個主場，邊個揸莊就係邊個打骰，趁城中大藍籌放榜日，搞其行家，難道是象徵叫你們這班大孖沙日後要醒醒定定，唔好阿支阿左？
說實在，有誰想去瓦努阿圖，廣告一出就話地震，睇完有關當地環境與人物的報道，你會情願滯留香港，都唔想離鄉別井，聽講有人連打廣告都要向銀行撲水，聽講建議中廣告男主角價碼都要50萬，雖然銀行想開拓中小企創業者生意，只是覺得風險高，開了個超貴息價，對方即打退堂鼓，另覓財源。
着定救生衣 免得浸死
為今之計，身邊多口仔正盤算嚟緊新政府會怎樣送大禮，會否人人有份，直情係要連剛剛出世的BB都唔甩漏；更有傳18歲以上人人獲派1萬大元，中央更會對政棍的要求照單全收。
可以預期，香港將會成為一個福利城市，未來5年，香港外滙儲備將被淘空，因為要令連中產納稅人都要百分百滿意，就要令人人都成為制度下的既得利益者，即是連中產納稅人都可能不用交稅，沒有物業的，政府會盡力幫你上車，連中產納稅人都可予取予攜，令屆時港人還能否再在阿爺面前認屎認屁，都好成問題。當人人變成大懶蟲，要繼續馬照跑、舞照跳，肯定要睇阿爺面色。
因此，假如未來幾年真的如大口仔預期，有大量着數派送，就一定要去擸，還要擸得就擸。
現在看來，給阿爺過了兩楝的唐唐，反而係最好命水的好命公，從此可以逍遙自在，不必再擔心在700萬港人面前被剝光豬，香港人已愈來愈搞不清誰是皇帝誰是奴才。
好想忠告大家，未來日子，股市樓市，穿好你的泳衣，必要時外加救生衣，例如現在這種非常時期，最好有水泡，還要事先作穿窿測試，不是任何人拋給你一個水泡都可以接受的；以為可以救命，原來裡面含鉛，隨時浸Q死你。
胡孟青
獨立股評人