操盤手札記：交易室人人心慌慌
1 :
GS(14)@2016-11-10 08:01:32「唔係吖嘛！」、「有冇搞錯！」9點半後交易室嘩聲四起，受美國大選選情牽引，恒指由高開138點，至半句鐘內倒跌400點，然後600點、800點，中午前一度跌過950點，失守22000關，驚慌情緒彌漫整個交易室。但當特朗普贏面越來越大，市場面對現實，恒指跌幅反而收窄，收市跌494點，主板成交大增至1,042億元，反映有資金低位撈貨。相對環球股滙大幅震盪，亞洲股市普遍跌3%至5%，港股已算執身彩。睇周線圖，恒指連跌三周，14天RSI已跌穿50，走勢轉弱，後市若確認失守22000關，將下試4月高位21654，2月以來上升軌21100料有支持；後市若反彈，則需升穿下降軌22900始有望轉勢。特朗普當選美國總統，並同時控制參眾兩院，雖然佢施政無章法，但亦唔使太擔心，皆因美國係「真．三權分立」，總統權力受國會限制，今次議會改選，仍會由共和黨控制，相信會封殺貿易保護措施等激進政策。三大國際金融中心——紐倫港（紐約、倫敦、香港），相繼因政治問題生亂，港人對倫敦、紐約市民嘅感受，其實好明白！此時此刻，市場避險情緒高漲，資金流向避險資產如黃金、國債；風險資產如期油、澳元則受壓。不過，跌市其實好似季尾減價，造就平買優質股份機會，不妨留意受外圍經濟影響較輕嘅股份，例如本欄上周推介嘅科網股龍頭騰訊（700），以及具有深港通概念嘅港交所（388），據講，深港通最快本周內公佈開通日期。特朗普曾矢言當選第一日就會宣佈中國為貨幣操縱國，又曾指中國關稅被低估15%至40%，有意調高至45%，損害中國貨物競爭力，對出口股及航運股不利，不宜沾手。佢又話過要炒聯儲局主席耶倫魷魚，未來加息步伐難測，金融股及息口敏感股亦宜暫避。割柑人本欄逢周四刊出
來源:
http://hk.apple.nextmedia.com/financeestate/art/20161110/19828352