樂香園：Anyway, good night！
1 :
GS(14)@2016-07-15 05:11:23港股遇到歐豬國家財務告急「唔跌」、南海世紀仲裁「唔跌」、中國經濟數據進一步轉差亦「唔跌」，昨日恒指更突破牛熊分界線連升四日，累升996點。中港經濟欠佳，加上環球市場大亂，居然也可升到咁？基金朋友指，大市落入此境況確實有點怪，但怪得來也可算合理，皆因全球投資者也在尋求「risk off」。他說：「自從英國公投決定脫歐，原本已經係risk off mode嘅投資者，經過咗短暫嘅驚慌，之後再變本加厲，變成進一步risk off mode，或者可以形容為係超級risk off mode，丁點風險都唔想有。」「超級risk off mode」但股市又升？友人說：「用美股做例子，傳統上美股升，債就跌，但脫歐後，美股繼續升升升，債市就反常堅離地係咁升，好明顯，係兩班唔同嘅投資者喺度買緊嘢……簡單嚟講，美國係大家心目中最安全嘅地方，游資就衝入去買美債，債炒得咁上下，其他游資就衝入去買美股，結果就出現咗股債皆升怪現象。」香港也有類似情況。他說：「追完美股，游資就擴散去唔同市場追低風險嘢，前排追REIT，追到領展（823）日日創新高，之後退而求其次，咪追埋啲收租股、大折讓地產股，同埋冇得唔買嘅騰訊（700），結果咪推高咗個指數囉。」後市如何？他笑說：「月中anyway個市都難逃一跌，大家good night！」密西比
來源:
http://hk.apple.nextmedia.com/financeestate/art/20160715/19695461