紅館騷冧台 負傷蔡一智報平安林敏驄致歉「我係最後知出事」
1 :
GS(14)@2017-06-11 16:09:14■林敏驄前晚在紅館舉行的作品展上拖苟芸慧繞場唱《忘不了你》，十分風騷。
林敏驄前晚假紅館舉行作品展，豈料綵排時發生冧台意外，草蜢成員蔡一智和舞蹈員受傷，整傷尾龍骨的智仔昨睇跌打後報平安，而林敏驄接受本報訪問時，坦言自己是最後一個知道出事的人！前晚演出時各歌手都十分小心，蔡一傑、鄭伊健和古巨基只在台邊唱歌，避開險地。
創作《無心睡眠》、《愛在深秋》、《夢伴》等金曲的58歲填詞人林敏驄，一連兩場作品展前晚假紅館開鑼，惟前日下午5時許發生冧台意外，當時在台上綵排的草蜢和舞蹈員由升降台墮下，造成9人受傷。首場演出延至9時23分開始，出事的升降台被停用、舞蹈員減至兩人、沒有爆破和燈光效果。
■前日綵排時發生冧台意外，蔡一智和多位舞蹈員受傷。資料圖片
■傷了尾龍骨的蔡一智昨日睇跌打後報平安，表示：「我會加油！」
■林敏驄（右）昨日傍晚為尾場騷拜神，心情明顯好轉。
阿智：我會加油
整傷尾龍骨的蔡一智，昨日睇跌打後接受本報訪問報平安：「剛剛再看醫生，我的身體底子不錯，只要好好休息就很快痊癒，同時也祝福受傷嘅舞蹈員快快康復！多謝大家關心！我會加油！」林敏驄昨接受本報訪問，為意外發生後遲開騷致歉，解釋需有關部門確定安全才可開騷，他說：「其實我噚日係最後一個知出咗事，因為大家唔想我擔心，困咗我喺房，我都奇怪點解咁耐都唔拜神。」問到尾場騷會否用回升降台？他說：「雖然唔會用嚟升降，但都已經鞏固好，今晚都會有番dancers，我都唔好意思，除咗因為有人受傷，伊健同基仔排咗好好睇嘅舞，點知噚日跳唔到。」有份投資的黎瑞恩昨在社交網留言：「昨晚真係百感交集！」
■昨晚張衞健和六男四女舞蹈員出場，唱《戀愛交叉》。
■蔡一傑前晚站在出事附近位置唱歌，透露草蜢不能表演原定的環節。
■前晚古巨基演繹《無心睡眠》時，取消了舞蹈員伴舞。
尾場大嗌打不死
昨晚第二場約8時半開騷，捧場有張智霖及袁詠儀夫婦，現場所見前日出事的中央圓形油壓台繼續擺回原有位置，林敏驄如前晚頭場一樣，孭結他繞場一周演奏《EUROPA》。到《全力扣殺》的何超儀、劉浩龍等人演出時，林敏驄以冧台事件自嘲：「鄭伊健冇嚟，蒙嘉慧驚佢受傷，搵個籠困住佢呀。」之後他又說：「噚晚呢度發生咗少少非工業意外，不過我哋打不死，要有正能量。」何超儀唱《何飄移》，一起歌已連續忘記歌詞兩次，要求重唱。劉浩龍離開時提到林敏驄心情：「好少見到佢咁唔開心，有啲內疚，好少見到佢咁沉重。」受冧台意外影響，前晚甫開場，林敏驄即踏台板測試安全，之後他更叫伊健行上去，笑說：「好安全。」不過伊健就選擇圍着舞台中間行，其他嘉賓如布志綸和古巨基只在台邊唱歌。蔡一傑綵排時逃過一劫，他站在出事附近位置演繹《愛的根源》後說：「大家都知下午發生咗啲事。」林敏驄即關心問智仔有冇事？傑仔說：「佢好似整親尾龍骨，本來有一part係草蜢，但我哋今晚唔可以表演，唔好意思。」採訪：王連連、曹家誠、盧妹攝影：仇志德、葉君海
■林敏怡為弟弟擔任嘉賓，一度感觸落淚。
■張智霖和靚靚昨晚恩愛捧場。
來源:
http://hk.apple.nextmedia.com/entertainment/art/20170611/20051767