今天新聞頭條，是當日指正政府歪曲顧問報告的顧問公司總監「被辭職」。讀這段新聞時的感覺很複雜，作為香港人，條氣的確好很唔順；但以一個商業機構老闆的角度去諗，也明白這決定多少是逼不得已。
對許多顧問公司嚟講，「政府」係超級大客戶，不能得失。顧問公司所做嘅報告，也有許多不同用處。表面上，報告係用嚟反映事實，但商業社會，有更多人習慣利用所謂第三者顧問公司所做出來既「中立」報告，去支持自己一些早已有結論的決定和立場。當顧問公司既負責人，會有良心地指正，自己份報告「應該點樣解讀」時，客戶當初既如意算盤自然打唔響。蠱惑客人本來諗住借consultant過橋support自己，點知過唔到橋仲俾人過返一棟，以後怕且大家都唔駛再有生意做。
如果你係該公司既老闆，你會點做？會企硬撐大家心目中的「公義」，還是透過辭退一個人家的「眼中釘」，企圖為公司摶翻身？
情況有點像，那些被「抽廣告」既報紙傳媒一樣，境況很兩難。對一個商人而言，扑車恐嚇擄人勒索，都不及斷你公司米路呢舖大鑊。
我有時都會諗，假如我係呢啲公司嘅老闆，我會選擇點做？有些朋友話，呢啲機構既老闆，全部都係有錢人，冇必要為賺多些少而向政權卑躬屈膝。事實上，這些公司既老闆，即使旗下公司完全唔賺錢，亦唔會影響到佢地自己既生活。但做生意既人都清楚，即使你肯賺少啲唔代表乜都得；事實上生意永遠都唔只係一個人自己既事，有股東，有員工。好多人既飯碗都繫於同一間公司之上。做烈士既代價，係有許多人要同你一起承受的。那個時候，作為老闆，你會點樣選擇？
米路被斷，一間商業機構原則上變成沒有價值。老闆的選擇，是妥協或者將公司光榮結束。有風骨一點的做法，也許是選擇後者…縱使這也代表著要敲碎許多人的飯碗。
在許多人眼中，商人都是見錢開眼的怪獸，沒有道德底線。我作為芸芸商人的其中一員，我只能說，商人其實也只是平凡人一個。你很難要求，從商的人，要有做烈士的準備。大客戶的取向，往往對一間商業機構的行為有著極其嚴重的影響，這是商業社會的定律。如果真的要埋怨的話，大概應該埋怨，為何香港的商人都看得不夠遠，在過去十幾年間，不知不覺地將自己的重要客戶，都過份集中於同一個「集團」、又或者是同一個「國土」之上，讓這個超級大客戶，對自己公司的話語權無限地擴張？
我是個卑微的小商人，這些政治上的問題，以我公司的蚊型規模，大概還差很遠才有機會被波及。公司規模越大，跟政府的轇轕就越多，生意也變得更難做。阿Ｑ一點去諗，原來做細，有時都有點好處。
然而現在響香港地做生意，要搞到咁，都幾悲。
長此下去，香港，肯肯定會變成一個極普通的中國城市。