📖 ZKIZ Archives

獨大的無綫向來只有佢唔要人，無人夠膽起佢飛腳，但隨住一姐佘詩曼決定離巢，轉簽大陸經理人公司北望神州，牽一髮動全「軍」，掀起逃亡潮。

今年即將約滿的馬德鐘、林保怡及廖碧兒等人，都決定走人，就連一度被氹掂續約的郭晉安，最終都唔落疊，只肯簽部頭。睇住一批已成氣候的小生花旦流失，六嬸 （方逸華）即刻叫負責藝員部的樂大媽（樂易玲）做嘢，強制與無綫仍有幾年合約的藝員加簽，唔聽話的，一律打入「冷宮」。仲有半年合約

無綫面臨大批一線小生花旦流失危機，今年底約滿的馬德鐘、林保怡、廖碧兒，已經放晒風聲，表明立場唔再續約，而尚有半年合約的郭晉安，原本同無綫傾續約傾 得七七八八，但突然吹起一股逃亡風暴，加上有大陸經理人公司向他招手，出手更比無綫高出五倍，以每集十萬元人民幣價錢利誘，令他急煞掣，改變主意轉簽部 頭。

「其實安仔（郭晉安）都有同無綫傾過，要賺多啲錢養家，嚟緊七月佢又生多個女，所以即使要離開大肚老婆，都返大陸拍多部劇，賺定啲奶粉錢。既然都決心要搵 人仔，佢諗諗吓都係唔簽TVB好過，起碼唔使俾公司抽佣。加上近年樂小姐淨係捧林峯一個，對其他小生都無乜做過嘢，更加令佢對TVB心灰意冷。」郭晉安身 邊人說。

問到郭晉安會否離巢，他承認有人與他聯絡過，「呢段時間係有大陸嘅製作公司搵我，但係我要睇吓佢哋對我有冇一個完善嘅plan，反而錢唔係最重要。」

唔加簽入雪櫃

留人連番失敗，令無綫揸fit人六嬸（方逸華）大為震怒，責怪有人大意，竟然無將藝員合約到期日搞清楚，無抓緊時間預先傾續約，導致大量一線小生花旦離 巢。大量失血，樂易玲近日急謀對策，一方面氹一班「仔女」改變主意，繼續留在無綫，另一方面，對尚有幾年合約的藝員亦採取高壓政策，強迫加簽合約，唔肯就 範，便放入雪櫃，直至約滿為止。「好似陳豪其實仲有差唔多兩年幾合約，但近排公司都係咁叫佢加簽多五年，不過陳豪就嫌太長，公司都讓步，縮短到三年，連原 本安排佢五月開新劇《樂府藏龍》，但因為陳豪要開咖啡店，公司都破例俾佢推劇，軟硬兼施，都係想氹掂佢續約。不過唔係個個都咁好彩，好似黃宗澤、陳法拉、 胡杏兒、馬國明同徐子珊呢一批上緊嘅藝員，就講到明一定要加簽先會力捧，有機會拍大製作。」無綫工作人員說。

「拜金女」廖碧兒，以為溝掂李澤 楷表弟林忠豪，搵到筍盤可以實現夢想做有錢太。點知，林忠豪玩厭即撇，二人情侶關係只維持大半年，今年六月，正式反面分手。回復單身四出溝女的林忠豪，上 星期更與一名人妻林淑怡結伴去ball。豪門夢碎，加上被無綫放棄拒絕續約，形象全面插水的廖碧兒，唯有隨波逐流，返大陸搵食，一出道就做慣女主角的她， 現在要淪為大茄，做行行企企大配角。走入絕路，廖碧兒仍死心不息，扮死狗搵番陳豪，她雖未至於痴心妄想反撬陳茵媺牆腳同陳豪復合，只是氹掂陳豪拍住搵錢， 貫徹她搵錢不擇手段的拜金本色。半年玩厭

去年十二月，廖碧兒被揭發秘密搞掂「富二代」李澤楷表弟林忠豪，一心就以為得米，可以嫁入豪門做少奶奶，於是極速狠撇拍拖六年男友陳豪，專心服侍林公子； 點知唔夠一年，林忠豪對廖碧兒已經生厭。「Alastair（林忠豪）成日都想溝女明星，但係無乜女肯落疊，偏偏廖碧兒以為執到寶，釣到隻肥金龜，攬到佢 實一實。最初佢兩個都以為搵到目標人物，開始三個月愛得好痴纏，點知唔夠一陣，就覺得唔對路，Alastair話佢貪錢，又唱佢其實唔係好索，唔值得喺佢 身上投資咁多，加上廖碧兒成日扮明星，唔肯陪男友出席朋友聚會，令到Alastair冇得喺啲friend面前炫耀有個花旦女友。「至於廖碧兒，佢發覺 Alastair其實唔係想像中咁有錢，淨係識吹水，咁耐都冇收過一件令佢嘩一聲嘅禮物，甚至有時廖碧兒開晒聲話鍾意邊個手袋，Alastair把口就話 買，但最後都側側膊，唔肯送。」林忠豪身邊 人說。高速煲的戀情經不起考驗，二人經拖拖拉拉，今年六月期間，林忠豪趁一次嗌交，乘機提出分手；一心以為有機嫁入豪門住豪宅做少奶奶的廖碧兒，當堂如夢 初醒。為表撇女決心，林忠豪已經連廖碧兒的電話，都唔肯再聽，近日亦不停要求朋友，介紹靚女model給他 認識。

錢情無限

陳豪與廖碧兒○四年撻着，地下情逐漸浮面後，二人以「情侶檔」姿態接job，有錢齊齊搵，深受一眾廣告客戶歡迎，有市有價。04-05年廣告：Lifeztore家具店每人$50萬活動：Bossini旗艦店開幕、地鐵商場開幕等3個每人$24萬

人妻陪去ball

上星期四（八月四日），林忠豪出席菁英會第四屆執委就職宴，原本大方接受記者訪問，被問到廖碧兒時，他就耍手擰頭：「呢啲嘢唔講！」連提都唔願。當晚，林 忠豪身邊女伴已換人，兩人全程如孖公仔黐埋一齊，當發現有記者影相，兩人又會煞有介事，馬上左閃右避。據了解，林忠豪的新女伴名林淑怡 （Mariana），是潮州商會青年委員會副主任，而林忠豪則是該會委員。林淑怡年約三十五歲，已婚，但甚少與另一半出現公開場合，相反，近日經常陪同林 忠豪夜蒲。

俾阿佘騎住

俾仔飛，加上無綫亦放棄拒絕與她續約，雙失廖碧兒黑過墨斗。為了賺錢養家供樓，之前大口氣四圍放風話要去荷李活發展的她，被逼捨遠取近，返大陸搵食，簽埋 佘詩曼同一間大陸經理人公司，繼續俾阿佘騎住。做慣女主角的廖碧兒，由於在大陸欠缺知名度，就算接拍大陸劇《深宮諜影》，但亦有機會做個行行企企，無關痛 癢的大配角角色，級數大跌，至於她過去最強的商業活動，亦因為形象插水，出騷量跌近零。

撻Q

圈中唔少女星如徐子淇、李嘉欣等成功釣到金龜，做幸福少奶奶，但唔係人人都咁好命水，花盡心思鋪路嫁入豪門，臨門先撻Q，前功盡廢的，大有人在。

鍾欣桐07年，阿嬌成功冧掂父親是中建電訊主席、身家過10億的富家子麥浚龍（Juno），但08年爆出淫照事件，Juno在父親麥紹棠多番施壓下，終於斬纜，之後Juno公開承認model女友Janine。

陳法蓉陳法蓉08年撬走陸詩韻的「油王」男友，點知朱明原來係空心老倌，被踢爆09年金融風暴後已欠下巨債，更一度失蹤。

宣萱宣萱96年由友人介紹認識中信泰富主席榮智健的堂姪榮文瀚，二人拍拖6年，並計劃結婚，後來有傳宣萱搭上有婦之夫羅嘉良，榮文瀚提出分手。

王祖賢93年，王祖賢被指介入林建岳和謝玲玲的婚姻，更獲岳少贈送幾千萬豪宅，但岳少母親棒打鴛鴦，更大鬧：「當個仔去叫雞！」二人最終不歡而散。

SMS求饒

雖然已走入絕路，但廖碧兒仍不放棄，最近更頻頻向陳豪發動SMS攻勢，懇求陳豪原諒，她明知陳豪已經同陳茵媺拍拖，根本無機會復合，但仍希望可以抽陳豪 水，助她起死回生。「Bernice（廖碧兒）知道阿Mo（陳豪）同陳茵媺拍緊拖，所以佢都唔敢奢望可以喺番一齊，只係想借阿Mo影響力，同佢拍檔一齊出 席賺錢活動，Bernice知道自己而家就算減到好平都冇人搵，但只要搵到陳豪一齊，啲廣告商覺得有綽頭，一定肯俾錢；仲有，阿Mo如果幫佢講兩句好話， 點都有幫助，諗過算過，見一定有着數，所以佢係咁『舌累』住阿Mo，提議同佢一齊做嘢，又話當俾條生路佢行喎！」廖碧兒身邊人說。可惜一切為時已晚，做了 多年老襯的陳豪，最終拒絕廖碧兒要求。「阿Mo蠢唔晒，之前Bernice傷得佢咁緊要，仲要做訪問公開唱衰阿Mo，就算自己唔計較，佢都驚萬一同 Bernice一齊做嘢，Aimee（陳茵媺）唔知會點諗！佢哋啱啱先開始，點會咁蠢自找麻煩，更何況阿Mo同Aimee啱啱傾緊情侶檔一齊合作拍廣告， 有好嘢，都益新女友啦，仲點會理舊愛呀！」知情者說。

月供四宅

曾經貴為TVB騷后的廖碧兒，過去不斷有投資物業，但多以父母名義購入，有些更是短炒用途，08年以693萬購入的凱旋門，一年後即以755萬賣出，賬面賺62萬。前後曾買賣近10個物業，現時手上仍持有四單位，由於父母已退休，全由她獨力供款，每月供款超過九萬。

距離無綫《萬千星輝頒獎典禮》不 足兩個半月時間，暫時被睇高一線做新科視帝、視后人選，只有鄭嘉穎、謝天華、陳法拉以及鍾嘉欣，相比兩屆盟主鄧萃雯、黎耀祥，差太遠。唔想頒獎禮失色，無 綫立即「做嘢」，於台慶月推出四套由一線花旦小生擔正的重頭劇，包括黎耀祥、張可頤主演的《法政先鋒III》，陳豪、林保怡、佘詩曼擔正的《天與地》，宣 萱、胡杏兒雙旦出擊的《萬凰之王》，以及由阿姐汪明荃同福祿壽合演的《荃加福祿壽探案》，製造視帝、視后爭崩頭話題。據了解，愛打穩陣章的無綫，為保持視 帝水準，大有機會再捧黎耀祥、陳豪做視帝，令大熱Laughing Sir謝天華空歡喜一場。變陣捧大熱

踏入九月份，無綫至今僅得《潛行狙擊》一劇成為視迷話題之作，即使《怒火街頭》和《點解阿Sir係阿Sir》有口碑，但收視點卻未能創歷史新高，導致視 帝、視后大熱人馬，是根本未坐穩一線的謝天華與曾經做過視帝的鄭嘉穎，以及鍾嘉欣、陳法拉之爭。「到現時為止，只係得Michael（謝天華）同嘉穎叫做 突出啲，但又未至於夠料做視帝，已經有高層開聲，話佢哋兩個攞獎唔夠noise。」一名無綫幕後人員透露。唔想頒獎禮暗淡無光，無綫內部急忙對策，決定在 台慶月前夕，陸續推出四部由正宗一線小生、花旦主演的劇集，務求在短時間內捧出視帝視后大熱。

最後衝刺

打頭陣有阿姐汪明荃和王祖藍、李思捷、阮兆祥領軍的《荃加福祿壽探案》，十月三日晚上八點半播出；至於被指有機會三度問鼎視帝的黎耀祥，同張可頤主演的 《法證先鋒III》，安排在十月十日緊接「Chok王」林峯的《不速之約》九點半檔上場。《荃加福祿壽探案》之後，就有《金枝慾孽》加《宮心計》混合版， 由宣萱、胡杏兒擔正的《萬凰之王》，十月三十一日播。至於原定今年五月出街，由陳豪、林保怡、佘詩曼主演，講人食人的《天與地》，最後變成台慶月壓軸劇， 於十一月二十一日緊接《法證先鋒III》檔期推出。

全 抄 宴

無綫劇集經常被指抄襲，近作有林峯的《不速之約》，被指明抄《死亡筆記》加《情約今生》。而即將播出的四套台慶劇，同樣欠新意，《法證》、《天與地》繼續 「老翻」西片，而《萬凰之王》、《荃加福祿壽探案》則翻炒無綫舊劇。

《法證先鋒Ⅲ》抄《CSI》演員：黎耀祥、張可頤《法證III》講述警方從科學角度破案，利用指紋、鞋印、血漬、毛髮等證據，作為破案關鍵。查案期間，又 加插男女主角愛情支線，內容橋段似足外國電視劇集《滅罪鑑證科》（CSI）。

《天與地》抄《天劫餘生》演員：佘詩曼、陳豪、林保怡、邵美琪以人食人具爭議性話題作賣點的《天與地》，擺明車馬抄西片《天劫餘生》。《天與地》講述四個 主角去旅行，在雪山遇險，最後為充飢，迫不得已人食人，後來地球暖化，雪山溶雪發現屍體，令人食人事件曝光。

《萬凰之王》《宮心計》mix《金枝慾孽》演員：宣萱、胡杏兒、陳山聰、陳錦鴻講述後宮妃嬪惡鬥的《宮心計》、《金枝慾孽》，女主角個個「奸到出汗」深受 觀眾歡迎，《萬凰之王》重抄舊橋，飾演皇后的胡杏兒，出陰招陷害宣萱，二人在宮內明爭暗鬥，完全是《宮心計》和《金枝》混合版。

《荃加福祿壽探案》演員：汪明荃、陳茵媺、王祖藍、阮兆祥、李思捷《荃加福祿壽探案》以60年代做背景，講述開偵探社的阿姐，聘請了福祿壽三人扮鬼扮馬合 力查案。無論故事背景、手法都同98年由羅嘉良、張可頤合演的《難兄難弟之神探李奇》相似，兩套劇亦同樣加入扮嘢元素。

法拉中空寶

無綫變陣迎接十二月的《萬千星輝頒獎典禮》，有視帝黎耀祥坐鎮，又有戀情帶旺人氣的陳豪，謝天華、鄭嘉穎隨時由大熱變大冷。至於視后，有指陳志雲歸位，會 恩賜迷雲黨成員陳法拉上位做視后，但據知在陳志雲涉貪污案期間，陳法拉一度變節暗投樂易玲，令封后機會存在變數。「法拉係醒目女，唔會好似 Bernice（廖碧兒）咁擺明車馬同陳總劃清界線，其實陳總出事無耐，法拉已經過檔樂易玲馬房，每次樂小姐吹雞搞飯局，都會俾面出席，好多時仲會帶埋男 朋友去添！」一名幕後人員透露。

黑馬胡杏兒

陳法拉的忠誠度，陳總心裡有數，憑Madam Jo一角爭視后的她，攞獎機會大打折扣。至於《點解阿Sir係阿Sir》的鍾嘉欣，雖然跪喊羅Sir陳豪一幕感動唔少觀眾，但有指無綫高層嫌她未夠火候， 非視后最佳人選，勝算大減。相反，被指演技一般，冏樣纏身的胡杏兒，卻被讚在尚未出街的《萬凰之王》中有脫胎換骨表現，大有可能以黑馬姿態跑出。「有份拍 過《萬凰之王》嘅導演同幕後，都話胡杏兒今次收埋晒冏樣，演技好似變咗另一個人，不過佢唔算好有觀眾緣，都要睇套劇出咗街嘅反應同高層口味，先知有冇機 會。」幕後人員說。

預測視帝視后五甲

每年的台慶頒獎禮，無綫一眾小生花旦為視帝、視后爭崩頭。今年暫以演「Law霸」的鄭嘉穎及「Laughing Sir」謝天華，被捧為大熱人選，至於視后，做「Madam Jo」的陳法拉和「Miss Cool」鍾嘉欣，同樣被看高一線，但仲有四套「台慶劇」未出街，預計十二月頒獎禮，以下十位人選，最有牙力角逐視帝、視后寶座。

拍拖已兩年的拖友陳豪陳茵媺，恩愛再升溫！早已鎖定對方為結婚對象的陳豪為盡快完成人生大事，近年密密搵儲彈藥，上週被本刊拍得他親身到位於中環IFC的恒基地產總部，扑槌簽約，以3368萬購入大埔比華利山4000呎獨立屋。未正式簽字結婚，但陳豪相當識做，樓契預咗加埋女友名，陳茵媺呢個「豪嫂」，走唔甩！

開聯名戶口

財經界普遍認為樓市在未來兩年向下調，但早想成家的陳豪卻不想夜長夢多，睇準時機，趁一手樓新例殺到前，以低出市價兩成，購入比華利山最後一幢別墅。單位位於屋苑內湖景道，建築面積4000呎，實用面積2461呎，共分四層連天台，飯廳客廳及主人套房外，還有三間客房及兩個車位，景觀飽覽吐露港全海景。與陳茵媺拍拖後，陳豪事事以女友行先。早前陳茵媺在大馬拍攝新劇《單戀雙城》，疑被臨時演員非禮，陳豪二話不說，即飛當地安撫。據了解，陳豪為給女友驚喜，今次的買樓大計，由搵樓、睇樓到扑槌，全盤親自策劃，更打算在樓契中加上女友名字，由二人共同持有。接受訪問時，他更透露稍後會開聯名戶口，有錢與女友齊齊使，進一步確認「豪嫂」地位。「Moses個人好穩重，Aimee就比較活潑鍾意玩，兩個性格一凹一凸，但又出奇夾，Moses同身邊啲朋友都講過，結婚係遲早嘅事，而家只係專心做好啲準備，儲多啲錢，plan好啲佢同Aimee嘅將來；又話遲啲同Aimee開個聯名戶口，反正佢哋而家啲錢都係共用，一齊開戶，反而可以更有計劃咁儲錢同投資。」陳豪身邊朋友說。

高人睇風水

近幾年開始信風水的陳豪，在麥包（麥長青）介紹下，由娛圈御用風水高人苗師傅睇風水；前年他與陳茵媺租住深井碧堤半島，今次買比華利山獨立屋，全部由高人教路。「Moses仲搵苗師傅夾過佢同Aimee嘅時辰八字，擺埋風水陣。跟苗師傅嗰批藝人，唔係住貝沙灣就係碧堤半島同比華利山，好似黎耀祥、麥長青、張兆輝、古天樂全部都係聽佢話，個個有名有利，Moses同Aimee搬咗入碧堤都真係好旺，Moses唔使講，最緊要帶旺埋Aimee，今年搵多咗好多。」

第二日扑槌

上週五（二十六日）中午十二點，一早約好地產經紀的陳豪，現身位於中環IFC的恒基地產總部，直上七十三樓的營業部，簽臨時買賣合約，只見他拎住其他樓盤樓書，詢問經紀意見，在內逗留接近兩個鐘，拎住公文袋的陳豪才與經紀離開。「比華利山呢個盤都有好多藝人住，之前徐濠縈同Eason都睇過樓，不過佢哋嫌大埔太遠，但Moses一睇就好啱心水，睇完樓第二日，就打俾經紀扑槌。」

密密買工廈

自稱穩陣派，鍾意買磚頭保值的陳豪，手上除了持有將軍澳都會駅單位及一間西貢村屋，原來早於○四年，便與家人聯名，以一百二十萬購入柴灣工業城一個寫字樓。今年二月，他與家人成立新公司「The Black Drop Limited」，準備再出擊。據了解，簽約當日，陳豪對恒地最新推出、位於黃竹坑的環匯廣場寫字樓單位，十分有興趣。「嗰日佢問經紀攞晒資料，Moses對中層嗰啲一千呎嘅單位最有興趣。其實佢一向有投資買寫字樓，全部都係同屋企人聯名持有，Moses眼光都幾準，賺唔少。」知情者說。

明星別墅

位於大埔三門仔半島的比華利山別墅，是區內最大型的別墅屋苑，屋苑分三期，共有535戶。雖然屋苑洋房建築密度高，私隱度不足，但飽覽吐露港海景，又擁有超豪會所，設施包括影院、網吧、宴會廳、泳池、緩跑徑等應有盡有，吸引大量明星客入住及投資。

方力申、鄧麗欣

拍拖八年的方力申和鄧麗欣，早年在西半山租住碧麗道洋房同居，去年以月租八萬進駐比華利山4,000呎別墅，有指二人睇中屋內有私人泳池。

黃浩、徐淑敏

11年，黃浩父親黃文霖病逝，為免觸景傷情，加上徐淑敏再誕下細女，於是舉家搬進比華利山銀地道的4,300呎別墅。

謝安琪、張繼聰

原本以4,000元租住大埔村屋，10年搬到月租28,000的比華利山翠樺道2,600呎連700呎花園洋房，租約期滿後，再搬到附近同樣呎數的單位。

舒淇

11年，舒淇以發展商超筍價1,830萬購入比華利山翠樺道2,600呎獨立屋，作投資用途。

雷頌德

09年以2,300萬購入比華利山湖景道單號屋，面積4,046呎，享有船灣海景，他更指屋苑的會所設施多，加上大埔空氣好，適合兒子居住。

信者得救

近年深受圈中人擁護的風水師苗師傅，行事低調不愛曝光，平日只能靠用傳真聯絡，追隨苗師傅的圈中藝人如黎耀祥、麥長青、古天樂、張家輝經他指點後，事業一帆風順。

張家輝

08年，搬入背山面海的貝沙灣後，轉投英皇電影，憑住電影《証人》，成為七料影帝。

何韻詩

11年，何韻詩聽取苗師傅意見搬入貝沙灣，並以綠色改運。其時何韻詩凡出席公開場合，都一身綠色打扮，國語碟也以《GREEN》命名，之後更出奇打入台灣極具分量的「金曲榜」女歌手五強。近年她主演的舞台劇《賈寶玉》叫好叫座，不時在內地巡迴公演，長做長有。

黎耀祥

早年開始跟隨苗師傅放生積福及布家居風水陣，搬住碧堤半島後，09年出現事業第一個高峰，憑住《巾幗梟雄》成為視帝，近年繼續當旺，分別在10年及12年再度奪視帝。

古天樂

02年，苗師傅建議古天樂買下京士柏山當旺屋，自此片約一部接一部。10年，古仔再依指示搬入貝沙灣，年拍七片的他賺過億，近年的《單身男女》、《竊聽風雲》等，票房大收，片酬颷升到千三萬人仔。

崑妝趕客

無綫四月劇集檔期先後推出兩套重頭劇，八點半時段，三料視帝黎耀祥主演的《神探高倫布》持續「柴九」式誇張演技，加上劇本唔掂，被網友圍插「悶到想爆電視」。九點半時段，以為久等九年的《金枝慾孽貳》可以補番數，一樣失望！花了六十萬拍攝的崑曲重頭戲，大戲妝下，平日稱得上「四正」的陳豪、關禮傑走晒樣，極之趕客；加上崑曲不為港人所熟悉，兩人表現吃力不討好，觀眾網友齊聲叫悶。《金枝貳》頭兩集十八個角色一齊出，人物關係加上對白，觀眾短時間內無法搞清；一班主要演員如鄧萃雯、蔡少芬、陳豪都算有演技之人，可惜配角不濟，葉翠翠「唸口簧」，苟姑姐廣東話唔鹹唔淡，就連主角之一的伍詠薇，都被批浮誇，講對白如「急口令」，節奏未能配合其他演員，劇集出街首週，同《神探高倫布》一樣，平均收視同得23點，比起八點播的處境劇《愛‧回家》有24點，還要低。

王維基的「香港電視」不獲發牌，激起民憤，一台獨大的無綫可以「印印腳」剝花生睇好戲之餘，霸道作風近日更變本加厲。集團總經理李寶安下令經理人部門改制，寧願抽少啲佣，決定收緊旗下藝人到內地拍劇賺人仔政策。親生仔女所有檔期要留俾公司，冇劇拍才可申請拍大陸劇，甚至連登台都要等公司批准。

就快做老豆的陳豪，與無綫的合約已進入倒數階段，一直表示恨拍大陸劇賺更多奶粉錢的他，聽到新辣招後即時嚇窒，令續約成數更低。

冇人用詐型

近兩三年無綫親生仔女如鄭嘉穎、林峯、胡杏兒、黃宗澤等，紛紛到內地拍劇賺人仔，每集片酬更高達數十萬計算，比起無綫萬幾蚊一集人工，多出數十倍，同時亦令無綫經理人部門增添過千萬抽佣收入。公司有錢賺，但大部分紅星外闖，令公司出現「真空」情況，製作部向李寶安詐型，投訴開劇時「要乜人冇乜人」，用來用去都係嗰幾個演員，例如台慶劇《法外風雲》，雙線女主角除了陳法拉，只能起用部頭約伍詠薇。女主角無人，男主角都一樣，陳展鵬、蕭正楠由二線升一線，像陳展鵬便有《戀愛星球人》、《叛逃》及《單戀雙城》存貨未出街，而「亞視人」田蕊妮亦有機會升做姐仔，在《巨輪》做完女主角，還有《舌劍上的公堂》及《忠奸人》等多套作品。

阻搵奶粉錢

有見及此，李寶安寧願損己不利人，認為一個電視台最重要始終是自家製作，公司培育出來的花旦小生，無理由只幫其他電視台拍劇，就算經理人部門收入因此大減，李寶安亦一意孤行要經理人部門改制，所有親生仔女除非公司冇劇要他們拍，才可向製作部申請到內地拍劇。一直表示滿約後希望拍更多大陸劇搵奶粉錢的陳豪，本來正與公司傾談續約問題，但辣招一出隨時被斷財路，令他對去留一事十五十六，甚至指他有意自組公司外闖。本週二（二十二日）陳豪出席《法外風雲》宣傳活動時表示暫時未有定案，但對於李寶安收緊政策，趕絕親生仔女拍大陸劇搵錢，陳豪尷尬笑一笑說：「或者咁講啦，公司係有佢自己一套策略，我諗我唔夠資格去評論，而家我自己最緊要係為新合約打算。」提到公司改制變相令收入減少，會否成為續約的絆腳石，陳豪識做話：「唔會！」據知，辣招調控內容更包括嚴禁藝人揀角色，甚至連到外埠登台接job，離港超過五天者，必須向公司申請，而掌握經理人部門話事權的樂易玲，因被削權，已無牙力為得寵藝人開聲，放期與否，一切改由製作部審批。

嘉穎林峯大鑊

雖然上月通訊事務管理局直斥無綫霸道，禁止旗下藝人在其他電視台亮相及以廣東話做訪問，最後被罰款九十萬，但事後無綫發聲明澄清冇綁死藝人，如今再推辣招阻藝人搵錢，一班已成功打開內地市場的親生仔女，最受影響。如一一年憑《步步驚心》在內地爆紅的鄭嘉穎，過去三年只幫公司拍了《怒火街頭2》及《拳王》，反而在內地狂拍《葉問》、《華胥引之絕愛之城》及《萬水千山風雨情》等六套電視劇，加埋接近二百集；而林峯在去年拍完《雷霆掃毒》後，便全力到內地掘金，接拍《紫釵奇緣》、《廣告風雲》、《陸小鳳與花滿樓》等五部大陸劇，收入千萬計算。人在無綫，一班小生花旦只能聽話照做，胡杏兒十一月要拍新劇《醋娘子》，鄭嘉穎明年回歸拍王心慰新劇，林峯與阿佘明年初又會拍大製作《使徒行者》，吳卓羲手上還有三部劇集要開，現在正為新劇《忠奸人》開工，所有檔期均被公司綁死。

霸道辣招

恃住有慣性收視，令無綫更加霸道，一眾合約藝員及歌手，個個敢怒不敢言。

禁用廣東話訪問

同無綫有合約的藝人及歌星，被禁止用廣東話接受其他電視台訪問，11年，已同無綫冇約的陳鍵鋒用廣東話上有線做訪問，節目出街後，無綫經理人部馬上發出新辣招，嚴禁一眾合約藝人以廣東話、普通話、英語接受有線訪問。

封殺四大歌手

09年爆發「四大版稅風波」，無綫即時封殺四大唱片旗下歌手，令李克勤、陳奕迅、謝安琪等歌手全部絕跡無綫，更在無綫的勁歌頒獎禮上食白果，歌神張學友因此公開炮轟無綫，過往對歌手的支持及資源投放太少。

獨播世界盃

今年5月，無綫成功以4億投得世界盃廣播權，將會免費轉播22場賽事，觀眾要睇足64場，便要俾錢安裝無綫收費台，更表示未與亞視等電視台商討播放權，即被立法會議員批評霸道。

斷星夢幫米路

《星夢傳奇》播出後，鄭俊弘爆紅，不少廣告客戶搵上門，無綫竟下旨嚴禁參賽藝員在比賽期間出外接job，之後再成立唱片部，逼得獎藝員簽「賣身契」自肥。