|
||||||
|
黎年先生，能吏 也，以前香港政府有無能吏呢？當然有啦，依家地位甚高，仍然在港享受生活嘅鍾逸傑爵士，做過好耐元朗理民府，有新界王之稱，難道鍾逸傑及所有理民府官及地 政官（land officer）都唔知道丁屋村屋有僭建呢回事？笑話啦！左丁山有親戚（非原居民）在沙田有村屋，三十年前預備修補村屋地台，買咗十包紅毛泥請咕喱抬上山 上（村內無汽車），沿途有人見到，唔夠一個星期，寮仔部已經有人到村屋拍門，要求親戚解釋紅毛泥會有甚麼用途，一一紀錄在案，並口頭警告不得僭建，跟住順 便巡查一番，十分認真，但對原居民村屋久已有之嘅僭建物，就視而不見。 當日港府之英國話事人有世情歷練，心知丁屋僭建不可妄動，於是隻眼開隻眼閉，社會太平無事就得，以今日術語講，英國殖民地官員最識「維穩」，黎年先生係英國人訓練出嚟之AO，唔知係唔係學漏一樣呢？ 報 紙時興向名人狙擊，做公職之人要好小心。測量S有幾多公職，多年前買入新界某一別墅群之一間獨立屋，入住後未有改動變更，只係裝修靚啲，整到間屋外觀好 啲。點知近日興起打僭建之風後，佢突然收到記者電話，問佢係唔係收到屋宇署警告信，霸佔官地。測量S一頭霧水，乜信都未見過，自然否認一番。但已有記者到 屋外拍照。過咗三日，佢收到屋宇署信件嘞，話佢間屋有花園平台延伸至官地。測量S連忙覆核屋契及法律文件之餘，對左丁山發牢騷：「有乜理由屋宇署發信之 日，仲未寄到我屋企，記者已經知情，屋宇署有專人通知記者乎？點解記者會知得先過我？」這世界有好多事難以解釋，可能經過區載佳涉嫌僭建一役，屋宇署官員 極度熱心與記者溝通呢！正是矯枉必須過正，世事往往如此！ 講起僭建，原來證券H在家居花園有附加建築，俾屋宇署巡視鄰居時見到，順便要佢拆 埋，目前已經拆咗，證券H話：「我住所附近有大把類似僭建，屋宇署逐一清查會好唔得閒，亦易引起平民怨憤，因為平民地區一樣僭建多籮籮，我嘅僭建係作嬉戲 用，拆咗無相干，但基層僭建作居住用途o架！黎年一個丁屋僭建報告，搞到全港雞犬不寧，真諗唔到。」 |
||||||