減存款準備金率有乜用？
1 :
GS(14)@2012-02-20 22:29:10http://www.sharpdaily.hk/article/index/15307/20120220/55939
星期六晚，約朋友食晚飯，窗口外做完幻彩詠香江無幾耐，手機就響。原來人行出聲明，減存款準備金率（RRR）50點。即刻上《利字當頭》facebook留個言，諗住將消息報告畀讀者知，原來《Money Cafe》個facebook都有即時發布呢個訊息，且已經有觀眾留言。星期六晚都繼續關心財經大事，呢班讀者同觀眾既可愛又可敬。
我對減RRR即時評語：「祝君好運」。讀者唔明，我解釋：「成件事，對大眾嚟講，根本完全無技術成份可言，唯一取決因素就只有或然率。」呢刻我相信最多人關注嘅係：「減RRR，對A股同大陸樓市有無幫助？」另一個就問題係：「o依家形勢，究竟似2007年定係2009年？」
降貨幣流速作用有限
分析減RRR有乜嘢影響前，先要明白點解全世界咁多國家央行，只有人行用調整準備金去調控物價。大家有無留意，廣義嘅人幣供應每年以十幾巴仙增長，從來無停過；充其量，只有增速放緩。「無所謂啦，大陸經濟強勁嘛！」
就算因出口增長，新發行嘅錢，最終都要回流，變成中國境內資金池一部份。越來越多錢，追逐無乜增加過嘅貨物，就係通貨膨脹。要去減少不斷增長嘅錢對物價嘅壓力，人行用佛利民一條數式：MV＝PQ
呢條式，簡單易明：M係錢嘅總額，P係物價，Q係社會出產總量。佛利民開創嘅貨幣學派認為，社會出產總量（Q）短期內難有大改變，所以錢嘅總額增加減少，直接影響物價上落。
人行無法控制M，因為大型國有銀行以下，有好多大型國企等錢用。所以M一定要不斷增加。要調控物價，人行唯一變數就係V。V係乜？V就係錢嘅流轉速度。V越高，物價越高，反之亦然。太平盛世，V好穩定。不過兵荒馬亂，V可以大上大落。最重要一點，V並唔係簡單調整RRR就可以。事實上，之前減RRR，V並無跌，只不過錢由枱面走去枱底。今次人行減RRR，正面諗係陽光政策，慢慢鼓勵枱底錢回流正規系統。不過，對放大信貸就無乜用；對內銀股應該有少少好處，對宏觀經濟無乜意義。究竟o依家似07年定09年？我會話：It is different every time。
利世民