📖 ZKIZ Archives

租車有景「天使」打本$200萬

2015-01-01 NM 要香港的車主們，把自己愛車出租，讓無車之人，也能享受駕駛之樂。條橋聽落唔錯，但能夠想像到實際運作時，一定問題多多。二十六歲的楊永康（Christopher），去年投資五十萬，打造Carshare平台。車主與租客透過此app交易，他從中抽佣。不過開業年多，遇上問題不少，現時每月燒錢十六萬！ 不過，天使投資者往往不睇數字，只看遠景。Christopher不但找到車廠合作，提高租車吸引力；更進軍上海，將目光放在內地。生意充滿遠景，吸引一名天使投資者打本二百萬元，Christopher說：「佢無提過要求我哋幾時回本，還不斷鼓勵我們。」這就是Startup與一般實業不同之處。 在英國讀書的Chris曾試過在歐洲租車玩Roadtrip，亦試過分租當地居民的房間，他稱之為「共享經濟」，回港後發現香港並無此概念，去年成立Carshare，「好多人平時只係星期一至五用車，星期六日咪可以租架車出去，將用唔盡嘅嘢分享出去，又可以產生經濟效益！」租客只要在其網站或app上揀好車款，落訂後便可與車主直接聯絡交收。Chris指有車主試過一個月收八千元租，不過現階段這情況只屬少數，他指要在香港實行這盤生意，要解決的問題不少。 傾保險頭痕 先是汽車保險，Chris拿着計劃逐間保險公司拍門，但由於無經驗、無數據支援，曾被二十多間保險公司拒絕，「通常保險都係一個月，但我哋要求一日，甚至斷鐘計，意念太過新，搵咗廿間，得一間叫豐亞保險受理。」目前二千cc以下的車輛每日保費為一百六十元，每小時收費為四十元，受保內容包括第三者意外保險及汽車全保，「新用戶登記後，通常兩至三日就會批保險出嚟，由於保險跟租客，之後再租車就唔使等保險重新批，慳番唔少時間。」不過，因意念太過新，頭幾個月，每月只得五單生意。租車費每日由五百至八百蚊不等，Chris從中收取三成佣金，即一個月只有不足三千蚊營業額，Chris表示「預咗」：「咁雙方唔認識，車主怕撞爛，我哋唯有為會員設多些限制，增加車主信心。」會員須年滿二十五歲，持有車牌兩年以上，扣分不能多過六分等。Chris亦在app中增設即時通訊，讓車主可與租客即時對話，「車主可以喺租車前問租客背景，覺得對方可靠先再租架車俾人。」他更在每部車裝上由他找人設計的行車記錄儀，紀錄租客的駕駛態度及行車資料，「我哋花咗十幾萬去搞，除咗有GPS，仲會有套電腦軟件計算同記綠，睇到駕駛者會唔會成日踩行油，急煞車同轉急彎。」再按指標判定租客是否不良駕駛者，制定blacklist。他強調開業一年，意外次數只得十次，還未試過撞車，「只係花咗少少，但保險一定賠得足！」 與車廠合作 租客、車主私下見面，不少還成為朋友，但Chris不怕會員過橋抽板：「我哋有保險，私底下租車會有風險，而且我哋有咁多架車，你都想試吓租唔同車啦。」目前最多人租的是寶馬及平治，有兩架舊款波子亦成功租出，但要提高Carshare吸引力，必須引進更多品牌才可行，Chris說有難度，「試過有車主想租架法拉利出嚟，但架車馬力超過三千二百cc，保險就唔受理，所以要吸引名貴跑車出租仲有啲難度。」網站亦設有討論區，方便會員交流意見，提高效率及讓車主檢舉態度不良的租客。會員Ning Chan曾租用一架Toyota bb，他叮囑其他會員小心及愛錫租車，「見到架車被其他人粗用，替車主痛心。」為了引入更多款式獨特的車輛，他將與車廠合作，成立「車主共享計劃」，車廠將免費送出二十部未出廠的新款汽車給Carshare會員，條件是車主需要把這部免費獲得的大禮，出租予Carshare其他會員，「車廠當promotion 又可以收集車主意見，喺正式出售架車之前再作改良。而我哋就有新車出租，一舉兩得！」Chris為了保持神秘，暫未能透露是哪個牌子。他期望日後可長期和車廠合作，帶動買車前先租車的風氣，「你去車行試車，最多俾你試半個鐘，又唔可以開去好遠嘅地方，但透過Carshare就可以租全日嚟慢慢試，如果可以帶起租車潮，對生意有幫助。」 進軍上海 公司未收支平衡，Chris就決定加碼投資，將技術人員及主要團隊等全搬往上海，成立大陸版Carshare「無私租車」，名字有點老土，Chris解釋：「大陸唔習慣用英文名，意思係無私地分享。」在旺角的辦公室則主力做市場推廣。Chris指香港私家車登記數目有五十多萬架，但上海有二百萬架，如打入大陸市場，用戶數目將倍增，「每月固定支出都係咁多，咁不如擴大個版圖，而且大陸人工平啲。」近月他已長駐上海，連上週聖誕節亦在當地度過。這一個月的經驗，令他有感這決定無錯，「香港千七個會員，大陸版Carshare已經有一千三百多個車主登記，租車嘅人又多過香港，但個市場仲好有空間，而家得四間租車公司，最大嗰間租車公司叫神州租車，市佔率都只得百分之六，我哋喺香港已經有完善嘅系統，我有信心可以贏到對方！」意念創新，但問題多多，最初不但被身邊朋友「睇死」，連一向表示支持Startup的數碼港及科學園等創業資金亦把他拒諸門外，「我交過幾次計劃書，班委員覺得唔work，根本唔會有人肯租架車出去，仲話有好多法律風險，撞車點算呢？又話我後生，唔識做生意，又叫我返去計好條數先啦！」他說如當初獲資助二十萬，用來搞好軟件，公司便能早半年營業。他惟有一邊設計程式，一邊不斷參加創業比賽，結果在「浩觀創業論壇」比賽獲得第一名，贏到兩萬元獎金。 找到天使 那次參賽，令他認識了他的「天使」（投資者），「贏咗有報館訪問我，個天使睇到報導之後，想起佢自己十年前已經想搞租車，奈何當時科技支援不足搞唔成，見到我佢諗起佢自己。」他指雙方見面傾談超過七次才落實投資計劃，「對方見我好有誠意，做事有交帶及準時，每次見面，我應承咗要做嘅嘢按時完成。」如答應找到保險公司及解決車主信心問題等。對方認為他有遠景之餘，亦實際。「天使無要求我哋幾時回本，亦無過問，因為佢都知道做Startup要賺錢，唔係短時間的事。」Chris卻希望生意兩年內可收支平衡。不過，現時Carshare營運逾一年，天使投資的二百萬已差不多花光，對方無再「泵水」。為了有更多資金進軍上海，Chris亦開始在大陸尋找新的投資者，並獲得「A輪」（風險投資基金）入股，「A輪即係一般創業公司由天使投資後嘅第二筆投資，A輪多數係五至六個投資者合組嘅，今次有部分係大陸人，有部分係外國嘅投資者，全部都對大陸租車業有興趣。」Chris真正夠運！ 開業資料 辦公室租金^$60,000 器材$100,000 人工$90,000 IT運作$130,000 雜費$50,000 總投資$430,000^二按一上 營業資料 營業額$170,000 租金$20,000 人工#$180,000 IT運作$130,000 盈利-$160,000# 9位員工連老闆 一點意見 至今寫過300個Apps的Innopage創辦人李勁華，曾獲得香港資訊及通訊科技獎天使投資者點睇天使投資者一般以個人資金投資，啱心水的生意模式便會投資，唔似企業或銀行要有抵押或計回報率，因此便會肯投資Carshare等創業公司。生意優點租車有需求，例如聖誕期間租車公司不夠應付市場需求，Carshare能滿足駕駛者的需求，租車市場有空間增長。資訊科技發達，容易Blacklist態度不良的用戶。改善方法Carshare在創造新的消費習慣模式，建議再籌集一筆資金，好似Call的士apps，燒更多錢補貼車主及租客，將租車門檻降低，吸引更多人租車，令租車成為習慣，建立大量用戶群後再減少補貼及加價來回本及賺錢。 bmw apps toyota

青心直說：中投高盛有景轟 胡孟青

1 : GS(14)@2013-06-25 01:34:11

http://hk.apple.nextmedia.com/financeestate/art/20130624/18309953

                市場常常會發生怪事，而上周中投大手減持保利協鑫（3800）就是其中之一。減持事件帶出的問題除了保利協鑫的公司前景、光伏行業發展之外，還有高盛巧合地幾乎在同一日發報告，勁硬銷已幾乎講到爛的「美麗中國」概念。報告借國務院總理李克強開會時對空氣污染問題的關注及政策推動光伏產業而無限放大，重申保利協鑫前景，維持其買入評級，該報告長達五頁，但免責聲明就佔了四頁。

疑似唱好造就出貨

                翻查紀錄，高盛6月4日才以37頁報告，正式將保利協鑫上調至買入評級，目標價調升至3元，在同一報告內，卻同時把其他光伏股由中性調低至沽售。最好彩的一家於深圳上市的陽光電源，評級亦要由買入被調低至中性。兩周之內，兩度唱好，次數太過頻密，況且高盛正是中投配售的主要承銷行。於5月份，高盛已為保利協鑫發出三份報告，在其5月2日、8日及19日的報告中，目標價也不過是看1.8元。
又是幾乎在中投配售股份的同一日，國務院常務會議發表公告，提到李克強明確表明支持光伏行業發展，並在會上提出要從資金、補貼等各方面，支持行業渡過難關。因為歐盟制裁，早陣子已經先後傳出行業補貼的消息，更指出要支持行業巨企併購整合等。
時間表上，傳聞補貼、股價炒上、中央表態支持、高盛兩份報告、之後中投減持，中間正正涉及國務院要支持的行業。但作為國家隊主力的中投，就去大手減持行業巨企，從邏輯上看明顯互相衝突。
中投09年起持股，保利協鑫炒了幾次，股價見過5元，當時不減持獲利，現在卻以每股1.87港元，折讓雙位數，較入股時平均價1.79元僅高八仙出貨，實在令我摸不着頭腦。

胡孟青
獨立股評人                                                        

---

【動畫】拖遊客手影相扮天真清邁女童原來有景轟

1 : GS(14)@2016-09-28 05:04:22

一對情侶到泰國清邁旅遊時，與一對天真無邪的苗族女童合照，後來聲稱她們竟是蠱惑扒手，並以圖為證。男遊客MedardBoss在網上論壇Reddit貼出照片，稱與女友周日到雙龍寺（又稱素貼寺）遊覽，女友在梯級前與兩名穿苗族服飾的女童合照，女童站女友兩邊，各牽着她一隻手，MedardBoss負責拍攝。
MedardBoss表示，女友後來發現手錶遺失了，再翻查照片，發現女友與苗族女童合照時，牽她左手的一人悄悄把女友手錶除下，但這刻卻被鏡頭捕捉住。MedardBoss形容女童手法「專業」。
MedardBoss的留言吸引幾千人回應。有網民表示曾在遊覽當地與那兩女童合照，指她們「可愛」，驟眼看不會懷疑她們有第三隻手。也有人分析女童「搵食」的手法，指她兩手觸摸女遊客不同位置，令她放下戒心，不知不覺間被除錶。也有自稱苗族人的網民指，女童可能被家長指使，要向遊人唱歌、揮手等手法賺取打賞，一旦未能「交數」就要捱打。英國《太陽報》／新西蘭stuff網站




來源: http://hk.apple.nextmedia.com/international/art/20160928/19784579

---

女神tea time：注資後抽升有景轟！

1 : GS(14)@2017-01-07 00:28:05

資金瘋狂走佬，部份資金衝落啲嚟香港。你望吓海航，近來係咁買殼，入主KTL（442）及嘉耀控股（1626），持股逾60%以上；最近又傳買鎮科集團（859），買親嘅股價都彈高。中能國際（1096）連炒幾日，呢隻股去年中易主，?家由中國華融（2799）做大股東。華融集團總資產超過8,660億元，比年初增長44%，仲多過海航嘅6,000億元資產。有冇得炒要睇有冇動作，公司上年底先以3億元收購福建新捷天然氣16%權益其主事能源儲存、運輸及銷售、和天然氣液化石油氣，已開展注資第一步！公司去年底亦發行1.5億元可換股債券，換股價為0.48元，同華融入股個價差唔多，似圍飛格。發可換股債券落實後，中能股價即刻起跳，由5毫炒上最高0.62元，成交配合。不過現價只較華融同批CB成本價升三成。假設華融要食大茶飯，應該未升夠，或者chok兩chok後，會整固抽上。
Fifi
http://fb.com/lovefrystock本欄逢周五刊出




來源: http://hk.apple.nextmedia.com/financeestate/art/20170106/19887548

---

操盤手札記：超人系呢隻最有景

1 : GS(14)@2017-11-05 17:06:38

新股大抽獎，資金被抽乾。閱文（772）頂頭槌飛一張要成4.2億元，竟然都有51張飛！閱文股票錢未解凍，現時市場資金相對唔多，抽雷蛇（1337）或比抽閱文值博。銀根抽緊，拆息抽高，股樓受壓。現時超過九成樓按使用H按，一般以一個月拆息作基準，現約H＋1.38厘，並以P按作鎖息上限，現計2.15厘。一個月拆息由9月平均0.43厘升至如今0.815厘，已高過封頂位。美國處於加息周期，香港遲早要跟，P會上升，當按息升至3厘，供平過租嘅優勢消失，樓市就會逆轉。差餉物業估價署最新數據顯示，樓價連續11個月破頂。天水圍嘉湖山莊本周亦連續三日破頂，兩房呎價高見10,603元。按統計處數據，個人每月收入中位數為15,300元；換言之，半數打工仔就算唔飲唔食，一個月都買唔起1.5呎邊陲樓！特首林鄭月娥嘅房屋政策以置業為主導，但佢從未喺香港置過業！如果一個股票分析員從未買過股票，你聽佢支笛？加息周期當前，息即是凶呀！買樓不如買地產股，雖然地產股都息口敏感，但無咁犯本兼回報更高。今年以嚟，樓價指數CCL累升17.6%；恒生地產分類指數就升31.5%，跑贏CCL成條街，兼跑贏大市。四大地產股中，長實（1113）今年累升40.7%，恒地（012）升44.1%，新地（016）升33.1%，新世界（017）升45.7%，計埋股息仲和味。我近期就比較留意長實。長和系前年大重組，和黃地產業務歸入長實，地產以外業務就歸長和（001），但年尾長建（1038）同電能（006）合併失敗後，長實開始減少地產業務，轉戰基建，公司剛以402億元出售中環中心75%權益，成為淨現金公司。現時系內長實、長建、電能、港燈（2638）都做基建。除咗港燈專注香港電力，其餘三間業務重叠。長實逐漸變身基建股，估值有提升空間；而且系內重組基建業務機會唔低，長實現金最多，最值得諗。割柑人本欄逢周四刊出



來源: https://hk.finance.appledaily.co ... e/20171102/20202157

---

魚樂無窮：低調破位有景轟

1 : GS(14)@2017-12-18 04:28:36

上次提過要建倉嘅匯控（005）及領展（823），前者在平保（2318）公佈持倉超過5%後，一直未有再打入北水掃貨榜十大，但股價繼續向十年新高進發，踢穿80蚊指日可待。領展周二創收市新高後，昨日見沽壓，好多人以為係獲利盤出籠，我則認為與回購價有關︰公司周二宣佈回購7.7萬股，數量為近期最少，回購平均價為69.7529元，似乎暗示管理層不願意在70蚊樓上出手，動力憧憬減弱下，基金或因此先行沽貨。執筆之時未知最新回購情況，還要再觀察一下，有最新消息再同大家更新。和電香港（215）10月完成出售固網業務，作價145億銀，以現金交收，篤篤計數機，折合每股高達3.02元，與昨日收市價3.03元相若，超級現金牛也。「又如何？唔派番畀股東都冇用。」翻查新聞，主席霍建寧曾經講過，派息與否將於12月董事會決定，又和電大股東為長和（001，持股66.09%），第二大股東為李嘉誠（持股8.38%），說穿了派特別息又係益自己，何樂而不為？系內電能（006）曾因現金滿瀉派特別息，和電昨日低調地創4個月高，走出個靚圓底，似乎露了玄機。唐牛
http://fb.com/tongcow88本欄逢周二、四刊出



來源: https://hk.finance.appledaily.co ... e/20171214/20244328

---