【馮仁昭四圍超】「閃婚控制唔到」郭嘉文勁冧李澤楷
1 :
GS(14)@2016-09-02 05:49:40■新一代「楷女郎」郭嘉文噚日大讚小小超紳士兼友善。
郭嘉文、何猷啟同外籍女友、關禮傑仲有劉丹等，噚日喺銅鑼灣皇室堡出席「東華三院慈善高爾夫球賽」記者會，早排跟小小超李澤楷蜜遊東京，兼忽然富貴嘅新一代「楷女郎」郭嘉文，近排雖然少出席公開活動，不過間唔中都會上網晒大大紮靚花同坐遊艇嘅相，問佢係咪忙住同小小超拍拖去旅行？郭嘉文初初話：「我有工作做緊，感情事順其自然，而家幾舒服，唔係單身。」但講到小小超係咪追緊佢時，佢又話大家係朋友，唔想講太多，唔想帶麻煩畀身邊人。
■郭嘉文同小小超蜜遊東京，爆出戀情。資料圖片
「結婚會公開」
講到似是而非咁，係咪想低調啲？郭嘉文又話：「呢樣你問番佢（李澤楷）啦！如果將來結婚一定會公開。」會唔會閃婚？佢話：「有時啲嘢控制唔到。」講到心水對象，佢就話鍾意成熟型男士，問到小小超係咪理想對象？佢再講多次唔想影響人之外，又講到小小超嘅為人：「我眼中嘅李生好gentleman，好friendly。」小小超係咪理想丈夫？郭嘉文即面紅兼口窒窒咁話：「我唔知，但係佢好成熟。」同場嘅關禮傑話會參加慈善高爾夫球賽，囡囡關楓馨嘅外籍男友充當佢私人教練，佢笑話：「加5分啦，加到第時結婚咪滿分囉。」撰文：馮仁昭
來源:
http://hk.apple.nextmedia.com/entertainment/art/20160902/19757143