|
||||||
|
上星期六在馬場 見到廠商F，當時仲未知道大家樂腳軟投降，講起大家樂「食飯扣鐘」之事，廠商F已經話大家樂揸弗人做法礙眼，未夠班，最好向富士康學習。左丁山不明所以， 問廠商F：「富士康不斷有工人跳樓，搞出大頭佛，卒之宣佈加薪三成。大家樂點學呀？可以加薪三成嘅話，就唔使一早發盈警啦？」廠商F話：「真係加薪三成嘅 話，好多廠家唔掂，點學吖？學嘅係富士康處理事情嘅手法，以退為進，金蟬脫殼，明加實減嗰啲招式，當然，大家樂係香港本土快餐店，要學富士康亦未必學得齊 全。」 講得咁玄，問多啲，知多啲。據廠商F嘅講法，富士康一方面宣佈深圳廠加薪三成，另方面同時加緊北遷，到河南鄭州設廠，鄭州市想增加工 廠職位，對富士康倒履相迎，一切給予好大嘅優惠，撥地建廠不在話下。鄭州工人薪水比深圳平了一大截，富士康慳番不少薪水，在深圳廠加薪三成可能係事實，但 深圳廠房規模不如前，工人人數日減，一條大數計落嚟，富士康可能仲會慳咗唔少，工資成本明加實減。至於冇北遷嘅香港深圳企業就苦咯，被逼跟隨加人工，總成 本貴過富士康，競爭力受到削弱o忝，無怪廠商F大呻：「台灣商人動腦筋又快又絕。」 左丁山聽到眼眨眨，想話讚郭台銘及其參謀嘅商戰策略，但又讚唔落，只能嘆一聲港商工廠規模遠遠不及富士康，想模仿亦未必可以得逞。 以 宏觀大勢嚟睇，中國農村之剩餘勞工（surplus labour）仍有相當，沿海或者冇晒，河南陝西山西四川等省份就依然係勞工供過於求，所以富士康可以內移得益，經濟學教授L曾估計呢個吸引剩餘勞工嘅過 程，會繼續維持二十年，之後中國人真正踏入老化期，沿海工業進入完全成熟階段，勞工短缺就會成為全國普遍現象。廠家L在我地傾到入神之時，喺旁邊經過，問 我地講緊乜：話俾佢聽如此如此，廠家L笑笑口加多一句：「香港廠商或者仲有一個理由唔係幾想遷往西北，我每次到四川都覺得冇啖好食，無論甚麼豬牛羊雞肉， 唔係辣到入唔到口，就係肥油多到唔敢食落肚，留番在廣東會長命啲！」 |
||||||