2010-7-29 AD
| ||||||
和黃(013)旗下嘅赫斯基能源(Husky),招攬咗3名新董事入局。超人李嘉誠請得嘅,當然係猛人!其中大家最熟悉嘅,應該係之前話自己身體唔好、搞到要辭職走人嘅財經事務及庫務局前局長馬時亨嘞。 華華真係想識吓肥馬位醫生,醫術高明到令肥馬近一年鬼咁精神爽利,做咗中策(235)主席冇耐,o依家又話幫埋誠哥打工。其實肥馬做官之前已經同小小超李澤楷結緣,做過幾年「8號仔」電盈嘅財務總監。肥馬今次撈埋石油,唔知係有小小超推薦吖?定只係同李家特別有緣呢? 另一位新董事係誠哥愛將,現年74歲、曾經喺長實(001)做咗廿年副主席嘅麥理思(George Magnus)。麥理思80年代就幫誠哥打工,o依家仲喺長和做緊非執董。 最後一位就係闊別兩年嘅英國駐港前總領事柏聖文(Stephen Bradley),華華最有印象就係佢成日大鬧港府冇搞好文化保育,又自爆皇后碼頭要拆嗰陣,嬲到想揸架插米字旗嘅遊艇去抗議。咁多意見,做公司董事真係啱晒佢。 李華華 [email protected] |