傳女網民不滿男友沉迷楊秀惠誤做第三者
1 :
GS(14)@2016-11-24 07:39:38大台劇《來自喵喵星的你》收視唔多掂，男女主角幾乎無一倖免俾人插，惟獨劇中飾演姣爆Natasha嘅楊秀惠，就俾人讚做得搞笑又夠放。唔知楊秀惠喺劇中係咪做得太入型入格，搞到啲宅男痴痴迷迷。近日喺網上討論區，就出現咗個po，內容大致係講有個女網民，不滿男友沉迷一個女明星，仲開女星個名叫「楊X惠」，唔難估到「楊X惠」就係楊秀惠。呢個女網民仲話唔介意男友無錢無骨氣，但就十分極之介意男友成日將楊秀惠同自己比較，就連電腦wallpaper都係用楊秀惠嘅相，同埋有一個專屬佢嘅相嘅folder。搞到女網民最後同男友炒大鑊！事後楊秀惠接受傳媒訪問時，就話有朋友之前send過呢個po俾佢睇，佢話：「哈哈！其實我自己都有追韓劇，都試過追星，之前就係《來自星星的你》，o依家就係《藍海傳說》，所以我都明白追星嘅心態。講真，唔知呢個係咪惡作劇，亦唔知真定假，但如果呢件事係真嘅，我就覺得男仔喺女友面前，最好唔好討論其他女仔，因為女友先係最重要嘛！」
來源:
http://hk.apple.nextmedia.com/entertainment/art/20161124/19843639