胡孟青：羅湖以北的完美佈景
1 :
GS(14)@2012-04-26 22:40:19http://www.sharpdaily.hk/article/fin/20120426/83361
引用《春嬌與志明》片中金句：「男人過了羅湖呢，唔係人嚟㗎！」，引伸於羅湖以北的上市或打算醞釀上市的公司，又應如何看待？負責睇IPO「刁」中港兩邊走核數哥，對財務數據之功力深厚應毋庸置疑，最近北上歸來仍行色匆匆，驚魂甫定卻不吐不快。查探之下，果然來自其再經歷的奇聞怪事。
大鱷駐紮香港搵食早有所聞，有賴香港250萬散戶羊群大軍真金白銀支持，唔難食大茶飯，最簡單放煙幕炒上再搵人大合唱，讓散戶食人口水尾，大戶成功散貨，實行勝利大逃亡。當然，近期市場氣氛與成交之差，明顯炒落較炒上容易，可料市場上將有更多渾水與匿名之輩，藉唱衰向下炒大搵真銀。奇在賓架、核數師、分析員以至股評人，年中一樣有睇廠，難道只有渾水與匿名才看得清楚「國王的新衣」？
究其詭異處，是市場中人浩浩蕩蕩成團，廠家早有準備，睇廠時與地亦由廠方安排。如人家來拜年，小女子都會極速收起家中雜物，展示最整齊一面。市場中人睇完廠，上市公司老闆自有專車接送及其他已安排的節目，務求令睇廠者賓至如歸。渾水與匿名，肯定屬不請自來，還有機會在廠房附近地氈式搜索更多資料，自然得出不一樣答案。
正如核數哥話齋，假廠睇得多，勢估不到今次可假得如此徹底，堪稱今期最經典完美佈景。還好自己唔係讀死書，憑經驗與直覺，分辨真偽與疑點。
話說正部署申請上市的公司，為核數哥安排睇廠時間刁鑽，竟於正午十二時正，閒日呢個鐘數個個去放飯啦！入廠已醒目發問這廠房有多少工人，老闆話六百，但數來數去小貓三幾十，其他人呢？答案係預期之內的「去晒食飯！」。
再經廠房車間，心想假如工人只是去食午飯，離開前機器應還在運行，那麼何解用手輕撫，機身竟凍冰冰？無人出聲。再經鄰近停車場的一幢幢紙皮箱，老闆聲稱該批紙箱內是準備付運的高科技製成品，忘記告訴大家，這家廠所生產的所謂高科技產品，係iPhone個殼喎！
核數哥好奇，以為推推一箱就知是龍是蛇，誰知推也不用推，用手指一篤即移位。至此相信大家已可自行猜猜究竟廠內工人係咪老臨，機器貨物又係咪道具。
胡孟青
獨立股評人