ZKIZ Archives


老公放水十月剖腹產子黎姿資產大轉移

2012-9-27  NM




今年十月,對大肚黎姿(Gigi)別具意義,除了是四十一歲生辰,也是她的第二胎,BB出世大日子,一直想為老公追個仔的Gigi,今次得償所願佗到慈姑椗,可以封肚收工。距離生仔唔夠一個月時間,但肚大如籮,體重升至百六磅谷行奶的Gigi,這段時間依然堅持帶孖女返學同出街玩,還挺住個肚返公司打理美容院生意,難怪老公馬廷強再加碼注資,支持老婆擴展業務。成功追仔

十月底,黎姿將會入院剖腹生第二胎,雖然老公馬廷強講到明,生仔生女都無所謂,家有孖女家蔚、家鎂已經好滿足,但Gigi深明老公祖籍潮州,傳統家庭觀念重視男丁,就算去到四十歲,都堅持繼續生,誓為馬家添個慈姑椗。「Gigi好神秘,唔肯透露生仔定生女,每次問親佢係咪仔?佢都笑得好開心,又講到明生埋呢胎收工唔再生,見佢咁講,我哋成班friend都估佢佗仔。」Gigi友人說。早兩個星期(九月十五日),大肚Gigi同老公帶埋孖女到中環文華酒店Cafe Causette食晏,由於當日天氣相當熱,Gigi穿上低胸碎花吊帶裙,再用圍巾護頸,肚大如籮的她,腰圍比例拍得住當年佗孖胎,有過佗B經驗,著住平底涼鞋的Gigi行動尚算敏捷。巨肚出巡加上臨盆在即,本身擁有導彈身材的愛美神,在這段谷奶時期,上圍顯得特別偉大。

五億慰妻

三年抱三,黎姿將為馬家添男丁,老公送遊艇送樓慰妻,禮物票面已超過五億,黎姿肚皮好值錢。

佗得舒服

在酒店大堂會合孖女後,Gigi拖住細孖家鎂行入餐廳,大孖就由工人抱住,十五分鐘後,馬廷強放工趕到餐廳會合三母女,一家人食了個半小時,孖女由工人照顧先行離開返屋企,Gigi同老公則留低,同其他人傾公事。一傾又個幾鐘,一行人離開餐廳行去酒店大堂,由於車未到,馬廷強擔心老婆佗B怕熱,自己行出門口等車,讓Gigi繼續留在室內涼冷氣,非常體貼。據知,Gigi今胎佗得好輕鬆,除了頭三個月出現作嘔易暈等大肚婆徵兆,之後身體已好快適應。由於上次細孖出世唔足磅,Gigi今次更加重視BB營養,由懷孕開始,每日根據營養師餐單進食,加埋老公安排補品,BB媽咪營養十足,Gigi肚圍達五十吋,體重升至一百六十磅。雖然BB就快出世,但Gigi仍堅持親自湊女返學,每日早上七點鐘起身,陪老公及孖女食早餐,十點陪兩個囡囡返學,湊完放學食埋晏,才會返美容院打理生意。「其實Patrick(馬廷強)唔想老婆咁辛苦,想佢做少啲,不過間公司始終係佢細佬(黎嬰)嘅心血,Gigi點都唔會放棄,加上佢一直相信細佬會好番,到時佢就可以親手將間公司交番俾細佬打理。」Gigi身邊人說。

起死回生

全心全意為屋企人的黎姿,05年打本給胞弟黎嬰,在銅鑼灣金朝陽中心開設的cosmax激光美容中心,07年黎嬰車禍重傷,腦細胞受損導致行動說話不便,昔日美容中心客仔紛紛踩上診所要求退錢,大量熟客流失,導致陣腳大亂,一度要裁員幫公司止血。到08年,黎姿宣佈退出娛樂圈,結婚生仔同時,亦以老闆娘身份日日返細佬診所主持大局。除聘請多名外援皮膚醫生駐診,她更親力親為打理行政,睇住盤數,再做埋代言人招攬生意,一年之後終穩定軍心,每月營業額達300萬,即使遇上金融海嘯,Gigi亦咬緊牙關度過。近年進一步推出自家品牌美容產品系列,更將原先只有千呎的診所,擴充到七千多呎,備有十六間治療室、超過二十多種國際級水準醫學設備,經常邀請外地名醫到港作交流,提供課程教護膚,稍後將會在國內開分店。

老公注資

為了全力支持老婆心願,又方便照顧大肚婆,馬廷強特別在自己位於灣仔新鴻基中心的寫字樓內,開闢一個地方給Gigi做辦公室,又大幅加碼再注資入美容院,助她開拓大陸及海外業務。「做生意一定係Patrick強項,佢幫Gigi換咗班勁人幫手打理,而家公司開始重組,會成立唔同部門,逐步擴展業務,除咗香港,仲會喺大陸同其他海外地方發展,甚至推出自家品牌護膚品。」一名美容院職員說。Gigi的美容院Cos Max於今年七月起開始進行大變動,原本是股東的黎母陳婉,七月九日正式辭去董事一職,Gigi於八月將Cos Max Limited全數五百萬股,以及G Max Group Ltd全數股份,轉去一間BVI海外註冊公司Sunny Bright Group Holdings Limited。生意愈搞愈大,Gigi大住個肚,都要返公司睇住盤生意。

豪門慈姑椗

入得豪門,為家族繼後香燈責無旁貸,好運如李嘉欣可以一索得男當然安樂,但城中唔少富豪太太、女友,為添男丁,不惜生完再生。

徐子淇

先後為李家誠誕下兩女,至去年第三度懷孕,終於成功追仔。有指徐子淇根據「清宮生男生女圖」,計算行房時間,配合改變飲食習慣,多吃含鹼量高食物,如鹼性礦泉水及寶礦力,終成功佗「慈姑椗」。

王儷橋

原名王富信的王儷橋,93年下嫁李澤鉅後專心為李家開枝散葉,可惜肚皮唔爭氣,分別在96、00及03年誕下三名女兒,至05年,獲高人指點改名王儷橋後,翌年才成功誕下男丁。

甘比

08年已為大劉誕下女兒劉秀樺的甘比,一直深得大劉歡心,今年初,甘比證實成功懷有男丁,與已有一子一女的大劉女友呂麗君打成平手。

 
PermaLink: https://articles.zkiz.com/?id=37935

黎姿老公掃California Fitness夜冷貨

2017-02-12  BN

卓珈控股(8358)上週搶晒鏡,焦點都落在由藝人進身為上市公司主席兼CEO的黎姿身上,其實她背後的男人——老公馬廷強默默支持,卓珈七成半的股份由兩公婆齊齊持有之餘,卓珈上市後可能仲有後着。

馬廷強行動不便,有空都喜歡到健身中心做吓拉筋;近日搵埋商界友好向加州健身(California Fitness)的臨時清盤人,購入加州健身嘅資產,包括健身器材,意味去年七月執笠嘅California有機會復活,前老闆P.K.王就話:「我都有聽聞,但細節就唔清楚。」其實所謂有形資產如健身器材折舊唔少,而且加州健身收過千幾宗投訴,個「朵」都麻麻哋,商譽呢個無形資產更難叫價,所以馬廷強都唔係花好多錢,當執「夜冷貨」咁啫,不過執靚佢再唧入上市公司可能又變銀紙喎,所以話兩公婆,一人計短,二人計長。

林鄭兄弟手足情深

林鄭宣布參選特首,特別提到最喜歡做社會福利署署長一職,因為可以體驗關愛共融思想,奶媽味道甚濃,其實林鄭的阿哥同細佬也學得林鄭咁,危難之時有一份守望相助嘅精神。話說○五年,林鄭兄長鄭宏光破產,那時林鄭父母鄭阿毛和林鳳蘭持有的鰂魚涌南豐新邨單位在九九年已賣掉,呢位林兄落難之時,就報住林鄭細佬鄭孝光持有的南豐新邨另一個單位,足見兄弟之間手足情深!

中環寸嘴潮廳自廢武功

祖籍潮州嘅岳少呢幾年又搞China Tang、Kowloon Tang,喺皇九入面以前間食廣東菜Island Tang(港島廳),舊年底裝修小執過,變身做Chiu Tang(潮廳),唔知係潮人嘅潮,定潮州菜嘅廳,即管踩吓場。入到呢間潮廳,原來嘅酒吧位變咗滷水檔,仲吊咗隻大肥鵝喺度,入潮州菜館踩場一定係整碗潮州翅啷啷口,咁就知佢有幾高級,吖,原來呢度碗翅貴上環「尚興」幾廿蚊咋,啲翅針又粗啲,計埋地點裝修,咁都算抵食喎。潮廳個老總叫我唔好寫,話老細怕食翅啲環保人士唔鍾意,唔敢promote,唓,呢啲叫做一時唔偷雞做保長;潮州菜最出名就係凍蟹同埋招牌翅,呢啲正式係又痕又怕痛,顧住做唔夠數交唔到業績上唔到市呀!計我話,咩食家都假,偷食就最滋味嘅!不過呢間潮廳都係自廢武功,本來賺錢風水酒吧位變咗滷水檔,做高級食肆唔promote酒死梗,賣一支酒頂十碗八碗翅啦!嗰日寒寒哋,開番支「滴滴金」d'Yquem配吓點心,驅吓寒氣,令我憶起廿幾三十年前,初初返香港識羅兆輝,我不嬲都係英國style,雪茄送PortWine,羅兆輝教路叫靚女點着支蘸過白蘭地嘅雪茄,咁就賜「滴滴金」俾啲女飲,唔知岳少識唔識呢?

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

御用建築師分級數

西九故宮有「御用建築師」嚴迅奇,香港發展商亦有,揀建築師通常講夾唔夾,例如長實地產近年多用凌顯文建築師,皆因其妻吳佳慶是長實地產董事,亦是李澤鉅的大學同窗;而新地御用建築師為呂元祥建築師樓,話晒係郭炳江親家,不過講到大孖沙興建自家嘅地標,其「御用建築師」級數又唔同,通常起用洋人建築師樓,與設計大型屋苑講求用盡地積比率有別!如長江中心起用LeoA Daly和Cesar Pelli,國金二期亦找Cesar Pelli及嚴迅奇,胡應湘最親力親為,合和中心正是出自其手筆!

PermaLink: https://articles.zkiz.com/?id=235063

徐子淇孖黎姿玩假槍

1 : GS(14)@2016-03-18 23:56:26

■徐子淇(左)用假槍指向黎姿擺甫士。互聯網圖片


千億新抱徐子淇與夫婿李家誠前晚出席邱德根孫女邱詠賢(Wendy)的生日會,同場還有Wendy細佬邱華瑋、周國豐及黎姿等。


■子淇去開P都要攬住老公晒恩愛。互聯網圖片


子淇昨貼了三幅相上Instagram,當中她恩愛攬實老公,另一張則是子淇與黎姿合照,兩位幸福人妻齊以黑衣紅唇打扮,子淇拿玩具手槍指着黎姿,相當搞笑。其實44歲的黎姿甚少去party,就算她大子淇足有11年,依然搶眼,真係凍齡有方,不少網友都留言讚她靚。撰文:唐如





來源: http://hk.apple.nextmedia.com/entertainment/art/20160318/19534151
PermaLink: https://articles.zkiz.com/?id=298385

黎姿呻老公倒米

1 : GS(14)@2016-05-21 18:29:45

■黎姿昨日一身白色pure現身領獎,美魔女感覺依然。


黎姿昨日現身灣仔會展出席「ERB人才企業嘉許計劃頒授典禮」,她打理的醫學美容業務CosMax獲選為嘉許機構。黎姿昨日一身白色pure現身,美魔女感覺依然,她毫無架子地在台下排隊等領獎。黎姿透露工作佔三分一時間,其餘時間都放在家庭,從商轉型對她而言極大挑戰,更視公司為另一baby。黎姿身為公司行政總裁,老公支持她工作,但拒試美容,黎姿笑言:「佢倒我米㗎,我有捉老公去公司,佢話唔搽cream,唔鍾意做機,黑晒面,我身邊有太太朋友問我有關美容,佢會話我唔搽cream。」黎姿今次得獎有和胞弟黎嬰分享,但對方要接受治療訓練,所以未有同行領獎。採訪:卓寶花 攝影:仇志德





來源: http://hk.apple.nextmedia.com/entertainment/art/20160520/19619262
PermaLink: https://articles.zkiz.com/?id=300850

大劉為廚師轉場黎姿係「半島常客」

1 : GS(14)@2016-09-06 22:50:59

大劉同甘比一直當灣仔福臨門係「飯堂」,之不過近排佢哋唔去福臨門,轉場去置地廣場嘅唐人館同尖沙嘴半島酒店嘉麟樓食飯,咁啱大劉舊愛李嘉欣身穿熱褲,前日一家三口及家人喺半島現身,似乎同大劉口味都幾近似!大劉甘比忽然轉飯堂大劉(劉鑾雄)同甘比由福臨門轉場去半島,原來有段古,據知喺福臨門嘅一位廚師煮嘢畀大劉食十幾年,早前去咗半島嘉麟樓揸fit,因為個廚師知大劉嘅口味,亦由於大劉患糖尿病,基本上啲餐係度身訂製,所以大劉同甘比先忽然轉場,漸漸成為半島常客。啟山超蓮浪漫撐枱腳賭王三房最索千金超蓮回復單身後,與霍震霆二公子霍啟山行得最密切,今年1月先被爆喺半島Chesa嘆瑞士菜撐枱腳,不過當時餐廳冇VIP房關係,所以佢哋就同其他客人一樣坐大廳;之後又喺廣州及台北見二人蜜遊,未知佢哋仲有冇發展空間。黎姿孖女愛high tea黎姿2008年宣佈退出娛圈,同年即嫁畀商人馬廷強做少奶奶,婚後生咗孖女家蔚同家鎂,黎姿都幾鍾意去半島,唔止當年喺半島連擺兩晚喜酒、家人生日P亦喺嗰度開,就連閒時黎姿都會同孖女去high tea!




來源: http://hk.apple.nextmedia.com/entertainment/art/20160906/19761511
PermaLink: https://articles.zkiz.com/?id=307829

黎姿為弟創立美容公司 申創板上市

1 : GS(14)@2016-09-17 15:26:38

【明報專訊】新股市場近日再度熱鬧起來,當中,由黎珈而(前名黎姿)及其丈夫馬廷強全權揸fit的美容品牌「CosMax」,最新亦向港交所(0388)創業板遞交上市申請。

據其申請書披露,是次申請於創版上市的卓珈控股,100%由馬廷強夫婦持有,創辦人為黎珈而。事實上,招股書中亦說明,公司乃其弟黎嬰意外受傷後,啟發黎珈而接手營運對方之醫學皮膚護理業務,並於2009年開設集團首間醫學美容中心。書中亦指出,黎珈而乃公司業務的著名標誌,公司的品牌知名度亦部分建基其公眾形象;而黎亦身兼執董、董事會主席及行政總裁三職於一身。此外,其小叔馬庭偉則擔任執董兼資訊科技及業務發展總監;而馬廷強則未有擔任管理層職務。

卓珈控股以「CosMax」品牌在銅鑼灣及中環的黃金地段經營兩間醫學美容中心,為客戶提供能量儀器及注射療程等非手術醫學美容服務及護膚產品,以改善皮膚問題及提升外貌。截至今年3月底止年度,公司共錄得8335萬收入,按年升12.7%;而純利則錄得逾1850萬元,較去年同期升37%,純利率為22.2%。

興業太陽能擬分拆新材料

此外,興業太陽能(0750)昨發公告稱,建議將其持有逾九成權益的興業新材料分拆上市。該公司主要從事生產及銷售銦錫氧化物(ITO)導電膜,以及研發、生產及銷售智能薄膜等新材料業務。集團表示,建議分拆上市,可吸引尋求投資新材料產品行業的新投資者,以達致集資需求;並期望成功上市後,集團可集中從事環保及可再生能源應用業務,並專注於太陽能設計、採購及施工(EPC)市場。

郵儲行認購反應一般

至於另一矚目新股中國郵儲銀行(1658),第二日招股反應依舊平平。綜合耀才(1428)、輝立及信誠3家券商統計,僅錄得1.2億元孖展額度;另據市場消息稱,海通及銀河國際分別借出5.8億及1.7億元孖展。信誠證券聯席董事張智威表示,認購反應冷淡主要由於中秋假期前投資者採觀望態度 ,或於假期後再作打算。


來源: http://www.mpfinance.com/fin/dai ... 7107&issue=20160916
PermaLink: https://articles.zkiz.com/?id=309155

黎姿陀巨肚出街5人服侍趙文卓全裸攬老婆影寫真

1 : GS(14)@2016-11-11 08:10:29

自演唱會之後,Kay休息咗差唔多大半年,個月肚一日大過一日,《蘋果》日前見到佢,個肚仲大到成座山咁,好彩身邊有老公張繼聰照顧咋。陀B係辛苦嘅,尤其係巨肚,好似黎姿咁,10年有喜時就要5個人喺身邊侍候,無耐就生咗一對孖女,大女重約6磅,細女都有3磅幾。10月懷胎呢個過程係辛苦嘅,但都好值得紀念,好似安排太太喺香港生仔嘅趙文卓,今年8月就同太太影咗全裸寫真,個焦點梗係影個巨肚啦。另外,黃伊汶(Emme)今年初都有約埋老公陳國坤影巨肚寫真,Emme除咗用巨肚頂老公,仲有一張係「低炒」,顯得個肚特別勁。除咗影相,巨肚都仲可以用嚟畫畫,鄭希怡(Yumiko)上年陀B嘅時候,就試過喺肚皮上畫咗個小女孩嘅樣,結果佢嘅B女梁浸浸出世,真係同幅畫一樣,精靈可愛。




來源: http://hk.apple.nextmedia.com/entertainment/art/20161111/19829810
PermaLink: https://articles.zkiz.com/?id=315067

【爆相爆片】黎姿湊三女影燈飾

1 : GS(14)@2016-12-01 08:06:42

■細女(左二)要黎姿氹才埋位與兩位家姐合照。讀者提供圖片



黎姿08年嫁商人馬廷強,婚後育有三女,孖女馬家蔚(Pricia)與馬家鎂(Gianna)已經6歲,今年就讀小學一年級,4歲細女Pegella剛上幼稚園。聖誕節快到,黎姿趁着各大商場擺放了不同的聖誕燈飾擺設,上周六讀者冼小姐透過本報「爆相爆片」,分享見到黎姿帶着三位千金在尖沙嘴海港城看聖誕燈飾的相片。當日薄施脂粉的黎姿,像普通家庭的母親一樣帶着女兒行街,冼小姐表示黎姿三位千金穿上同款黑色皮褸加legging,扮相統一,既有型又可愛。黎姿拿着手提電話,叫孖女Pricia和Gianna在聖誕燈飾前影相,孖女乖乖坐定擺甫士,但細女就要媽咪氹才願意埋位,其間不少遊人認得黎姿並要求合照,而她並無架子一口答應。撰文:非非


■黎姿上周六在海港城用手提電話為女兒影相。讀者提供圖片

■黎姿三個女兒均穿上同款黑色皮褸,擺甫影相,十分可愛。讀者提供圖片



來源: http://hk.apple.nextmedia.com/entertainment/art/20161201/19850785
PermaLink: https://articles.zkiz.com/?id=317831

黎姿做闊太《珠光寶氣》班姊妹有咩搞

1 : GS(14)@2016-12-01 08:06:44

黎姿喺拍完大台套《珠光寶氣》後,息影退出娛樂圈,嫁畀馬廷強專心做豪門少奶,咁佢班「姊妹」又有咩發展呢?邵美琪喺《珠》劇中演黎姿家姐嘅邵美琪(Maggie),已年屆51,但感情仍未有着落,舊年初狠撇拍拖6年的花心男施祖男後,未見再有伴。全程投入工作嘅Maggie,早前有份喺杜國威20周年經典舞台劇《我和春天有個約會》演蓮茜一角,不過主辦宣佈明年3月舉行巡演,但就因為易角而冇佢份。蔡少芬講完家姐到個妹,喺《珠》劇中演黎姿細妹嘅蔡少芬(Ada),自從此劇後,減少大台劇集演出,主力攻內地巿場,拍咗多套劇集,其中憑《後宮甄嬛傳》演皇后一角再度人氣急升。Ada同老公張晉更不時喺公開場合晒恩愛,又一齊參與內地綜藝節目《為她而戰》,佢為咗工作四圍飛,但都不忘照顧一對囡囡。鍾嘉欣喺《珠》劇中被安排要針對黎姿嘅鍾嘉欣,舊年12月秘嫁無綫前主席梁乃鵬的脊醫姪仔Jeremy,並於今年2月喺溫哥華舉行婚禮補喜酒,佢更喺6月尾生咗個千金Kelly,近排逐步復出,最近仲帶埋囡囡返港開工,不過佢話打算餵人奶到B女一歲大,所以暫時唔會拍劇住。




來源: http://hk.apple.nextmedia.com/entertainment/art/20161201/19850763
PermaLink: https://articles.zkiz.com/?id=317833

Rock味貴婦!肚凸凸黎姿爛牛襯長靴 自製母女裝

1 : GS(14)@2016-12-03 05:12:35

生活低調的黎姿上周六就趁假期同三位千金去了尖沙嘴海港城睇聖誕燈飾,當日她薄施脂粉,依然靚爆冇走樣,她拿著電話為三位囡囡於聖誕裝飾前影相,孖女就穿Stella McCartney Kids的星星legging襯皮褸仔和biker style的短靴,相當可愛,而黎姿就穿上類似Chanel的黑色格子tweed jacket襯黑色窄身ripped jeans,襯Acne Studios黑長靴,打扮甚有rock味,同囡囡的biker style襯到絕。




來源: http://hk.apple.nextmedia.com/entertainment/art/20161202/19852752
PermaLink: https://articles.zkiz.com/?id=318105

Next Page

ZKIZ Archives @ 2019