ZKIZ Archives


「仔女大個,係新開始」黃寶欣離婚賣餅

1 : GS(14)@2017-01-26 18:22:15

■黃寶欣結束20年婚姻回復單身後,開餅店發展個人事業。



黃寶欣當年憑一曲《酒杯敲鋼琴》唱至街知巷聞,轉眼今年她已50歲。97年她退出娛樂圈後轉做保險經紀,雖然做到top sales成績,但最後決定當全職媽媽,照顧一對子女。寶欣上一次公開露面是大前年現身好友鄭敬基的演唱會,二人合唱當年熱爆K場的《酒杯敲鋼琴》。不過最近寶欣被發現重投商界,與友人合資在九龍城開主打酥皮蛋撻的餅店,原來她已結束20年婚姻,回復單身。



■當年黃寶欣在樂壇成績不錯,唱片有雙白金數字。資料圖片

■大前年黃寶欣現身鄭敬基的演唱會,合唱經典歌《酒杯敲鋼琴》。資料圖片


步伐不同

昨日寶欣在餅店接受《蘋果》訪問,她承認離婚原因是夫婦彼此步伐不同,分開更開心,又指與前夫仍然保持良好關係。她說:「我哋OK㗎,我哋都經過商量同埋深思熟慮先決定,咁仔女當然唔會支持呢件事,但佢哋都會配合,而我哋(她和前夫)會以唔影響做最大原則去處理所有事情,大家好好、好和睦,仲係相敬如賓㗎!」忽然由家庭主婦再創業,寶欣說:「以前小朋友細,當然要以佢哋為主,但當佢哋大個,我都諗係咪應該為自己人生再作安排,?家係人生另一個階段、係新開始,我?家好開心㗎。」



■黃寶欣昨午在店內幫忙打點,並笑言投資了畢生積蓄。

■黃寶欣當年曾戀黃翊,女方最後嫁給他人,不過也離婚了。資料圖片


畢生積蓄

說到與友人合資的Queen Sophie餅店,寶欣透露是她與囡囡同學的家長合資,因為兩家人相識多年,加上拍檔本來已在內地經營這生意多年。原本拍檔提議一起在內地開店,但寶欣想留在香港做。餅店目前仍在試業階段,下周三(初五)才正式啟市,問寶欣個人投資的金額有多少?她立即嘩一聲說:「係畢生嘅積蓄呀!」昨日寶欣與店員分工合作,各有各忙,她說正式開業後,子女有時間可能都會到店內幫忙。採訪、攝影:黃曉程、梁繼光




來源: http://hk.apple.nextmedia.com/entertainment/art/20170126/19908635
PermaLink: https://articles.zkiz.com/?id=324281

黃寶欣賣撻發哥撐

1 : GS(14)@2017-02-09 23:44:22

現年50歲的黃寶欣,當年與鄭敬基合唱的《酒杯敲鋼琴》紅爆樂壇。不過,二十年前她決定轉行做保險及闖商界,之後更加成為全職家庭主婦。直至早前她承認結束婚姻,回復單身,宣佈再做老闆,與友人合資在九龍城開舖「酥妃皇后」,主打酥皮蛋撻。雖然蛋撻舖於農曆年間才正式開市,但已吸引不少人慕名光顧,當中包括發哥周潤發,寶欣日前便在facebook上載一張與發哥的合照,還留言:「好耐未試過笑得咁幸福了!」而其老友鄭敬基更帶老婆支持。撰文:李察




來源: http://hk.apple.nextmedia.com/entertainment/art/20170209/19922058
PermaLink: https://articles.zkiz.com/?id=326136

隱世廿年變單身《酒杯》黃寶欣賣蛋撻

1 : GS(14)@2017-02-12 15:31:04

2017-01-26 NM

97年退出娛圈轉行做保險的黃寶欣,與從商的男友結婚後銷聲匿跡;只有她跟舊拍檔鄭敬基合唱的經典歌《酒杯敲鋼琴》,依舊熱爆K場。隱世二十年,50歲黃寶欣忽然蒲頭,但並非復出幕前,而是在九龍城開鋪賣手打的酥皮蛋撻「酥妃皇后」。賣蛋撻,背後是剛結束婚姻,做個單身快樂人。同社會脫節十年

當初黃寶欣毅然退出幕前,與嫁人無關,是被歌手好友蔡濟文勸退。「當時想轉行,問佢(蔡濟文)點睇。佢提議我自己諗吓未來嗰兩、三年仲會唔會大爆,會唔會紅?我話冇可能啦!佢就話:『咁咪係囉!要搵番啲長遠嘅事業。』,所以咪轉做保險。」黃寶欣說。九七年,轉行兼結婚,婚後仍為個人事業搏殺,在盈科保險做到Top sales,又開過泰式按摩店,直至○六年,才放下所有做全職主婦。今日再重新出發,十年的人妻生活,黃寶欣發覺,原來自己早已跟社會脫節。「大仔喺美國讀書(今年升大學),個女都十六歲;啲細路返晒學,一個人喺屋企煲韓劇,開始發覺有問題;十年冇做過嘢,自信心低咗好多,當其他人都行得好快,自己仲停留喺原位,十年時間唔短,同個社會脫節咗,我要跟番上個時代步伐。」

前夫安排妥當

一個新開始的出現,也因為建基於過去的結束。苦心經營的廿年婚姻關係破裂,踏入二○一七年,黃寶欣辦好離婚手續,雖然回復單身,但她沒有感到徬徨失措。「我哋(同前夫)依家仲係好朋友,最緊要係冇影響對仔女;對方亦安排得好好,令我唔需要擔心生活。」曾經為家庭放棄自己的理想,但夫妻緣盡,無法勉強。「一段婚姻要維持長相廝守係好難,尤其大家生活地點唔同(前夫在國內做生意),老公响外面做嘢,太太只係家庭主婦就更加難,因為大家行嘅步伐唔同;我擺仔女位置係好前,關注度亦放晒喺佢哋身上,可能咁樣,忽略咗對方都唔定。有冇努力挽救過?咁當然有啦!」

人生中最驕傲

為免傷害更深,黃寶欣選擇放手,反而出現一個抖氣位。「唔好話婚姻,男女朋友都好,到分手嗰刻,最緊要大家搵到大家開心嗰個點!原來分開先會搵到嘅,咁咪分開囉,唔好強求。我人生最驕傲,係花咗好多時間將一對仔女培育好,依家條路佢哋自己創,咁我都要搵番一條適合自己嘅路嚟行。」

跟鄭敬基互相支持

今日,黃寶欣將全副精神由一對子女轉移到餅店。準備試業,每日留守鋪頭,朝九晚九。訪問當日,連餅店包租公都專程來打氣,鄰店又過來八卦幾時正式做生意;當然唔少得死黨兼拍檔的鄭敬基,不時facetime支持。「當初我支持(鄭敬基)再婚,佢梗係要支持番我。」人生下半場再發力,但對感情,她不抱寄望。「冇乜!因為我對自己都冇信心,冇信心可以再全情投入一段感情,所以亦冇可能要求人哋。」黃寶欣說。

人手打造368層酥皮

「酥妃皇后」原本計劃先在香港開鋪,礙於租金太貴,黃寶欣的拍檔惟有改變策略,先到內地創業,憑餅店以人手打造368層蛋撻酥皮及全蛋漿,不加任何凝固劑的省招牌功夫,廣受歡迎,國內的分店愈開愈多,為數有四十多間。由於黃寶欣女兒跟餅店老闆女是同學,兩家人早已認識,對在港開店更加一拍即合,九龍城是雙方合作第一間店,也是黃寶欣回復單身後,重新出發第一步。對於蛋撻,黃寶欣也有一段難忘回憶。「以前做歌手唱酒廊搵食,一日要走幾場,好多時都趕唔切食飯,最鍾意就係食蛋撻頂肚,估唔到而家會開餅鋪賣蛋撻。」

港版松田聖子

提起黃寶欣,除了經典合唱歌《酒杯敲鋼琴》,其他可能不易記起。85年參加新秀,87年出道,因有齙牙加上樣子可愛,當年被封為港版松田聖子。今日的Cool魔張智霖、許秋怡、蔣志光也是她昔日公司戰友,而同期出道的歌手有黃凱芹及劉美君。黃寶欣處女作《酒杯敲鋼琴》,敲出雙白金數字,作為新人成績超晒班,第二張唱片《他是誰》亦賣得金唱片數字。90年,黃寶欣加入大台做藝員,拍處境劇《同居三人組》,憑一臉童顏飾演「𡃁仔」一角及在《淘氣雙子星》演學生妹。95年她由大台跳去亞視,兩年後正式退出娛圈。

前度黃翊為愛棄事業

傳聞黃寶欣曾與鄭敬基拍拖,但她的唯一圈中真命,是黃翊。二人92年拍拖,當時黃翊是新藝寶旗下力捧歌手,在唱片公司高層施壓下,他要扮單身冧粉絲,甚至被打壓,逼他跟黃寶欣分手。但黃翊堅拒,結果被唱片公司掟入雪櫃。被雪的黃翊收入大減,黃寶欣與男友共患難,在舊樓築愛巢,之後試過孖住開唱歌學校,雖然無法開花,但二人再見亦是朋友。重提昔日情,黃寶欣笑一笑:「年紀輕嘛,每個人都有傻過嘅日子,喺外人眼中係傻,但對當事人就未必,人嘅成長就係咁!」

撰文、攝影、攝錄:娛樂組
PermaLink: https://articles.zkiz.com/?id=326584

黃寶欣賣撻再開茶記

1 : GS(14)@2017-06-18 22:07:17

■黃寶欣昨日在兩間舖內不停穿梭,自言是邊學邊做。

黃寶欣今年初和友人合資在九龍城開餅店賣蛋撻,不足半年再做老闆,在蛋撻店側開懷舊茶餐廳。昨日本報在九龍城見她不停在兩間舖穿梭,寶欣獲悉記者在場,即坦承有份投資茶餐廳,但不肯透露投資金額。寶欣又說:「星期一(19日)先正式做生意,今日係招呼朋友試食,比吓意見。」事後黃寶欣再接受電話訪問,她說:「都係同餅店拍檔合資,呢間茶檔喺內地已經有,香港就係第一間,主打懷舊風。」有指她不足半年再做老闆,她說自己都是邊學邊做,但之後都會好忙,因為餅店「酥妃皇后」會開分店。採訪、攝影:吳耀輝、徐錦池




來源: http://hk.apple.nextmedia.com/entertainment/art/20170617/20058563
PermaLink: https://articles.zkiz.com/?id=336020

開完餅店開茶記 黃寶欣希望開多幾間啦

1 : GS(14)@2017-06-23 01:44:42

今年50歲嘅黃寶欣,喺80年代同鄭敬基合唱《酒杯敲鋼琴》而熱爆K場,不過喺97年退出娛樂圈做咗人妻後鮮有露面,直至14年現身老友鄭敬基嘅演唱會做嘉賓,冇耐仲同朋友合資搞生意,喺九龍城開咗間「酥妃皇后」,原來佢已經結束20年婚姻,回復單身嘅黃寶欣,一切重新開始!前日《蘋果》路經九龍城,發現寶欣不停喺餅店同隔離一間茶餐廳穿梭,茶餐廳內雖然坐咗唔少人,但門外就貼住未營業嘅告示,佢喺餐廳裏面指手劃腳,又同啲店員同埋啲食客喺度密密傾,似乎係收集緊意見!記者趁寶欣返回餅店時上前問佢,係咪開咗茶餐廳,再做老闆?佢亦大方承認:「係呀!(獨資?)唔係,係集團一齊做嘅!(投資幾多錢呀?)唔講錢喇!」問寶欣舖頭有乜招牌菜?佢都好保密咁話未講得,話只係招呼啲朋友俾下意見,星期一先至會正式開業。事後《蘋果》再打電話俾寶欣,佢就話呢排都好忙,因為舖頭好多嘢要準備。講到呢間走懷舊風嘅茶餐廳,寶欣話:「我哋呢間『茶檔』其實喺大陸已經開咗,香港就係第一間,咁一定希望將來可以開多幾間啦!」問她擔不擔心會好辛苦?寶欣就話:「做嘢一定要親力親為,辛苦啲都要。」




來源: http://hk.apple.nextmedia.com/entertainment/art/20170619/20061250
PermaLink: https://articles.zkiz.com/?id=336487

黃寶欣、鄭敬基密斟開騷

1 : GS(14)@2017-08-04 06:35:54

鄭敬基、黃寶欣和黃翊前晚在中環大會堂出席一個回歸慶祝晚會,黃翊早年曾跟黃寶欣拍拖,兩人前晚大方合照。黃寶欣復出後,前晚與鄭敬基公開表演,她說:「今次同管弦樂合作,我哋拍敲擊樂,有叮叮聲,入歌幾難,唔知幾時入。」兩人曾傾合作開騷,黃寶欣說:「大家都好忙,冇乜時間坐定定傾好耐,佢又唔喺香港,我餐廳又開分店,如果唔影響工作,又滿足到自己興趣都想做吓。」退出樂壇二十多年的黃翊前晚演出不緊張,他說:「最近一次表演有呂珊等資深歌手,我反而有啲震。」採訪:王連連攝影:葉君海




來源: http://hk.apple.nextmedia.com/entertainment/art/20170804/20110748
PermaLink: https://articles.zkiz.com/?id=339618

Next Page

ZKIZ Archives @ 2019