| ||||||
近日股市牛氣沖天，在金融界這個「爾虞我詐」的金魚缸內，一宗投資期權失利的小故事，揭出一個吸水局。受害人，是在粵語殘片中、飾演呃女主角上床一類角色的演員麥基。去年七月，麥基想賺取資金開設「麥基炸雞」，遂拿出六十萬元，參加一間投資公司的「高息保本投資計劃」，惟最終卻取不回本金。疑似行騙者，是前上市公司上億國際主席陳英鳴。陳於九八年因非法經營存款業務，被判入獄。近年他重出江湖，手法與當年相似；一向演開「奸人」的麥基感嘆道：「佢真係先攞你心，再攞你金！」 在粵語殘片中壞事做盡、游手好閒的「死飛仔」麥基，曾參演《難測女兒心》、《紅男綠女》、及《阿飛正傳》等電影，有「東方占士甸」之稱。息影後他曾移居美國，近年回流。他是虔誠基督徒，近年四出傳福音。今年七十多歲的他，想以自己名氣開設「麥基炸雞」，但資金不足，正在想辦法。這時候，機會來了。「我個生死之交個仔，叫阿偉，話識得有個人好好o架，好鍾意幫人，慈善為懷，阿偉都有搵佢投資，佢係咁轟咗我成年！」他口中的「好人」，便是前上市公司上億國際的主席陳英鳴。「阿偉介紹陳英鳴俾我識，陳英鳴對我好好，成日搵架靚車，車我去灣仔逸東軒，開間VIP房，三、四個人食餐晏，成千蚊找數，佢俾成一百蚊tips啲侍應，好闊佬o架，我信佢唔會呃我少少錢囉。」 高息無「保本」 就這樣，相識幾個月後，直至去年七月，陳英鳴再出手，「佢同我講，自己投資好叻o架，可以俾到我百分之五嘅回報，我鬼迷迷咁就聽咗佢講。」陳英鳴帶麥基到他灣仔英皇集團中心「兆容創富」的辦公室，「我入到佢間大班房，俾咗五十萬老本佢，佢仲簽咗張金額對等嘅期票俾我，叫我三個月後隨時拿錢。我見有票喺手，仲使咩合約？」麥基遺憾說。陳英鳴這個計劃，名堂叫「高息保本投資計劃」。計劃風險低回報高，每月回報達本金的百分之五，還可以隨時攞錢走。麥基參與計劃後，頭三個月陳英鳴的確有每個月給他兩萬多三萬元利息，其間麥基更加碼多十萬元。三個月後，麥基打算離場，拿着支票去銀行提款，結果彈票，「我咪追佢（陳英鳴）還錢，佢話輸晒啦！」麥基曾就此事報警，欲告陳英鳴開空頭支票，惟警方跟他說此不算行騙，「佢哋話個戶口仲存在，人哋暫時唔夠錢啫，可能第日夠呢！」麥基手頭上的支票，是由「兆容創富」發出，此公司由一名叫莊建霆的人持有，表面上亦與陳英鳴無關。 曾坐監再蒲頭 活躍於金融圈的陳英鳴，曾經營電子廠，八十年代靠炒樓賺得第一桶金。九三年，他開設上億財務，為豪宅提供二按。直至九六年，他收購從事電子生產的上市公司銳鴻集團，並改名為上億國際（現名中國置業投資）。陳英鳴成為上市公司主席，風頭一時無兩，可是野心太大，累死自己。他旗下的上億財務，本身沒有「存款牌」，卻以二十四釐高息，非法接受存款；並「蠱惑地」向存戶發出借據，藉「私人貸款」作掩飾。九八年金融風暴，上億大量對外貸款未能收回，故存戶亦未能取回存款，遂向商業罪案調查科舉報，揭發事件，他被判破產及入獄三年。同時他亦已出售控股權，及辭任主席。出獄後，陳英鳴恍如在金融界銷聲匿跡，近年才蒲出水面「游弋」。記者在「兆容創富」的辦公室附近找到陳英鳴。對於麥基事件，他激動地說：「我會還俾佢！」有意無意間似暗示只是借貸，情況與當年上億事件相似。他又大呻無辜：「係麥基話自己好慘，一毫子都無，見我幫阿偉賺到錢，想我幫佢投資賺錢。我唔係欺騙佢哋，麥基老婆一直知我哋玩緊咩，佢收息時仲話識到我，係神嘅恩典。而家就輸打贏要，要我即刻還！佢話佢嗰啲係神嘅錢，咁神係咪唔可以俾啲時間我呀！」 律師也落疊 據知陳英鳴早年出獄後，靠炒股票、玩期指為生，但近年迷上炒期權，愈玩愈大。曾破產、資金不多的他，又無經紀牌，不能公開招客，只能透過「向朋友借錢」的方式集資，並以「高息保本」招徠。據知一直平安無事，今次爆煲，是因睇錯市炒燶期權，「佢一直深信一套測市模式，話bloomberg都要俾錢買，命中率八成喎！佢上年九月時因此睇淡，認為恒指會跌千幾點，點知美國推QE3，個市升咗千幾點，一來一回差成三千點呀。」一名認識他的友人說。陳英鳴向本刊記者承認投資失利，唯否認睇錯市，他自誇說：「我一向玩期權係『輸粒糖，贏間廠』，之前每個月最高回報可以超過百分之十o架。」今次輸錢，他推卸責任予不知名拍檔，「我係睇好個市o架，不過操盤嘅落錯盤，我今次係俾人累死o架！」據知，陳英鳴今次炒燶金額達七百多萬元，其中三百萬是他自己的錢。他一名身邊人透露，據知落疊的除了麥基，還有一名電影製片，以及大律師朱德。朱德相當騎呢，於○六年的一星期內，曾兩度與女伴性交而下體出血，要報警送院，登上各大報章頭版。「嗰次之後朱德收埋自己，一個人喺屋企玩吓股票。陳英鳴早年曾醉酒駕駛，係朱德幫佢打，故大家成日坐低講股票，陳英鳴成日請佢食飯。」朱德友人說。不過兩人關係亦「衰收尾」，上月，朱德入稟向陳英鳴追債，入稟狀指，朱德跟陳英鳴於去年七月口頭協議，朱德把自己的網上交易戶口及密碼，交予陳英鳴打理，朱德同時依陳英鳴指示按時存款，以便進行炒賣。按雙方協議，每月結算賺一成或以上，雙方把利潤平分；賺少於一成，朱則獲其中七成；若該月投資失利，損失全由陳英鳴承擔。最初幾個月朱德都有錢賺，但去年九月之後卻蝕了百五萬元，陳英鳴只還了當中十五萬元。記者曾往朱德住所找他，惟他一知記者的身份，立即關門並上鎖，恍似十分驚恐。陳英鳴說：「佢又係輸打贏要，佢自己都係律師，無合約得個講字，你信佢會肯咩？」 行蠱惑冷知識 行走江湖的金融古惑仔，甚懂得走法律罅；要與他們鬥，實非易事。奉勸大家，記着簡單一句就夠：「便宜莫貪。」1 兌唔到票非刑事 大律師陸偉雄指出，原來發票人開出支票後，持票人憑票到銀行拿錢時，若該戶口沒有足夠金錢而彈票，並不構成刑事罪。因為只要發票人一直承諾支票可兌現，只是因一時缺錢而要延遲，就不涉及行騙，最終只可從民事方面索償。2 借錢名義搞私募在沒有牌照下，向任何人買賣證券或結構性產品，便違反《證券及期貨條例》，可被檢控。但若果以借貸名義，向親友借錢作私人投資，則不受該條例監管。而根據《放債人條例》，任何人（不論是否持牌放債人）貸款或建議貸款的利率超過年息六分（60%），即屬違法。3 口頭承諾難證明口頭承諾雖然有法律效力，但大律師陸偉雄指，要證明口頭承諾的存在及細節，在技術上比較困難。除非有第三者在場做證或錄音。如果被指控一方，曾嘗試履行其口頭承諾，如曾還一、兩期借貸，則反而能作為證據；難怪大部分古惑仔，連第一期錢亦唔還，免得成為曾作出口頭承諾的證據！ 擅長拉攏人心 其實陳英鳴甚懂得捉人心理，他曾參與「Life Dynamics」的心理課程，教大家要互相信任，推心置腹。當年他在課程上認識不少會員，願意存款予上億財務。今日行走江湖，則經常出席老人院活動做義工，並常把前仁濟總理的身份掛在口邊，獲取身邊人的信任。「有需要時」，亦表現闊綽，一名幫陳英鳴打工的人透露，「佢對佢啲對象咪闊綽囉，但有次佢同班同事去南華會食飯，同事未知會佢就叫咗幾碟肉絲炒麵，佢嬲到話唔埋單呀！佢去貴價餐廳，好似去『尚興』食潮州菜，永遠唔會嗌螺片，淨係叫豬紅，最多叫埋鹵水鵝，佢事後同人傾話成日去尚興食飯！」陳英鳴一向重視派頭，過往曾多次向傳媒大晒其靚屋及靚車。即使現時好景不再，仍舊「住洋樓、養番狗（他家中有六隻狗仔）」，還有至少三架房車及多架電單車，車牌十分花巧，包括BACCARAT（百家樂）、AAAA1228、及其名字縮寫CYM；而他辦公室內更掛滿書畫。 天生撈金融 然而，翻查土地註冊處，其於九六年以五百二十多萬買入、現住的跑馬地肇輝臺銀輝大廈千五呎單位，於一○年已借入二按。去年十二月，陳英鳴更以低於市價、即一千六百多萬元放盤，惟至今仍未售出。當年出入Ball場、生活富貴的陳英鳴，向記者稱生活艱苦：「我呢十幾年都係捱，幾年前醉酒駕駛拒吹波仔，係我自己衰。今次我輸埋老婆啲錢，而家我成家人關係好差。」現時他的真面目被揭穿，他回應說：「個個覺得我坐過監，都乘機篤我啦。」記者問他會否正正經經打份工，他「哈哈」兩聲竊笑道：「吓，我仲有人請嗎？我天生係食金融呢行飯，我可以做咩呀？我實會翻身o架，我而家無本吖嘛，我會有辦法o架！」上週四，記者在其辦公室門外，見他跟一名與麥基年紀相近的老伯談股票。而一向愛好書畫的陳英鳴，近日透過他朋友莊建霆，成立了「中國書畫收藏投資財務有限公司」，讓人抵押名畫借貸，公司正準備申請放債人牌照，在金融界「大展拳腳」。 陳英鳴簡歷 57歲電子零件售貨員出身80年代開電子廠，並炒樓賺第一桶金。93年成立上億財務，做樓宇及工廠二按。95年成為仁濟醫院總理。96年收購上市公司銳鴻集團，改名上億國際，他出任主席。98年上億財務被發現收受非法存款。98年12月被判監6個月及破產，被指刑罰過輕，再加刑至2年5個月。00年出獄。04年因開車講手機及拒測酒精，被罰款及停牌2年。12年3月23日其灣仔英皇集團中心辦公室，大門及走廊遭淋紅油追債。13年1月被粵語長片影星麥基報警指行騙。 | ||||||
| ||||||
上期本刊報導「金融老蠱惑 息誘麥基」，話前上市公司主席陳英鳴，以高息吸咗粵語殘片影星麥基嘅錢無還。文章一出，警方即刻做嘢，上週四喺灣仔拘捕一名五十七歲陳姓男子。小宗即刻打去搵陳英鳴，佢電話已飛去call台。而麥基則話自己開心又矛盾：「佢要洗pat pat（小宗按：大前提係被判罪成兼坐監），其實我都好矛盾，咁我嗰六十萬仲收得番嗎？」佢話搵緊律師商討對策。原來陳英鳴過去一直信誓旦旦還錢，但麥基每次同佢傾，佢都態度輕佻咁話：「我有二、三千蚊，要唔要吖？」有次麥基喺銀行門口等佢「還住十萬」，點知陳英鳴來到話：「哎呀，我只籌到一萬咋！」仲話：「你態度唔好，我又唔還住喇！」麥基次次被激到扎扎跳；債仔惡過債主，又一例證。本週圖片 白花油王子年年都喺維園擺檔賣吓白花油，今年仲喺攤位賣個人專輯，睇吓王子，揸住咁cute嘅福仔，都一副「唧」極唔笑嘅樣，似乎唔係好滿意銷量噃。（嚴寶權攝） 本週對峙 日方大波挑釁 東瀛防護相小野寺五典透露，一月十九日下午中國054型導彈護衞艦「溫州號」以火控雷達瞄準日本 驅逐艦「大波號」，雖然未有開火，但事不尋常云云。 以「大波號」出迎「溫州號」，究竟邊個挑釁邊個先？ 即使開火，都唔怪得人嘅噃。 Give me a break平鑽充靚鑽 新年流流，最多春茗飯局，大家互相恭賀之餘，OL仲可以將身上嘅行頭，互相較勁，咁點樣可以平買靚鑽石？批發鑽石予Cartier、Dior、Tiffany的批發商LAZARE KAPLAN東南亞區董事兼副總裁李清輝，就教路話，同為最高級嘅D色，佢哋牌子嘅一卡價錢十八萬，零點九卡只九萬元，價錢差成倍！但肉眼點睇？佢自言做咗呢行幾十年，都分唔到。仲有，原來鑽石並非大粒淨色就叫靚，重點係夠閃。鑽石中D色為最貴，但揀到粒「cut得靚」嘅H色，望落分分鐘閃過同卡嘅D色，價錢又係平一截！要keep住鑽石夠閃，李清輝攞住隻五卡鑽戒話，用最普通的洗潔精加暖水浸，用牙刷擦吓啲罅，望落就閃閃令啦！ 金管局出重炮 金管局去年尾話Hibor報價機制無問題，轉頭就被境外監管機構「溫馨提示」，指UBS就Hibor報價可能涉及不當行為。被人笑係無牙老虎，金管局就喺呢個星期、RBS被指操控Libor有結果前做嘢，並引用《銀行業條例》，首次將業界制定的操守準則作為法定指引；違規者，「釘牌」都有之。而Hibor日常運作及監管亦由銀行公會交俾財資會，讓金管局成Hibor的新管理人，「搣銀公柴」。銀行界人士話，金管局過去買大行怕，尤其獅子號，不但係發鈔銀行，細行嘅P（最優惠利率）都唯佢馬首是瞻，影響力大。金管局不時要派班職員巡查銀行，獅子號例以「資料機密」為由，指明非阿head級數嚴禁內進。今鋪金管局揸緊《銀行業條例》呢碌「重炮」，對銀行同新成立嘅金發局來說，絕對係下馬威！ 樓市招「愈變愈辣」 市場一直流傳，政府會在上週五再出招打壓樓市，不過事實證明，流料歸於流料。咁究竟流言是如何形成的呢？前星期小宗從地產代理口中收到風，話政府有意效法星洲，對炒賣工廈徵稅。兩日後，facebook就傳出係對第二套住宅徵特別印花稅。再過多幾日，小宗收到whatsapp，話會加重買家印花稅、第三套房停造按揭、及第一季推一萬伙超長樓花期居屋等等，到上週五連改圖創作嘅假政府公告都出埋。呢單嘢，明顯係經紀想谷旺市之舉；但喺度奉勸行會成員，呢排別做物業買賣，免得政府突然出招，就步林奮強後塵矣。 金牙大狀講嘢練乙錚誹謗七百萬人 689出律師信指控練乙錚登喺《信報》篇鴻文誹謗佢。細閱全文，練教授其實係誹謗緊七百萬人。大家睇吓佢點講：堂堂一個香港特別行政長官候選人，得到「江氏紅」中聯辦的點頭去馬之後，是怎樣「斥之乞來」、「呼之不去」，怎樣誠惶誠恐，怎樣卑躬屈膝打哈哈擺和頭酒、最後得到黑道的百分百支持，神一樣替他撐住了比唐氏高的「民意」，讓當時的中聯辦領導得以「名正言順」抬他上位。各位，「民意」係乜呢？此又豈非七百萬人之意向乎？然而在練教授筆下，七百萬人原來並無陳寅恪所講「獨立之精神，自由之思想」，而是聽任黑道扯線擺布者，咁對七百萬人嚟講，又豈非絕大之侮辱？若然689要出律師信，都理應唔係以佢私人名義出，而係代表七百萬市民向練教授討回公道。不過，如果佢都識得咁做，佢又仲係689乎？ | ||||||