ZKIZ Archives


麥包為退休營商

1 : GS(14)@2016-03-02 15:16:54

麥長青(麥包)、范振鋒、李思欣及吳國敬,聯同向展邦等友人總投資7位數字在大坑開西餐廳,昨日舉行開幕剪綵儀式,曾淑雅(Jumbo)都有出席到賀。近來致力轉型經商的麥包稱,積極為退休生活作準備,並向地產界提供發展商場的計劃書。問他會否也向無綫或亞視提出發展計劃?麥包坦言:「佢哋眼中嘅我只係演員,公司有好多人才,做好本份已好強大。」同場的范振鋒和老婆李思欣目前經營了3間餐廳及一間鑽石公司,問到會否趁有新電視台開業而增加幕前演出?李思欣說:「我係自由身,可以試吓唔同工作,今年我哋都有搞合拍片,仲計劃6月去瓦努阿圖拍戲。」採訪、攝影:王連連





來源: http://hk.apple.nextmedia.com/entertainment/art/20160302/19512206
PermaLink: https://articles.zkiz.com/?id=296596

高層內鬥 成犧牲品 麥包遭封殺冇劇拍

1 : GS(14)@2016-08-22 02:59:33

2016-08-10 EW
無綫近年高層內鬥白熱化,隨着力捧「有線幫」、「亞視幫」,剷走不少台前幕後的「老臣子」,繼《東張西望》大換血,無得留低的○八年港姐亞軍陳倩揚,憤而留言「一朝天子一朝臣」。

整頓更擴大至戲劇組,在無綫廿九年的麥長青(麥包),今年初原先升正做新劇《親親我好媽》的男一,惜被視為是戲劇製作助理總經理曾勵珍的愛將,結果因權力鬥爭而被黃智賢補上,更傳出禁用麥包的封殺令,近半年也未有劇開。被投閒置散的他,只得全情投入自己的生意養活家人,天無絕人之路。

慘受牽連

無綫近年由台前幕後到高層都大洗牌,隨着副總經理杜之克及非戲劇製作助理總經理余詠珊極速上位後,兩位昔日由亞視到有線都拍住上,更帶契一眾「有線幫」及「亞視幫」過檔,拍劇集至綜藝節目乜都有份,曝光率奇高;相反無綫舊人則無得留低。如剛於上周約滿《東張》的主持陳倩揚,有傳得罪高層而遭封殺,不少劇集和綜藝節目監製均私下收到通知,不得錄用她,最後更被迫離巢。

權力鬥爭更擴散至戲劇組,本來一人獨大的戲劇製作助理總經理曾勵珍,因入主後的杜之克邀來其死敵舊將劉家豪及梅小青回巢,跟她平起平坐外,就連她旗下的新劇《親親我好媽》,原屬意由在無綫捱足近三十年的麥包擔正,但結果突然換角。

據知麥包因早前入組由曾勵珍揸旗的處境劇《愛?回家》擔正,又在新劇被力捧做男主角,即被劃分為「曾姐黨」,故成為打壓目標,現不但冇得做男一,而且拍完《愛》劇之後,眾監製私下收到指示不要錄用他,因此麥包一直沒有劇集接拍,無緣無故慘遭封殺。

親自打理

未有劇開的麥包,幸私下商機多多。自一○年憑《巾幗梟雄之義海豪情》中飾演賣國賊「梁飛凡」一角,勇奪無綫最佳男配角獎後,工作量大增,收入顯著增加。近年愈住愈豪,一家四口入住淺水灣豪宅外,去年底以近五百萬元掃入紅磡樓花,今年初又以八百萬購入荃灣工廈的全層天台,上月更榮升當澳門馬主,又搞飲食業,百足咁多爪。

日前他現身觀塘工廈,到有份投資的二手汽車代理公司打點,場內所賣的都是大品牌二手名車。他跟同事開會後,又親自落場驗車,十分忙碌。中午休息時,他又走到隔兩個街舖,幫老闆監工睇裝修,還跟裝修師傅研究裝潢,更用手機拍下現場進度。

年底約滿

向來顧家的他,忙完工作,便趕去灣仔會合兒子到電腦廣場行街。十四歲的細仔麥振瑋比五呎九吋高的老竇還要高,兩父子全程有商有量,買了電腦和手機用品便離開。

事後記者致電麥包問及近況,他直認近日忙搞生意︰「啲朋友見我近來發展唔如意,冇劇拍,知我要養家搵食,所以叫我幫手搞生意關照吓我!」雖然生意搵到錢,不過將於今年底約滿無綫的他,前景未卜,他甚為感慨:「傾過吓,藝人都係等機會。機會係公司畀你,佢唔要你,你都控制唔到。」

在電視圈多年的他,屢經挫折,被問及遭封殺之事?他無奈說︰「我都唔知點解會咁!我一直都係做好自己本份,我真係好鍾意演戲,好想繼續拍。(但之前你做男一被換?)做男一係每個演員夢寐以求嘅機會,嗰刻好開心,縱使一套玩完,都想做一次男主角。」

撰文、採訪 娛樂組 攝影 梁比利 設計 吳俊彪
PermaLink: https://articles.zkiz.com/?id=306793

麥包:純粹搞氣氛

1 : GS(14)@2016-12-07 08:01:00

■麥長青昨指《街市遊樂團》的拍檔在節目內外都是好朋友。互聯網圖片



顧紀筠囝囝陳浚霆(Andrew)在《街市遊樂團》被江美儀集集鬧,經常叫他「行開啦」、「你彈埋一邊」,不少網民戥他陰功。一齊做節目的麥長青(麥包)指四位主持在節目內外都是好朋友,可能是剪輯問題,他昨日在電話中說:「Andrew外國長大,真係連香蕉糕、光酥餅都唔識,佢係做下把位,有時美儀同阿滕(滕麗名)都會叫我『走啦,包!』純粹搞氣氛!」對於美儀在節目中說話疑踩低人,麥包說:「節目係想發揮香港人獅子山下精神,呢集我未睇,但我估計佢意思係畀佢就唔做嘞,但點解有人堅持做呢?所以我哋要感恩,因為每樣食材得嚟不易。」採訪:嵐山




來源: http://hk.apple.nextmedia.com/entertainment/art/20161207/19857170
PermaLink: https://articles.zkiz.com/?id=318620

呻娘家冇嘢做麥包撇無綫

1 : GS(14)@2016-12-18 11:04:23

■麥包在2010年憑梁非凡一角奪「最佳男配角」,但事業停滯不前,年初擔正做男主角卻撻Q。資料圖片



麥長青(麥包)曾經憑《巾幗梟雄之義海豪情》的警官梁非凡一角摘下台慶「最佳男配角獎」,但一直未能更上一層。今年初,麥包有望做男主角,又傳因高層角力,令他成犧牲品。



■麥包(左)透露與無綫改合作形式,明年還會拍《街市遊樂團》。劇照

■麥包當年因為欠稅及為醫父親,無奈接拍三級片《極度獸性》。劇照


「唔鍾意等人施捨」

麥包過去亦非一帆風順,96年傳欠稅局四萬幾元,又要籌錢醫老父,但在無綫月薪僅得九千元,無奈接拍三級片《極度獸性》。最近麥包決定離開無間斷服務二十九年的無綫,前日他在電話中直認受換角一事影響,他說:「我諗有少少,但唔關人哋事,係我自己嘅問題。之後都冇嘢做,我懷疑係咪自己唔得,我唔係好鍾意去乞求、等人施捨,或者要人哋可憐畀啲工作,可能我細個經歷寄人籬下,所以由細到大都好唔鍾意呢個感覺,唔想屋企人同自己再有呢啲經歷,我一直同自己講,要靠雙手去努力做嘢,令屋企人同自己有番個尊嚴,唔需要人施捨,亦唔想睇人面色做人,所以今年我好唔舒服同唔開心。」曾有傳麥包得罪余詠珊,麥包自爆有直問對方,他說:「佢話冇,大家少啲誤會,溝通咗係好舒服。」麥包自言離開不是傳聞中不開心,只是與無綫轉另一個形式合作,稍後會拍網劇及自己做監製和導演,感激家人一直支持自己。採訪:唐琛悠、王連連攝影:沈健程




來源: http://hk.apple.nextmedia.com/entertainment/art/20161218/19868786
PermaLink: https://articles.zkiz.com/?id=319481

麥包何寶生曾傳基情搵埋對方做伴郎

1 : GS(14)@2016-12-18 11:04:23

出道29年嘅麥包(麥長青),多年來緋聞並唔多,但有啲緋聞你就真係估佢唔到。麥包喺96年,拍攝大台劇《西遊記》時,就同同劇嘅劉玉翠傳出緋聞,當時就話佢哋成日撐枱腳,單獨約會咁。之後佢同陳彥行合作《茶是故鄉濃》,又傳出緋聞,當然呢啲都係煲水新聞,佢哋嘅感情只不過係兄妹之情。但最令人估唔到嘅係,麥包竟然同何寶生傳過「基情」,咁呢個都當然唔係真㗎啦,何寶生o依家都已經退出幕前,仲已經皈依佛祖、法號道生。而呢三個曾經同麥包傳聞嘅「戀人」,喺麥包結婚嘅時候,分別做伴娘同伴郎,呢個組合真係破天荒。麥包嘅真正另一半叫林孜,佢哋喺1998年拍拖,相戀一年後,即99年7月就結婚,同太太嘅妹妹同日結婚。當時有傳麥包同林孜係奉子成婚,之後麥包就否認,但係麥包嘅大女麥淳琳,喺佢哋婚後五個月就出世;三年後,二人再添一子麥振瑋。




來源: http://hk.apple.nextmedia.com/entertainment/art/20161218/19868890
PermaLink: https://articles.zkiz.com/?id=319482

月薪九千欠稅四萬麥包曾為醫老父拍三級片籌錢

1 : GS(14)@2016-12-18 11:04:24

「怪管家」、「矇查查」、「麥偵探」,都係90年代經典兒童節目《閃電傳真機》裏面嘅角色,呢啲角色都係由麥包扮演,鬼馬得意形象深入民心,之但係點解麥包哥哥當年要淪落到拍攝三級片呢!講出嚟你可能覺得好老土,但呢個又真係事實,咁究竟係咩原因呢?今年48歲嘅麥包,原名麥長青,87年參加無綫電視《超級新星大賽》,雖然落敗但都有加入大台,90年仲被安排到兒童節目《閃電傳真機》,同期嘅主持有譚玉瑛姐姐、黎芷珊姐姐同朱茵姐姐等。節目裏面,麥包經常要扮鬼扮馬,頗受小朋友歡迎。但96年,佢突然淪為三級片男星,接拍咗三級片《極度獸性》,戲中麥包仲要同女演員上演一幕火辣辣嘅床戲,認真該煨!事後麥包解釋:「唉!其實我欠政府啲稅,本來預咗筆錢㗎,點知老竇要入醫院做手術,咁咪唔夠錢囉。我已經分期付款還錢,不過我份人工都唔夠我每月還嘅數目。」據了解,當年麥包係欠稅局四萬幾蚊,以佢當時喺大台每月九千蚊嘅人工,咁有人開出咁有利嘅條件,話明佢唔使脫,所以咪接拍咗套戲囉!點知到拍攝時,電影公司就臨時加戲,咁麥包就無辜辜咁做咗三級片明星喇!




來源: http://hk.apple.nextmedia.com/entertainment/art/20161218/19868893
PermaLink: https://articles.zkiz.com/?id=319483

麥包後生似林峯非凡哥拎埋獎紅唔起

1 : GS(14)@2016-12-18 11:04:24

唔好睇麥包麥長青o依家咁大份,其實佢87年參加「超級新星大賽」時好靚仔,仲獲媽咪支拎咗過千買西裝(當時過千蚊可以係幾個月生活費!),呢個後生樣,仲成日俾人拎出嚟話似林峯!麥包同屆對手有林文龍、邵仲衡同梁珮玲咁,結果係超級新星做唔成,轉咗加入大台藝訓班,錯有錯着,結果同郭富城做咗同學。正式出道之後,麥包做咗幾年兒童節目,但收入唔多,仲要兼職搬家俬幫補家計,而睇劇嘅媽媽們,就要到96年佢演《西遊記》嘅沙憎先熟悉佢,再數落去,有印象嘅仲有《茶是故鄉濃》嘅阿牛,同埋喺《無頭》東宮入面鍾意陳妙瑛嘅馮樂人。麥包喺大台工作都有29年,拍過嘅劇最少都60套,當年博晒命,試過喺《為食大贏家》咬實活生生嘅田雞,過程核突嚇親唔少人,最後仲剪走埋冇得出街,作為回報,佢喺遊戲贏咗個價值兩萬三千蚊嘅金飯碗。而麥包最風光一刻,肯定就係由「麥包」變做「非凡哥」,喺《巾幗梟雄之義海豪情》同黎耀祥、鄧萃雯鬥氣兼鬥戲,仲拎埋10年嘅最佳男配角。不過原來拎獎,只係多咗份虛榮,佢喺12年接受《蘋果》訪問時話過,拎獎後工作冇增加,只係多咗個花名……真係多謝晒。




來源: http://hk.apple.nextmedia.com/entertainment/art/20161218/19868891
PermaLink: https://articles.zkiz.com/?id=319484

入行29年 首嘗男主角撻Q麥包撇無綫 唔想做鹹魚

1 : GS(14)@2016-12-25 13:18:59

■麥包因擔正男一劇集被飛而離開無綫,日前對住真麥包時自嘲:「以後我真係食自己啦!」攝影:陳順禎



【《蘋果》專訪】做人如果冇夢想,同條鹹魚有乜分別?在無綫默默耕耘29年一直做下把位的麥長青(麥包),本月中決定離開娘家向外闖,導火線除年初無綫高層權鬥令他首次擔正男一撻Q外,坐足一年冷板凳的麥包更揚言:「我唔想寄人籬下睇人面色,想有番自己尊嚴。既然我冇咗價值,我更加想離開。」麥包更笑言若繼續留低,自己分分鐘變成一條鹹魚。



現年49歲的麥包,加盟無綫29年以來一直當綠葉,儘管6年前憑《巾幗梟雄之義海豪情》演梁非凡奪得台慶頒獎禮最佳男配角,但未有令他登上青雲路。原本麥包本年初有機會在新劇《親親我好媽》初嘗男主角滋味,但盛傳無綫高層曾勵珍與杜之克權鬥,令珍姐愛將麥包成犧牲品,由《閃電傳真機》舊拍檔黃智賢頂上。失落男一不特止,昔日劇接劇的麥包,今年更離奇地全部劇集工作被停,難怪他心灰意冷離開。



■6年前麥包憑《巾幗梟雄之義海豪情》奪得最佳男配角,但未能令他走上青雲路。資料圖片

■無綫高層樂易玲(右)曾力挽麥包,余詠珊亦曾表示希望再跟麥包合作。資料圖片

■本由麥包做男一的劇集《親親我好媽》,結果由黃智賢(左)頂上。微博圖片

■今日是聖誕節,麥包擺出當年《閃電傳真機》(上圖)的甫士祝大家聖誕快樂。

「想有番尊嚴」

前日麥包接受本報專訪,對於離巢原因,他說:「我做中廚,學晒啲嘢,想再學西廚,但呢邊冇教,所以我想去出面學,就係咁簡單。我享受演戲過程,唔鍾意有壓力,或者睇人面色做嘢。因為我細個寄人籬下,肚餓都唔敢去食飯,因為我唔想見到嗰啲面孔,情願匿喺被竇捱到夜晚阿爸阿媽返嚟……我有過一段咁嘅歷史,所以希望出嚟做嘢之後,可以憑我雙手去搵到錢,唔需要再睇人面色,我想有番尊嚴。」麥包續說:「我以前以為肯做就人哋一定有嘢畀你做,但今年好奇怪,好似我要等人畀嘢我做,係咪我冇咗呢個能力?我嘅演技已經到咗一個樽頸位,喺呢度尋求唔到突破,所以半年前我已經要求離開,TVB一路挽留我,但我想做嘅嘢同公司未必配合到,所以我情願離開,亦好多謝公司肯體諒。我年紀唔細,如果再留喺度,再過多幾年我冇能力冇團火嘅時候,我真係條鹹魚,想走都走唔到。」


6年前最低潮

究竟離巢導火線是否失落男一?麥包坦言:「呢個唔係主要,但亦都係一個point。一直唔畀我好地地,但突然間話畀個機會你做,正如話你聽你升職,但突然冇得升……咁我點先?你有冇諗過我感受呀?呢個唔關公司事,公司成日都有換角,唔拍A嗰套咪拍B嗰套,但我冇咗就冇下一套,因為我未正式喺呢個位企定咗。」可知道被換角原因?麥包笑說:「呢個世界好多嘢冇答案,我心胸唔需要嘥個地方擺呢啲嘢。」昔日劇接劇的麥包今年劇集全面被停,可想過是自己得罪人?他說:「我唔知,呢個係上面安排。」歷年在無綫最低潮時期,麥包直指是6年前。他說:「2010年真係樽頸,工作各方面中咗自己陰影,係咪我唔做得嘢呢?點解要淪落到廿集我得幾場?睇住個劇本,覺得呢場戲可以咁,我同導演講,但佢話:『得㗎啦,唔使㗎啦,你過鏡,你咁得㗎啦,你做啦。』係咪我已經玩完?人哋咁態度對你,係咪我做錯嘢?點解咁對我?咁即係我喺人心目中冇價值,咁冇價值我就走啦。」同年麥包奪得男配後決定留低,以為仍有機會開拓一片天,可惜最終仍是失望,偏偏洪永城等沒經驗及沒演技者加盟短短幾年已升做男一,問麥包可感到不忿氣時,他說:「我覺得冇問題,每一個朝代轉最重要公司利益行先,我自己冇怨過。」採訪:戴彩煥




來源: http://hk.apple.nextmedia.com/entertainment/art/20161225/19876321
PermaLink: https://articles.zkiz.com/?id=320105

麥包教女發憤免被分級

1 : GS(14)@2016-12-25 13:18:59

■麥包一家感情好,女兒淳琳(左一)也心痛爸爸工作辛苦。資料圖片



麥包的長女淳琳現年17歲,三、四年前放暑假時曾陪麥包開工拍劇,親睹父親被欺壓。麥包說:「我個女試過喺公司停車場陪我瞓咗兩個禮拜,佢奇怪點解我要咁樣就人哋,譬如就人拍先,個女會問『點解唔係就你?』我話冇所謂,爸爸係小演員,咪就吓人哋。」



■麥包喜見囡囡陪他開工後有所得着,努力讀書。

麥包指囡囡曾問他可感不開心,他說:「我話冇辦法,搵食係咁,我講笑話如果你唔食飯唔讀書,咁咪可以簡單啲,你肯食粥唔食飯咪得囉。佢話『唔緊要爸爸,只要你開心,我食粥都得㗎。』佢唔想見到爸爸……未至於受氣,但分咗等級囉。」麥包叫女兒勤力讀書,免他日被人分等級,結果女兒之後發憤,學業成績由昔日中等變成頭十名,麥包說:「所以我反而多謝呢啲事件令佢明白。」




來源: http://hk.apple.nextmedia.com/entertainment/art/20161225/19876325
PermaLink: https://articles.zkiz.com/?id=320106

娥姐驚訝麥包離巢

1 : GS(14)@2016-12-28 08:12:23

商天娥昨日在工展會出席活動,為兩個代言的產品宣傳,母親和老公也有到場。最近麥長青(麥包)對無綫心灰離巢,娥姐感驚訝反問:「係咩?係咪轉部頭?佢係咪講吓,佢咁鍾意講嘢又鍾意做戲。」一直有指余詠珊當道,無綫一直力捧出身有線的演員,娥姐說:「親生仔女重要啲係要捧吓,我哋旁邊用得着就用。」對於原是親生仔女的演員現在變成孤兒,多年來一直效力無綫的娥姐說:「唔知,我大個出去行吓,有時照顧啲細嘅唔好忘記大嗰啲。」另外,近年沒有拍劇的娥姐,笑言不知觀眾會否忘記自己,待有適合的劇本會再考慮,她亦想製作舞台劇過戲癮。採訪:王連連攝影:葉君海




來源: http://hk.apple.nextmedia.com/entertainment/art/20161228/19878664
PermaLink: https://articles.zkiz.com/?id=320353

Next Page

ZKIZ Archives @ 2019