「阿珂」梁小冰捧劉玉翠場廿年前《鹿鼎記》絕密照曝光
1 :
GS(14)@2017-02-06 07:28:02陳少霞98年喺陳小春主演嗰套大台劇《鹿鼎記》演「雙兒」，呢一班韋小寶老婆仔老友鬼鬼，月前佢哋相約敍舊，日前「建寧公主」劉玉翠仲為朱咪咪紅館個唱擔任表演嘉賓，而陳少霞都有約埋「阿珂」梁小冰同「神龍教教主夫人」馮曉文捧場，小冰就將啲相放上facebook，三個人完騷後仲入後台搵阿翠大合照同送花，認真老友。小冰前日透過WhatsApp回應《蘋果》，話之前一晚由秘道入場，小冰仲俾咗幾張《鹿鼎記》嘅相《蘋果》，佢仲喺短訊話：「《鹿鼎記》20年前絕秘照片第一次大公開，那是1997年11月拍攝的40集金庸小說改編電視劇。當年大家20出頭，未埋位的時候就打架！轉個頭又攬頭攬頸親親熱熱，友情就係由打打鬧鬧培育番嚟嘅。唔信？有圖為證！」呢班姊妹有幾情深，小冰繼續話：「你睇『建寧公主』劉玉翠真係刁蠻任性㗎！『阿珂』都欺負！『蘇荃』馮曉文真係好美艷，而『方怡』徐濠縈就成日織長長的冷頸巾俾……」雖然小冰唔講落去，但都應該估到係當年同阿徐拍緊拖嘅陳奕迅啦。
來源:
http://hk.apple.nextmedia.com/entertainment/art/20170206/19919512