千語BB響應旺角鳩嗚
1 :
GS(14)@2014-12-01 22:22:03
■吳千語前晚在旺角出席新戲首映，笑言會買汽水爆谷響應鳩嗚。
吳千語、林德信（Alex）、盛君及黃玉郎等，前晚在旺角出席新戲《青春鬥》首映，旺角佔領區因清場爆發衝突，不過特首梁振英就呼籲市民出旺角「鳩嗚」，千語BB一於響應，她笑說：「我喺度（戲院）買汽水爆谷算唔算呀？」他們前往旺角時亦早做好準備，千語說：「因為驚塞車，預早個幾鐘到。」Alex則說：「自己揸車經過油麻地，嚟嗰時冇事，架車泊咗喺停車場，如果晏啲走時多人，會坐港鐵。」
■林德信與吳千語（左）及盛君大耍花槍，未知會否怕女友松岡呷醋。
Alex戲中角色造型誇張惹笑，他說：「好多朋友睇完個造型，都叫我keep住，因為個頭好似頭盔咁。」問到女友松岡李那有何評價？Alex避忌說：「好多人睇咗海報都唔認得我。」採訪、攝影：藍文浩
來源:
http://hk.apple.nextmedia.com/entertainment/art/20141201/18953322
鳩嗚乜乜乜：fb有難 八方抽水
1 :
GS(14)@2015-01-28 19:09:08
號稱有超過13億用戶嘅社交平台facebook，噚日癱瘓近一小時，Instagram都死埋，「民不聊生」，一眾網民可能咁啱食緊飯、去緊旅行，竟然唔可以即時上facebook分享，幾咁大件事呀！另一平台Twitter就相安無事，多個品牌就乘機出文出圖瘋狂抽水，趁機宣傳。可口可樂就打友情牌，話人生有起有跌，大家一起度過，仲配咗張印有facebook同Instagram字嘅罐㖭（圖）；Red Bull相關品牌賬戶就話為facebook「加油」，請佢飲杯能量飲品；另有啤酒商就話大家不妨趁機會找個朋友，攞杯啤酒聚一聚，唔好掛住做低頭族。上述都算係靚抽，但有時抽水可能隨時抽到電油，例如PUMA，不解釋。費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150128/19019444
鳩嗚乜乜乜：撈麵碗湯點樣食？
1 :
GS(14)@2015-02-24 23:33:40
撈麵，都會奉上一細碗湯（圖）。呢碗湯，成為同事之間嘅新春話題。「每夾一啖麵，都要浸一浸啲湯」、「唔係，將啲湯淋落去啲麵度，冇咁乾吖嘛」，同事阿川同大家七嘴八舌，呢個時候，好鍾意食嘢嘅Carmen好肯肯定咁講，「一乾三濕囉，咁都唔識」？大家立即Google乜嘢係一乾三濕，之後一齊扮麒麟撞佢。（大家自己Google吓就知佢同某人一樣，惡果係自招嘅。）
#食家：免食客鯁親
呢個時候，又係要費清請教專家。食家劉健威話，理由好簡單，碗湯係畀食客唔使鯁親嘅，因為撈麵比較乾，食多幾啖，就好易鯁親，所以飲啖湯潤番吓。佢又話，如果直接倒啲湯落撈麵，或者放啲麵喺湯，「咁仲使乜食撈麵箒」，而且啲麵好易變腍，啲人食撈麵都係鍾意啲麵硬身啲，彈牙啲。佢仲話，講究嘅人連食湯麵，都唔鍾意啲麵太腍，好似以前雲吞麵叫細蓉，因為細細碗，湯少啲，啲麵冇咁易腍。其實，碗麵係你嘅，你鍾意點食都得。如果你願意，你都可以相信網上嘅利瑪竇版、袁崇煥版、馬拉版解釋，但千奇唔好信一乾三濕，一切後果，費清絕不負責。
費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150224/19053070
鳩嗚乜乜乜：賓客反擊 出擺酒溫馨提示
1 :
GS(14)@2015-03-05 08:49:39
近日網絡流傳一位準新娘畀婚宴賓客嘅短訊溫馨提示，詳細列明「2015年人情公價係$600」，呼籲親友「避免少於公價」。收到短訊嘅網友話同新娘其實唔熟，但新娘講明係分開兩張請帖畀網民同佢女友，所以人情要「雙份」。網上鬧爆新娘勁cheap。公司議論紛紛，因同事黃老闆快將小登科。大家話賓客都應該整番篇「擺酒溫馨提示」。明明姐劈頭話，「唔該準時開席，餓到肚痛，成十一點幾先走得！」女版成龍就「好心」提醒新人唔好嘥時間諗回禮禮物，「送個有你哋兩個樣嘅公仔畀我，唔知點處理」。咁又係，萬一唔小心整爛就大吉利是。佢哋又話張帖唔使夾埋新人2R結婚照，散席時都唔使送上相片，「上網睇得㗎喇，環保吖嘛」。真係環保咁偉大？費清好懷疑囉。
#酒樓公價六百元
婚禮顧問歐惠芳話，酒樓人情最新公價六百元，酒店八百元，但佢話人情係視乎交情；收到喜帖唔出席一般都會畀三百至五百元。不過如果不幸收到新人咁無禮嘅溫馨提示，佢話如果其實同新人唔熟大可以「人唔到禮唔到」。大家討論得興高采烈，做開調查新聞嘅黃老闆，行事一向神神秘秘，只係似懂非懂咁笑咗一笑。其實大家都係講笑箒，去飲係贈興唔係交易，唔使明買明賣嘅。
費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150305/19064126
鳩嗚乜乜乜：TVB播武媚娘CG封胸
1 :
GS(14)@2015-03-27 00:55:24
「只准州官荒淫，不准百姓睇波」嘅內地劇《武媚娘傳奇》，可以話係「自由開放」嘅指標。估唔到《武》喺本港播，同封建嘅內地一樣被封胸，反而台灣就誓言絲毫不剪，為廣大觀眾福祉着想。本地大婆台毫無新意，又靠外購劇搶收視，可惜買番嚟即將播放嘅《武》，都係唔准百姓睇波。雖然唔似內地咁剪成大頭娃娃，但就用CG後期製作幫咁多位低胸女星「着衫」，喺胸口加塊薄紗。聽講話好高科技喎，塊紗真嘅一樣。真係多謝晒囉，咁使唔使報名參加奧斯卡最佳特技獎吖？
#台稱絲毫不剪
台灣就唔同，中視和中天確定3月30日播出《武》，仲強調係「絲毫不剪、完全呈現」。係咪全見版要到時先知，但費清喺中視宣告片，睇到國際范「忠於史實」嘅低胸裝確係「重出生天」，包括娘娘出浴嘅top shot（圖），仲有熟女版武則天啲霸氣女皇谷胸裝。不過，據講發行商唔准播足本，台灣係咪可以企硬要拭目以待。香港觀眾咪冇眼福？其實喺網上，都有一啲收睇台灣電視嘅網址，但費清絕對唔建議大家咁做，因為可能涉及版權問題。唉，唔怪得越來越多港人要移民台灣啦。費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150326/19090411
鳩嗚乜乜乜：澳門麥記蝦堡餐貴$6.3
1 :
GS(14)@2015-04-10 08:40:31周末心郁郁想過大海玩吓，不過澳門生活指數越嚟越高，連船飛一個人使費閒閒哋過千。費清好多馬交friends呻到樹葉都落。最近，連麥記都「蝦」馬交friends，新產品蝦堡餐喺澳門賣貴過香港$6.3。麥當勞新出嘅「菠蘿滋味蝦堡」同「滋味蝦堡」，香港澳門同步發售。不過，澳門《愛瞞日報》facebook專頁話，澳門菠蘿滋味蝦堡套餐賣澳門幣$34.3，比香港賣港幣$28貴近港幣$6.3（按1港幣兌1.03澳門幣計算，圖），同一個價錢，喺香港足夠買多一個蘋果批。
＃連廿蚊餐都冇
而家香港麥當勞仲有3款$22套餐，但《愛瞞日報》話澳門早已取消所謂「廿蚊餐／廿幾蚊」優惠，「澳門食嘢要搵平嘅真係越嚟越難」。唔少澳門網民喺fb留言，羨慕港人有「22蚊餐」優惠，感嘆當地消費指數越來越高。資料顯示，澳門人嘅入息中位數約澳門幣$13,300，港府早前公佈去年5月至6月本港僱員入息中位數每月為港幣$14,800。
費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150410/19107337
鳩嗚乜乜乜：多啦A夢精品送到家
1 :
GS(14)@2015-04-28 01:55:43■時間布冷氣氈印有多啦A夢同老鼠大戰故事，售$280。
自從叮噹改咗名叫多啦A夢，惘然若失，好似隔籬屋由細玩到大嘅陳大文，改個法文名叫Pierre咁。不過，費清最近發覺有個多啦A夢網購站，叫做「DING DONG宅配便 X多啦A夢」，唔通大師兄返咗嚟？叮噹重出江湖？
#今日起接受預訂
非也，網站負責人SK話，個網站嘅名係讀叮「檔」，「大牌檔個檔，即係撳門鐘嘅聲，叮檔」。（吓？）佢話呢個網購站開業頭炮，搵嚟多啦A夢合推精品，由於係實驗階段，所以產品各限量發售1,000件，包括3款情景圖案印花瓷碟（一隻$160，一套$400）、造型匙叉套裝（$150）、時間布冷氣氈（$280）。時間布前後兩面印上以多啦A夢同老鼠大戰嘅故事；瓷碟印有空氣炮、受老鼠驚嚇時逃跑情景及百寶袋圖案。購物滿500元免費送貨，多啦A夢唔會嚟「撳鐘仔」送貨，但就會有一個多啦A夢宅配便收納盒。所有貨品今日起早上11時正式喺網頁
www.dingdongtakuhaibin.com接受預訂。藤子·F·不二雄遺願「希望亞洲地區統一改以日本音譯」，90年代尾台灣、香港等陸續正名，好多細路仔淨係知道多啦A夢，叮噹將成為熟男熟女嘅回憶。（唔好以為費清真係會信咩叮「檔」先得㗎，SK擺明係熟男啦。）費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150427/19126949
鳩嗚乜乜乜：凶宅是基督徒之選？
1 :
GS(14)@2015-05-04 13:50:1713萬人瘋狂入表搶購新居屋、為咗有瓦遮頭連廁所劏房都搶住租，甚至連荃灣一個400幾萬嘅單位，地產經紀都可以叫做「窮人恩物」，就知香港樓價有幾癲！近日再有地產經理出招，新港城一個實用面積338平方呎嘅單位，賣成420萬，但地產代理喺銷售單張大大隻字話「筍」，仲有一句說話好特別，講明係「基督徒之選」。費清呢啲買唔起樓嘅蟻民，見到有人話420萬都叫筍，好自卑。不過點解層樓係基督徒之選？唔通業主係虔誠基督徒，教友買樓有折扣？費清梗係拿拿臨問吓個地產經紀，地產經紀就話個單位係新港城G座一個中層兩房單位，租客啱啱搬走，仲好坦白話係凶宅，因為之前有租客喺呢嗰單位跳樓身亡。聽到呢度，大家明晒啦！費清仲聽聞，業主唔想將單位出租，想快啲甩手，所以平市價少少放售喎！不過，睇番同屋苑樓價，實用面積平均呎價要12,741蚊，呢個凶宅單位呎價都要12,426蚊，真係好平囉。若要上車，大家可以考慮吓，老土啲講句「平生不作虧心事，半夜敲門也不驚」，人不犯我，我不犯人，就鬼都唔怕啦！費清＃要生計，也要生活＃毋忘初衷
來源:
http://hk.apple.nextmedia.com/news/art/20150504/19135029
鳩嗚乜乜乜：香港有屋無人住
1 :
GS(14)@2015-05-12 23:00:03呢排私樓癲價無極限，政府成日話香港地少人多，住宅供應少樓價自然貴，呢啲說法費清由細聽到大。偏偏有網民喺fb開咗個「吉宅名捕」群組，專門搜羅「空宅」（圖）。費清發現香港地唔單止好多人冇屋住，同時亦有好多屋冇人住。
#政府未反映實況
呢個群組噚日先至開張，已經野生捕獲咗好多空置樓。呢啲空宅並唔係「凶」宅，部份係發展商收樓後丟空。例如10年前已經開始收樓嘅西環大廈、炮台山木星街舊樓群等等。最詭異嘅莫過於新界東北20幾幢3層高「鬼屋」，起好丟空近10年，唔知道仲以為係大陸啲爛尾樓。費清問過群組發起人Camille，佢話政府統計全港私樓空置率只係得4.1%，所以政府認為唔駛討論點處理空置房屋。不過佢話政府只係巡查全港3%私樓單位去計算空置率，近年仲要冇巡村屋，所以呢個數未必反映到實況。加上唔少人平時又發現有好多空置單位，於是搞呢個群組，呼籲一眾網民幫手影低長期冇人住嘅私樓，一齊解構吓空宅之謎。
費清 ＃要生計，也要生活＃毋忘初衷
來源:
http://hk.apple.nextmedia.com/news/art/20150512/19144689
Next Page