HIBOR 淡靜咗好一段日子,甚至有啲人供樓為慳息,故意選擇同 HIBOR 掛鈎,而唔係銀行最優惠利率。只不過,似乎 HIBOR 近日走勢隨時會一波勁過一浪,做咗 HIBOR 掛鈎按揭嘅人,隨時要勁食驚風散。
本來美國有加息趨勢,香港 HIBOR 都要升,但一般係跟隨 LIBOR 緩升,而唔會發狂咁半個月升成厘,仲快過美國加息速度,或美金 LIBOR 波幅,因為聯繫匯率會引發一連串套利活動,令 HIBOR 同 LIBOR 波幅相若。但大家都知,依家SHIBOR係咁升無停過,大陸缺水,咪嚟香港撲水,再加上好多大陸人嚟搶港紙,當美金替代品咁用,結果不單只 CNY HIBOR 升到黐曬線,就連港紙嘅 HIBOR 一樣會狂升,因為香港銀行體系啲水被抽走,咁銀行咪要嗌高價搶錢。
中美係咁鬥扯水,HIBOR係有排升,升得快過美國加息係正常。依家用緊 HIBOR 供樓,或者借錢嘅人或公司,不如早啲諗下點自救好過,因為兩強鬥扯,香港呢啲細地方,受遭殃喎。