【add時尚】問准父親馬時亨做老師馬露明教小朋友發夢
1 :
GS(14)@2017-06-10 12:56:01■馬露明不時會帶小朋友參與課外活動。
港鐵主席馬時亨的女兒馬露明（Christine）醉心教育，實現了兒時夢想做老師，現正繼續追尋推崇品格教育的新目標。教育工作艱巨，馬露明亦自言並不風光，面對香港「倒模」教育制度愛之深責之切，近日她將自己的教育故事拍成微電影，希望小朋友在成長過程中，抱有追夢之心。採訪：梁錦雯攝影：林德雄馬時亨大女馬露明在港成立名為JEMS的教育中心已八年，推崇的不是時下家長熱捧的中英數、音樂等「求分數」學術課程，而是培育小朋友品格教育，如同理心、自信、責任心等正向心理學元素。「我的志願」課題在馬露明不同年代閃過不同答案，當中有芭蕾舞員、時裝設計師、婚宴籌劃等，到最後就回歸八歲時的夢想做老師，到近日成立的品格教育基金，都是與教育息息相關。
■馬露明的教育中心去年擴展，牆上掛上寫了品格元素的畫。
■除了教小朋友品格教育，馬露明的學校會灌輸要幫助社會有需要人士的訊息。
「最緊要有心」
馬露明大學時讀經濟，碩士進修教育，暑期工做過律師樓、銀行，但教書的一團火最為熾熱，她日前受訪時說：「我記得最後個暑期工，我做咗兩份工，喺幼稚園同小學做，係辛苦過我喺銀行做N咁多倍，帶小朋友去廁所，攰好多辛苦好多，但滿足感亦大N咁多倍。我記得同爹哋講想做教育，係戰戰兢兢，佢答『行行出狀元，最緊要你有心去做。』」馬露明的教育故事，早前被「夢者舞台」D Stage拍成微電影放上facebook，回憶小時候獲老師鼓勵要有自信追夢，亦有她一個學生的真實個案令她感觸，「個小朋友上堂時好開心話想做忍者捉壞人，但當寫喺工作紙時改寫做醫生，因唔想父母唔開心，嗰刻我眼濕濕想喊，我忍住，我覺得最痛心唔係佢爹哋媽咪要佢做醫生，最痛心係佢爹哋媽咪唔畀佢發夢，好多時我同家長講，要鼓勵佢哋去發夢，係畀到自信同身邊愛你嘅人支持。」對於香港教育，馬露明慨嘆太「倒模」，亦明白教育系統的難處，「我哋睇嘢窄，我哋小朋友睇嘅嘢更加窄，呢個世界變得太快，十幾年後仲有乜嘢工畀我哋小朋友，十幾年前會知道facebook、google係人哋最想做嘅工，但十幾年後邊個知道？」
■微電影中，小時的馬露明自覺沒有長處，得外籍老師鼓勵啟蒙她立志成為老師。
■小朋友不想父母不開心，隱瞞想做忍者是真實故事。
家長學培養
香港教育制度議論聲音多，教師、家長及學生各有壓力，甚至衍生「贏在起跑線」、「贏在射精前」等思維，馬露明認為正面來看，源於家長緊張及痛錫小朋友，但她希望家長思考及看遠一點，「好多時家長淨係諗入邊間幼稚園、小學，猛咁追，身邊嘅人都係同一個諗法，壓力又擺番落個小朋友度。你想個小朋友三十年後係點？想佢開心、想佢成功，成功定義係乜？賺到好多錢係成功？有自我價值係成功？我哋要了解每個小朋友都係獨特，要睇吓點培養，令到佢哋做到最好就更加重要。」
■馬時亨支持女兒推廣品格教育，為她所搞的香港品格日活動做大使。
■馬時亨一家早年移民，馬露明（後排右二）在倫敦Glendower Preparatory School接受小學教育。
■馬露明的醫生夫婿劉仲恒同樣熱心公益，他是願望成真基金會主席。
曾迷惘質疑
馬露明自小得父母教育，學業只要盡力以赴，不是求成績，父母更注重是品格教育培養，「媽咪好注重同理心，係明白人哋感受，我記得細個嗰時，爹哋媽咪會帶我哋出去食飯，佢會同我講食飯嗰時唔好走嚟走去，你喺隔籬走嚟走去，會好騷擾佢哋。」父親馬時亨的待人接物更是身教，「由細到大我都睇到，佢點對朋友、公事上嘅朋友，公司大樓開門嘅人、的士司機、學生、老人家都係咁關心佢哋，唔會係講一套做一套。」雖認定為終身事業，但馬露明亦曾遇過猶豫：「做呢樣嘢唔係為咗風光，唔係為咗金錢，係為咗點樣去幫人，生命影響生命。我踏出嚟做教育嗰時有少少介懷，見到身邊啲朋友，做profession嘅嘢，我會有少少質疑自己嘅決定，定係我好幼稚去揀呢？」
更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20170607/20046809