ZKIZ Archives


闊別5年紅館再開嘉年華學友返主場:腳都震埋

1 : GS(14)@2016-12-07 07:41:10

■學友的23場香港站巡唱前晚假紅館開鑼,返到主場的他大唱經典廣東歌,跟舞蹈員載歌載舞,氣氛high爆。



現年55歲的歌神張學友闊別紅館5年,前晚再踏足自己的主場香港開騷,為23場的跨年演唱會揭開序幕,寶刀未老的學友狀態大好,唱出多首經典廣東歌,勾起全場觀眾集體回憶,縱橫樂壇32年的他揚言不能丟架,高呼:「終於返到嚟我主場,腳都震!」



張學友於6年前舉行「張學友1/2世紀世界巡迴演唱會」,橫跨兩年唱足146場,創下12個月內觀眾總數超過204萬人次,打破健力士世界紀錄大全。相隔5年,學友前晚再踏主場香港舉行「A CLASSIC TOUR學友.經典世界巡迴演唱會」,之前公開售票火速沽清,一票難求,門票更被炒貴8倍賣8,874元。



■學友花盡心思製作個唱,連舞台設計都參與構思,煙花效果目不暇給。

■學友演唱會加入嘉年華元素,一班小丑圍着他出場。

■55歲的學友寶刀未老,唱足三粒鐘才完騷。


大合唱High爆

學友前晚一口氣唱出多首廣東hit歌,他說:「大家好嘛,終於返到嚟我主場!歡迎嚟到經典之旅,之前唱幾多場都好,返到嚟腳都震!唔可以喺鄉親父老面前失威,有啲係外來人,我失威嘅,丟你哋架都唔開心,我會畀心機!」接着學友解釋甚麼叫經典演唱會,笑說:「有你哋喺度,已經係經典。朋友話唱多啲經典歌,但我計過有6、70首,唱到聽朝,雖然我知你哋想,但我50幾歲,體力頂唔順喇!」多年沒開四面台個唱的他,興奮跟觀眾打招呼:「山頂嘅朋友你哋好嘛!廿幾年冇講過喇!」55歲的學友全晚又唱又跳,唱《頭髮亂了》時風騷扭腰,唱《祝褔》時更化身鬥牛勇士舞白布,從後擁着女dancer,到演繹《忘記他》時,眾女dancer着火紅deep V襯黑絲性感伴舞,encore時學友唱出連串金曲,觀眾大合唱令紅館變K場,氣氛high爆。



■返香港開騷的學友,笑言在主場腳震,一定盡力演出,不可以丟架。

■學友受訪時表示前晚演出給自己80分。

■已為人父的學友,與女舞蹈員跳舞都是點到即止。

逼羅美薇睇騷

完騷後學友接受訪問,對於開心返主場開騷,他說:「明顯講嘢時大家反應多啲,都感動嘅。如果喺內地唱國語歌,觀眾就會跟住唱,喺香港就相反。」他給自己演出80分:「自己有啲緊張,因為之前做咗十幾場,就算有啲緊張、甩漏都OK嘅,有啲細微嘅位要執吓。」至於今次騷換了多套戰衣,目不暇給,他說:「個台好靚,其實係我諗嘅。」問到製作費用了多少錢?學友說:「成個tour好長,會成個台搬去,真係唔知幾多錢。多好謝主辦單位放晒手畀我去做,所有我講嘅嘢,除非技術上做唔到,其他嘢都做到晒。」記者笑問製作費巨大,是否要減歌酬?學友笑說:「冇,係多過之前,多好多㗎。」屋企人有否捧場?學友說:「媽咪嚟咗,小朋友因為要返學就冇嚟。」老婆羅美薇呢?他笑說:「佢都會嚟睇,當然係我逼佢嚟睇啦。」採訪:王連連攝影:陳順禎、葉君海



演唱會曲目

1.《我與你》2.《非常夏日》3.《今晚要盡情》4.《慢慢》5.《離人》6.《這麼近(那麼遠)》7.《怎麼捨得你》8.《愛火花》9.《忘記他》10.《我真的受傷了》11.《頭髮亂了》12.《和好不如初》13.《時間有淚》14.《寂寞的男人》15.《野貓之戀》16.《餓狼傳說》17.《如果這都不算愛》18.《我醒著做夢》19.《不經不覺》20.《春風秋雨》21.《妳的名字我的姓氏》22.《愛是之恆》23.《祝褔》



Encore(Medley):24.《用餘生去愛》25.《給朋友》26.《心如刀割》27.《離開以後》28.《一千個傷心的理由》29.《只想一生跟你走》30.《我等到花兒也謝了》31.《吻別》32.《每天愛你多一些》33.《李香蘭》34.《Amour》35.《情已逝》36.《如果.愛》




來源: http://hk.apple.nextmedia.com/entertainment/art/20161206/19856155
PermaLink: https://articles.zkiz.com/?id=318503

Next Page

ZKIZ Archives @ 2019