瞀里係「老餅潮語」補習天王林溢欣：Out晒喇！
1 :
GS(14)@2016-08-19 06:55:51近期蘇絲黃「荗里」「瞀里」言論辣着晒全城火頭，個個話佢唔尊重港隊運動員，乒乓球代表黃鎮廷仲俾佢話係「瞀里」同衣着「呢啡」，認真口沒遮攔！講真吖，「瞀里」呢啲俚語經已係過去式，現代人都唔會再講；今次我哋請嚟補習界天王林溢欣講解一吓，今時今日唔講「瞀里」會用咩代替。藝文青創辦人林溢欣喺教育界非常出名，試過俾其他公司用年薪8,500萬挖角，但最後佢都拒絕過檔。身為中文科導師嘅林sir，佢話「瞀里」呢啲俚語好out，冇乜現代人會講。「呢代年青人好少講瞀里，佢哋多數會用數字嚟形容，例如用7、9再配合一啲字。」明嘅，後生一代可能會直接啲講粗口話人，點會仲用「瞀里」咁老套？林sir仲話，三唔識七嘅人先會用「瞀里」形容，熟啲嘅朋友多數嗌「死仔」、「死仔包」！講到「呢啡」，林sir就狂撐港隊黃鎮廷：「唔會話運會員『呢啡』，我會話佢哋好熱情、好忘我，係咪所謂100分嘅香港精神。運動員唔一定要西裝骨骨，甚至一定要扣晒衫鈕嘅。踢波嗰啲，初頭都係將件衫攝入褲入面，踢踢吓啲衫都飛晒出嚟啦！」
來源:
http://hk.apple.nextmedia.com/entertainment/art/20160819/19741647