ZKIZ Archives


偷食男李潤庭繼續被放假朱智賢曾致電問候

1 : GS(14)@2017-01-05 08:07:15

因為背妻偷食偷出禍嘅李潤庭,現時手上嘅工作全面被大台暫停,所以昨日佢有份主持嘅節目《觸得到的故宮》舉行宣傳活動,都唔見佢蹤影,只有陳智燊、陳貝兒同朱智賢等出席。朱智賢曾經同李潤庭去北京主持節目,話當日同李潤庭去北京拍咗5日外景,問到事後冇聯絡過?朱智賢就話當日報道出咗街都好愕然,事後只係朋友式關心咁問候咗幾句,唔想騷擾佢太多,仲話冇問過佢幾時復工,費事好似好八卦。啱啱喺香港擺完酒嘅陳智燊,佢話本來有份去北京拍節目外景,不過佢話嗰陣因為檔期問題去唔到,亦唔知道李潤庭主持嗰部份有冇被刪剪。監製張嘉玲就話冇刻意刪走李潤庭嘅主持片段,亦唔擔心佢嘅形象會影響節目。




來源: http://hk.apple.nextmedia.com/entertainment/art/20170104/19885373
PermaLink: https://articles.zkiz.com/?id=321368

偷食男得個吉車震梁榮忠珠峰洗底 周永恆自稱人渣

1 : GS(14)@2017-06-22 07:42:30

電影《志明與春嬌》名句:「成世人流流長,總會愛上幾個人渣。」就好似自然定律一樣,喺圈中,每隔一段時間,就會浮出幾個背妻或女友偷食嘅人種出嚟。數一數,倪震孔雀開屏酒吧啜爆大陸女學生張茆,再有導演彭順斷正喺商場同o靚模Liddy(李悅彤)咀嘴調情。以上人種嘅共通點,都係偷食,而更加重要嘅,偷食完都竟然得到正印或另一半原諒。之不過,未必個個咁好彩,偷食完,都可以當粉筆紙?咗去當冇事發生。梁榮忠05年時,梁榮忠背住拍拖8年嘅鍾麗淇,偷食朱慧敏,更爆出車震事件。被傳媒稱為「世紀賤男」,事後遭鍾麗淇斬纜。07年,梁榮忠得志雲大師安排拍攝真人騷《勇闖玉珠峰》,一心洗底。近幾年又埋頭苦讀,完成戲劇藝術碩士學位,早年再修畢中大藝術行政管理碩士。可惜世紀賤男招牌跟一世,想喺電視入屋唔再有佢份,惟有讀多幾張「沙紙」責袋,同時轉型做幕後搞話劇,匿埋電台開咪。(新聞連結:http://bit.ly/2shBq2V)吳浩康02年入行嘅吳浩康(Deep),由於聲底夠厚,當年被指係Eason陳奕迅接班人,兩年內出過兩隻EP,本應前途無可限量,可惜佢喺2004年,警方一次掃毒行動中,被搜出銀包內有一點二克可卡因,事業應聲而下。事業難翻身,不過把口o浪過油嘅吳浩康,歷年情史一籮籮,幾乎兩年換一次女友。13年吳浩康同鍾舒漫拍拖,二人仲去到談婚論嫁地步,但吳浩康被影到同o靚模Yvette Chow拖手喺街頭互啜。慘被背叛嘅鍾舒漫,最終取消埋婚禮。周永恒自稱「人渣」嘅周永恒,出道至今負面新聞不絕,10年同趙頌茹(阿Yu)奉子成婚,不過3年前阿Yu報警指遭周永恒打傷,同時周永恒背妻偷食公司拍檔劉依靜(Ruby),二人更有多張淫照流出。阿Yu最終單方面結束4年婚姻,獨自撫養一對女兒。




來源: http://hk.apple.nextmedia.com/entertainment/art/20170621/20063722
PermaLink: https://articles.zkiz.com/?id=336215

Next Page

ZKIZ Archives @ 2019