ZKIZ Archives


收料炒股 周顯:預咗俾人過一戙

2014-01-23  NM
 
 

 

周顯,要怎樣界定他身份?他在《新報》寫社論,在《蘋果日報》、《am730》、《明報》、《東周刊》等報刊講股票、寫財經,出過書講梁振英,但又會爆富豪秘聞。私人事他不多談,只知讀過中大新聞系,但無畢業。三年前寫了武俠小說《碳六十之劍》,講述一個基佬和一個太監一同練功的「愛情故事」。小說被倪匡讚極好看,一炮而紅;他的意念來自:「閹咗嘅雞會大隻啲,咁閹咗嘅人都應該會好打啲!」但他最廣為人知的,還是炒股。去年在《爽報》的投資比賽「爽組合」勝出,贏走九十萬元;他寫的那本《炒股密碼》,由○七年至今,已第十一度再版,最新版本叫「白金完全珍藏版」。他謙稱炒股不叻,但收風最強,「要自己再分析。貼士幾準嘅人最終都會戙你!我唔怪人。我道行未夠啫!」周顯已步入無敵無友的境界,這就是他圈中的「生存之道」。我的收料秘技

周顯每日三餐是他「收料」的時間,福臨門、國福樓、翠亨邨等,都是他的竇,食飯兼陪朋友鋤弟。他自認炒股不叻但收料叻,消息靈通加以篩選分析,就是賺錢契機。這天一來,他就將三部舊式Nokia黑白機擱在枱上,其中一部電話配上了太空卡。他說自己用不慣沒有按扭的智能電話,堅持用瀕臨絕種的Nokia。電話不能上網,不能看股價,但無所謂,最緊要「收到料」。

記:記者周:周顯 記:你主要向邊啲人收料?周:做呢行嘅人。我身邊好多朋友,上市公司主席、經紀、律師、三教九流、黑社會呀!股票經紀啲料會準啲,上市公司主席啲料,唔準o架!佢哋有利益衝突,有誘因老點你!叫你瞓身買嘅,通常叫遲咗,因為佢要落車喇嘛。記:人哋點解要俾料你?多唔多俾人跣?周:我都會俾番料人,A俾我啲料,我可以俾番B。係一場交易,我都有貢獻!而家一日聽十隻八隻,日日都有人跣你。呢個社會充滿陷阱,你帶錢出街,都有好多人想打劫你!我無所謂嘅,輸咗係我道行不夠啫,唔係俾料嘅人有問題。(有無試過俾錯料,人哋同你反面?)有,但好少,因為我通常先做「免責聲明」。記:你點分邊啲堅、邊啲流?周:睇吓幕後邊個係老闆,間公司有乜資產、盈利、股票歸咗邊未、當唔當炒、個古仔似唔似啦。如果公司賬目話你知間公司係五,你有好多可能性,可以係一加四、二加三、十減五,但唔會係二加四。你同我講古仔話「二加四等於五」,即係你幻想出來,希望係咁,我一聽就知你呃我。

記:幾時上車幾時落車?周:每次情況唔同,要配合市況、公司形勢等。喺股票上有太多unknown,無絕對性,只有可能性。例如你好有把握隻股聽日升,點知庄家今日飲醉咗,唔知醒無炒到,過兩日先炒番,咁已經係unknown啦!唔係所有嘢都on schedule,試過好多年前,有經紀叫我買164(中國伽瑪),佢十居九準,我即刻落盤,落完盤佢再打來,要我即刻放。我沽完,股價已跌返原位。十秒我贏咗三十萬,到而家都唔知點解!嗰市就係咁玩。記:互相收料外,你喺呢個圈有無真正朋友?周:有共同語言就係朋友,呢個圈嘅共同語言就係八卦嘢。想有朋友,有三樣嘢:第一你真心對人好;第二你有經濟效益;第三你有娛樂效益,好interesting。必須做到呢三點,最好就有一、兩點,唔係你唔會有朋友。我其實好多朋友,但因為太過無效益,我唔得閒見。舊同學呀、好好感情嘅朋友,應該見!(你又得閒見咁多女性朋友?)第一,女人梗係有效益,flirt吓都好呀!記者又係有效益。但同學係無效益,我諗臨瓜前先慢慢見番啦!

我的炒股分析

講求經濟效益的周顯,去年參與《爽報》(已停刊)的投資比賽「爽組合」,憑一隻931(宏通集團),贏了其他對手,獲得九十萬元獎金。鏡頭前他平淡地說得獎無感覺,贏的錢好少。鏡頭後卻興奮得兩日間將獎金使掉大半。他向來懂得為自己的「人物性格」定位,轉數快,表達力亦強。正如他印了十一版的《炒股密碼》第一章——投資者須知自己身在何處,又打算從投資得到什麼。

記:散戶應以什麼心態捉貼士及炒股?周:散戶要知報紙無可能一寫即升。你必須知,第一,炒股目的。係想聽日沽,定一年後沽?如果你想一年先沽,根本唔使日日睇專欄捉貼士。你日日睇,梗係想日日炒啦!其實報紙專欄貼士,係self-fulfilling prophecy(自我實現預言)。嗰期邊個紅就當炒,孫柏文呢期紅就隻隻得!(孫近日一注貼中金寶通(320))點解?佢紅就寫咩都有人跟,有人跟咪升囉!尤其細價股,易炒上。跟紅頂白無錯o架啦!記:你認為股市係假?周:股票梗係人為,你睇窩輪就知啦!供應創造需求,簡單講水清無魚,必須要人為先有股市。不過只要搵到錢,你理得佢真定假!我最近抽一千萬股中華包裝(1439),最後中咗二十萬股。我係見佢老闆自己揸晒,靜雞雞聖誕節上市,一個廣告都唔賣,好低調,估佢得。新股就係炒供求,佢上市嘅目的為咗圈錢,唔係送錢俾你使。如果係老闆、個庄自己揸晒,咁點升都得,貨源少就炒得起囉!(訪問後數天中華包裝上市,首日最多升超過八成。)記:你睇得最中係邊隻股?周:ESPRIT(330)。當初我係第一個唱衰佢嘅!佢七十幾蚊時,我唱佢跌落五蚊,到佢跌落十蚊時,我掉番轉頭唱好!買咗到而家十五個幾未放。我覺得佢跌過龍,當時佐丹奴市值一百一十億,ESPRIT一百七十億,佢個brand點都好過佐丹奴啩?記:你炒股有無座右銘?周:好多人炒股票有一個盲點,佢哋認為呢個世界上,股票係有formula的,即係一加一要等於二,凡A則B,係錯嘅!我嘅座右銘咪無嘢係凡A則B囉,一定有變數。

我的過去

周顯很大使,自言每個月使六位數字購物。訪問時穿着的一件Loewe大褸,要七萬元!但他寧租樓亦不買樓,身家成謎。他出身小康,但家道中落,曾於中文大學新聞系讀書,坊間指他曾替蕭若元打工,寫稿度橋,後來從蕭身上學懂炒股技巧,自立門戶。由於愛寫作,他多年前曾寫過多本武俠小說,其後寫財經書及專欄,深受散戶歡迎。

記:你的出身?周:以前阿爺有錢,喺澳門有樓收租。不過當年佢為咗澳門嗰幢可以收多五十蚊租,放棄揀香港天樂里嗰幢囉!跟住阿爸爛賭,賭馬、炒股、過大海,咩都啱,最後輸晒。(你曾讀過中大新聞系?)畢唔到業,唔講。之後第一份工做公關(邊隻?),我都想做「嗰隻」!記:點諗到兩個武俠小說男主角搞基?周:我諗嗰種劍法,好難練。一隻閹咗嘅雞會大隻啲,同樣閹咗嘅人會好打啲!我用科學解釋荒唐理論。記:嚟緊仲有咩構思?周:我想出本《國富論》,研究日皇明仁係咪裕仁嘅仔,仲有講吓楚漢相爭時期嘅政治鬥爭等。而家我夜晚一點瞓,朝早九點起身寫稿,每日用三個鐘頭寫晒。你哋稿費微薄(指「壹週Plus」專欄),要合乎經濟效益,我用十分鐘寫完。下午同人食飯打牌,差唔多收市返屋企睇股票。記:你搵夠錢了嗎?周:我好大使!從來無咁諗。我周身名牌,我承認我係名牌奴隸。(睇唔出)吓?呢件褸係Loro Piana,四皮嘢,呢對鞋係BV,四千蚊!最平係條褲,7For All Mankind。我唔鍾意炒股,但我需要炒股搵返來嘅錢,咁我唯有不斷炒落去!

PermaLink: https://articles.zkiz.com/?id=89778

廉署偷拍片段曝光 黑幫前坐館:打甩賄警案出得 黎行預咗還

1 : GS(14)@2010-11-27 18:14:38

2010-11-17 iM
被警方列為打擊目標之一的黑幫和勝和前坐館「崩嘴」,多年來都能避過警方的線眼,直至早前被廉署告上法庭,才揭發他涉嫌長時間賄賂一名警長,以換取對方在職務上提供利益。

案件本周一在區域法院審結,因廉署舉證不足,及兩被告以「助養智障女」拆解懷疑賄款來源,成功脫罪。

本刊深入追查這宗黑幫賄警案,並從廉署跟蹤被告的偷拍影片中,揭開崩嘴兩度將一叠叠現金,交到警長妻子所經營報檔的過程;涉案警長更向本刊披露與崩嘴及另一名江湖猛人的秘密關係。

雖然我並不盡信兩被告的作供內容,但基於廉署未能提出有力證據,指證他們有串謀犯案、以及涉案賄款最後是落入警長手上,所以只能判兩人罪名不成立。」區域法院暫委法官陳錦昌,周一就賄警案作出裁決時說。

原名潘偉業的「崩嘴」,四十八歲,被控在○四年中至○八年三月期間,每月向五十歲的警長潘國球提供四千元,作為潘以警務人員身份,在有需要時向他提供優待的報酬,涉及金額共約十九萬元。

潘國球在八九至九四年間,曾駐守荃灣警區反黑組及新界南總區重案組;崩嘴則被廉署形容,是活躍荃灣區的黑幫和勝和前坐館,相信二人早已認識。

從廉署的偷拍片段所見,○七年十二月十一日,穿橫間衫的崩嘴,第一次被拍得現身荃灣大河道,將一個相信載有四千元現款的白信封,交到警長妻子所經營的報檔;第二次在○八年三月十一日,這次他穿深色西裝外套,把一叠同樣共四千元的五百元鈔票,遞給報檔職員。

直認交錢到報檔

「是呀,影片中交錢到報檔的人是我。」審訊期間,崩嘴在庭外向本刊直認不諱,但接着又似是而非說:「警察想拉我好耐啦,佢哋拉唔到,?家又輪到廉署,我出得嚟行,預咗還,最多咪坐一年半載;不過我要強調,給報檔的錢,並不是要收買警長。記得他當年駐守反黑組時拉過我,如果知道他就是報檔老闆娘的丈夫,我一定搵人教訓佢,點會仲畀錢。」警長潘國球則回應說:「我九四年升警長後,就調去沙田警區做軍裝,怎記得十多二十年前拉過甚麼人;還有廉署一直未能證明我提供了甚麼着數給對方,單憑他定時拿錢到我老婆的報檔,就指我受賄,叫我怎服?」他並透露之所以與崩嘴扯上關係,原來牽涉另一江湖猛人。

「老婆在我被捕後才說,她所收的錢,是其父生前的江湖朋友拿來,給患有智障的胞妹阿玉。其妹雖然已四十幾歲,但只得十歲的智商,岳父臨終前最放不下的,就是這個智障女兒。」潘的岳父綽號「驢仔添」,據悉是黑幫十四K支派「湃盧」的重量級人物,早在六十年代已闖出名堂,曾活躍旺角及沙田區,門生近千人,他過身前雖已屆七十多歲,但仍對幫中大小事務親力親為。

驢仔添在○二年證實患上癌症後,曾四出向不同幫會的江湖好友託孤,希望他們有生之年,能協助照顧其智障女兒,結果大部分都答應。然而驢仔添同年底身故後,兌現承諾的人卻不多。

江湖猛人臨終託孤

江湖傳聞,八十年代末,崩嘴在其所屬幫會還未上位時,驢仔添曾多次借錢給他並介紹工作,又帶他結識不同幫會的江湖朋友。其後崩嘴愈撈愈掂,兩人亦成為莫逆之交,故崩嘴對其託孤一事最為上心。

「據老婆透露,自其父過身後,間中就有三幾個不知名的人拿錢到她在大河道經營多年的報檔,他們沒承諾會按時給錢阿玉,但每次出現都會放低幾千元,後來部分人疑因年事已高甚至已離世,沒有再出現。她印象中,崩嘴是最常到來的一個。」潘續說:「阿玉現時在荃灣區一庇護工場工作,每日下午放工後,都會到報檔拿零用錢,然後去買零食或逛街,她所拿的錢,正是岳父的江湖朋友所提供。」據悉,崩嘴與潘國球被捕之初,完全無提及「助養智障女」一事,直至案件開審,潘才以此作辯護理由;加上在廉署舉證不足情況下,二人才得以把行賄受賄罪推得一乾二淨。

崩嘴還在庭外高談闊論說:「我明知警察一直都想拉我,如果真是賄警,又怎會蠢到親自拿錢去其老婆的檔口呢?」逃過廉署檢控的崩嘴,現仍要就涉嫌操控及勒索荃灣區多條小巴路線一案,接受警方調查。有反黑警官相信,他跑得了和尚,也跑不了廟,遲早被送入監牢。

老叔父變箭靶之謎

近年執法部門經常拘捕一些已退下江湖前線的黑幫叔父輩人物,有指是因卧底人員難以接觸當紮大佬,為求交差,遂轉向名氣大兼戒心低的老叔父埋手。

雖然黑道中人批評此舉等同「恰阿伯」,但一名反黑警官表示,不少自稱退隱江湖的大佬,其實仍暗中操縱幫會運作,故必須予以打擊。

「尤其掛着前坐館名銜的老叔父,他們地位超然,除不時出面調解各頭目之間的糾紛,更可直接影響幫會的選舉,當中涉及頗大的利益及權力爭鬥。」警官舉例說,今年六月警方在深水埗及時制止一宗買兇殺人案,事件背後正正涉及黑幫坐館人選的爭鬥,幕後主腦及被追殺的目標,均為叔父輩人物。
2 : abbychau(1)@2010-11-28 00:18:32

浪費左咁耐調查了
PermaLink: https://articles.zkiz.com/?id=271804

【馮仁昭四圍超】林欣彤頒獎禮預咗陪坐

1 : GS(14)@2016-12-07 08:01:10

林欣彤噚日喺九龍灣出席眼鏡店宣傳活動,分享個人揀眼鏡心得,佢話喺唔夠瞓或冇化妝之下最鍾意佩戴超大黑超遮掩眉眼。林欣彤今年只推出一首歌曲,坦言對年尾嘅樂壇成績表冇乜嘢期望,預咗去坐,但仍然會出席各大頒獎禮,佢話:「我想睇朋友攞獎,心目中有人選,但唔講得。」近日林欣彤拍劇拍到天昏地暗,搞到年尾搵外快日子都錯過。撰文:馮仁昭




來源: http://hk.apple.nextmedia.com/entertainment/art/20161207/19857102
PermaLink: https://articles.zkiz.com/?id=318647

【親子籽】容許帶仔女返工 老闆:預咗員工分心

1 : GS(14)@2017-04-28 00:55:20

皓欣(左二)已習慣抱着細女(右二)工作,大女兒(右一)也習慣乖乖的坐在旁邊等候。



【親子籽:一周突襲】美國每年四月第四個星期四(今年是4月27日),都是帶小孩上班日(Take Kids To Work Day),孩子可跟隨父母上班,了解他們工作的辛勞。在工作環境相對嚴肅的香港,父母想這樣做的話,簡直是天方夜譚,因為就算過到老闆那一關,都未必忍受得到其他同事的白眼。但有媽媽級的老闆,將公司打造成寶寶友善的工作環境,容許員工帶孩子上班,讓職場女性一邊湊仔,一邊發揮所長。



「女性是極有可能做人媽媽的動物,但很多時都會因為要餵奶、湊仔,而被迫放棄工作的機會。」育有一名十歲兒子的蘇如紅(Ivy)這樣說,她是一家美容培訓中心的負責人,這裏的員工有一項特別福利:可以帶同孩子上班,孩子更可在中心肆意遊走,甚至坐在媽媽的大髀,騷擾她工作。


常表揚湊仔員工

身為媽媽的Ivy明白在職女性要在湊仔和工作之間作出取捨,並不容易,加上公司的工作性質容許員工彈性上班,故決定跟隨美國母公司政策,讓員工帶孩子上班。「我覺得人是很重要,一間公司不是只有賺錢蝕錢,還要看員工能否享受工作,有些媽媽由細到大花好多心血讀書,只是因為結婚生仔而放下自己的專業,這年頭在香港生活壓力很大,樓價貴,生活指數又高,既然女士有心工作,難道要個BB都不可以嗎?」話雖如此,孩子在自己身旁走來走去,不時大喊媽媽,總有分心的時候,Ivy卻說:「絕對會,但我容許她們分心,我經常表揚這些帶孩子上班的媽媽,既要推着嬰兒車,又要拿着護膚品,如果我是她老公,會覺得老婆『好堅』,要買餸、煮飯、湊仔,仲要返工。」已在中心工作11年的Eunice是其中一位媽媽級員工,自四年前兒子出生後,便帶着他上班,直至他上幼稚園,她說:「每個媽媽都想自己照顧小朋友,特別是頭六年,無論是媽媽還是孩子都想黐着對方,但我覺得女性應全面一點,照顧家庭之外,也要出來工作與人溝通,這樣各方面都會有很大的提升。」每天都帶同兩名分別一歲多及三歲半女兒上班的年輕媽媽皓欣,昔日從事飲食業,因為工時長,難以照顧女兒,經朋友介紹轉到這裏工作,主要負責教授美容班,「我會抱着細女一起上課,大女則在旁聽我說話,有時做我的小助手。」她倆都慶幸公司文化及氣氛很好,加上有很多背景相近的媽媽,就算帶着孩子上班,其他人也會體諒包容,不致尷尬。


設哺乳間方便媽媽

中心面積不大,但Ivy都特別設立一個小房間,讓媽媽餵奶,或給小朋友睡覺,「空間雖然小,但我覺得都可協調,做些人道的事,給媽媽空間,有尊嚴地做事,多點體諒,員工真是會為你仆心仆命的。婦女是有種特別的韌力,可以為家庭、為子女、為生活,而自願放棄很多事的。」



育有十歲兒子的蘇如紅也是過來人,明白在職媽媽要在湊仔與上班之間作出取捨不容易。

Eunice自兒子出生後便帶着他上班,她慶幸公司同事很包容體諒。

中心還設有一個小房間,讓媽媽餵奶,或給小朋友睡覺。

記者:黃子配攝影:蕭志南編輯:梁浩維美術:利英豪



難得生性暴龍哥創科眾籌夢,遭隱世肥報販秒殺! https://goo.gl/hnEB7D「蘋果VR」App
App store下載:https://goo.gl/0kW2cK
Google Play下載:https://goo.gl/4K7EHw




來源: http://hk.apple.nextmedia.com/su ... t/20170427/20002434
PermaLink: https://articles.zkiz.com/?id=331608

【檢閱林鄭班子】涉劏房囤地照升財爺 波叔豪裝官邸預咗留低?

1 : GS(14)@2017-06-23 02:46:37

陳茂波出身貧窮家庭,6歲時獲國際培幼會資助兩年,他曾在傳媒訪問中自爆年少時因為貧窮,受一毫子引誘為人帶白粉,又引述他指「會為五斗米折腰」。陳茂波被視為忠實「梁粉」,在梁參選特首時率先表態支持及提名,當梁當選後曾傳出陳茂波或任梁新設的副財政司,但因梁改組政府大計遭立會否決而告吹。2012年時任發展局局長麥齊光因租津醜聞辭職,陳茂波接替麥做發展局局長,上任不久即被揭太太許步明持有的公司擁有經營劏房的物業,被指知法犯法,陳最初推說不知情,及後改口承認知悉部份物業購入時有「分租」情況,外界謔稱他為「劏房波」。同年他被拍得與家人在馬會會所午餐期間喝了多杯啤酒,其後駕車與太太離開,被指涉嫌酒後駕駛。到2013年陳茂波家族又被揭在新界東北發展區,囤積農地1.8萬呎,坐收逾千萬元賠償,當時陳又稱是太太許步明的家族公司持有,但隨即又被揭他曾以業主身份簽署租單,陳稱「不記得、不知道」曾否自稱業主,被質疑有利益衝突,及後再有「囤地波」封號,陳的民望更長期處於低位。2017年1月陳茂波接替曾俊華做財政司司長,當時預計陳可能只居住數個月,又被揭花巨額公帑裝修官邸,被指有濫用公帑之嫌。財政司司長辦公室解釋,因官邸破損有需要修葺,指預計開支約83萬元。【陳茂波小檔案】‧姓名:陳茂波‧年齡:62歲‧學歷:就讀於天主教培聖中學1977年於香港中文大學完成會計學士學位1984年於香港中文大學取得工商管理碩士學位‧婚姻狀況:太太為許步明,育有一子一女,兒子陳天行於牛津大學法律系畢業,現任職律師,女兒則是陳天欣‧月薪:約31.9萬‧資產:與太太許步明及家族成員在港持有6個住宅及商業物業,以及一個車位,其中一個住宅物業用作自住,其餘作出租用途‧仕途/政途:1984年出任新昌集團董事及公司秘書,1990年創辦陳茂波合夥會計師行1996年至1997年擔任英國特許公認會計師公會香港分會主席,2006年出任香港會計師公會會長2008年至2012年任立法會會計界功能界別議員2012年接替辭職的麥齊光出任發展局局長、2017年接替辭職選特首的曾俊華做財政司司長‧任內爭議/政壇代表作:在任立法會議員時,曾在平反六四議案辯論時與泛民共同站立默哀,並對要求在教科書加入六四事件的動議投票支持原屬梁振英的副財政司司長屬意之選,但因政府架構重組議案未獲立法會通過未能上任,及後麥齊光因租津問題辭職,他頂上任發展局局長上任之初被揭太太的公司經常劏房,被揶揄為「劏房波」,及後又被傳媒拍攝到醉駕,民望極低2013年再被揭在新界東北發展區囤積土地,令新界東北收地計劃更艱難



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/news/art/20170622/20065003
PermaLink: https://articles.zkiz.com/?id=336531

【飲食籽】懷舊賀年糕點 圍村人鮮製:預咗年三十前幾晚通宵

1 : GS(14)@2018-02-13 01:51:04

招牌馬蹄糕平日是散裝一件件買,用料十足,馬蹄非常爽口,農曆年會有一斤半裝的發售,$88。

【飲食籽:故味重嚐】親手製的懷舊中式糕點已經少之又少,但在元朗「大榮華酒樓」旁邊的小巷中有遠近馳名的「明星茶果店」。


夫妻同心,其利斷金。在元朗大榮華酒樓旁邊的小巷中,就有着這個動人的愛情故事。土生土長的元朗圍頭人黎彩群(群姐),嫁給同樣在元朗長大的陳裕昌(昌哥)。十多年前,原本在製衣業做裁紙樣的昌哥毅然與群姐創業,「嗰個年代製衣業式微喇,仲邊有得做?」昌哥感嘆說。「奶奶識整茶果,不如跟佢學做吧。我哋讀得書少,茶果又唔係太多人識做,識做嗰啲阿婆都老喇,驚會失傳。橫掂自己奶奶識做,點解唔跟佢學,傳承呢門手藝呢?」群姐笑說。於是13年前他們租了一個地方做茶果,再拿去街市小攤檔賣,除鹹甜茶果外,還有雞屎藤、缽仔糕及圍村傳統界糕等。後來租了一間茶餐廳前的小角落賣糕,遠近馳名。

老闆娘撐唔住 阿女女婿幫手重開

店名明星茶果店的明星兩字,原來是群姐的花名。「細細個住圍村有人入嚟拍戲,見我個樣得得意意,咪問我做唔做明星囉,哈哈!明星明星,一叫就幾十年,喺村度一叫『明星』,就知道講緊我㗎喇。」不過開店九年後,群姐的身體開始撐不住,「膽固醇高,又肩周炎,醫生要我唞吓,做多啲運動,惟有停吓先喇。」於是她忍痛退下火線,結束第一代的明星茶果店,但期間不停有街坊熟客問她何時重出江湖,說再找不到同樣的味道。群姐和昌哥做茶果的心癮仍在,四年後就決定重開明星,但這次還有新人加入,「女婿話想學做茶果,阿女又肯幫手,咁就好喇,冇咁辛苦。」於是群姐將來自奶奶的上一代傳統手藝,傳承到女婿手上。去年1月1日,明星重開,由陳氏家族一手一腳經營,昌哥負責炒餡蒸糕等粗重工夫,群姐負責包糯米糍、捲芝麻卷等精細工作,女婿從旁協助,邊做邊學,女兒就管舖面。長方形的新舖位面積非常細,一家四口擠在約100呎的舖中仍合作無間,「一家人合作真係好開心!雖然賺唔到大錢,但一家人圍威喂完全唔悶,電視收音機完全唔使開,傾住偈咁做,好快就一日。」群姐邊包糯米糍邊說。不過她和昌哥偶爾也會有意見不合的時候,「做嘢一定有拗撬㗎喇,我話得,佢又話唔得。但平心而論,都係為啲嘢好食,咪慢慢遷就囉,兩公婆拍住上,夫妻同心其利斷金呀!」

心機之作芝麻卷 防倒汗水要逐碟蒸

他們堅持的還有「每日新鮮即製」。「我哋每日五、六點就要返嚟蒸糕包糯米糍,整完一樣整第二樣,邊出爐邊賣,賣晒就再整過,最緊要係新鮮!」因為舖位太細沒有足夠位置容納大鑊,昌哥要前一晚在家做定炒餡等材料的預備工夫,隨時做到深夜才能休息,「初頭做到好辛苦,覺得攰到想放棄,但做做吓又多人認識,有啲成績,都好開心,就覺得要堅持。」群姐續說,「人哋話你哋啲嘢食好味,第二度搵唔到,就覺得幾辛苦都係值得。」採訪當日,看到很多街坊是專程來買缽仔糕及茶果等,但因全部人手做,每日最多只能做二、三百個,售完即止,不少人也失望而回。而群姐去年暑假才推出的芝麻卷,更是心機之作。芝麻是找相熟的店家磨,每磅來貨價也至少要$50。為防倒汗水及厚度不平均,要逐碟蒸,待放冷後以人手捲製,每碟只能做四條,非常花時間。臨近新年,他們也特別推出馬蹄糕、馬豆糕及蘿蔔糕等三款糕點。為確保新鮮,會在客人取貨日的早上或前一晚才製作,每日最多做300底,「今年係第一年一底底咁賣呀,之前唔敢做呀,邊有人手,有阿女同女婿幫手,先至敢接咋,預咗年三十前幾晚通宵㗎喇,哈哈!」不過,群姐說多辛苦也不怕,因為農曆新年他們決定放自己一個長假,初十二才會啟市,先苦後甜。


芝麻卷中間仍保留有芝麻醬,芝麻的份量要十足外,蒸的火候及時間也要控制得宜,非常有難度。每條$6

蘿蔔糕的白蘿蔔刨成條狀,有嚼頭,鹹度又適中。一斤半裝,$98

坊間較少有賀年的馬豆糕賣,加入椰汁及花奶製成,香滑清甜。一斤半裝,$68


承傳自奶奶的蘿蔔茶果,鹹香惹味,深受街坊歡迎。每隻$6

舖頭面積只有約100呎,只擠得下昌哥(左)和群姐。



明星茶果店 元朗泰衡街2號地下B舖


記者:黃依情攝影:劉永發編輯:施明慧



來源: https://hk.lifestyle.appledaily. ... e/20180205/20293634
PermaLink: https://articles.zkiz.com/?id=348225

Next Page

ZKIZ Archives @ 2019