軟庫投資10年回報8倍 中環在線：孫正義發達靠畢菲特 李華華
2008-08-04 AppleDaily
前 日本首富，軟庫（SoftBank）創辦人孫正義，前日出席喺杭州舉行嘅第二屆APEC工商諮詢理事會亞太中小企業峯會，佢講到軟庫嘅「創富」過程。軟庫 透過經營手機、寬頻同日本雅虎業務，收取大量現金，孫正義就喺過去10年，用咗其中30億美金，投資全球800幾間科技公司，結果勁賺260億美金，投資 回報高達8倍幾。
每十年定人生目標
有咁驕人嘅成績，佢自爆係向股神畢菲特嘅巴郡偷師。據《中金在線》報道，孫正義話，畢菲特 嘅巴郡擁有保險公司，呢啲保險公司為巴郡提供穩定嘅現金流，畢菲特就係透過呢啲現金流，不斷加碼投資麥當勞、可口可樂同強生等有潛力嘅公司，結果帶嚟豐厚 嘅回報。孫正義就係參照呢個模式，不過，孫正義可以講係青出於藍，因為據佢話，畢菲特過去10年嘅投資回報都係兩倍。孫正義話，自己嘅人生目標從來冇動搖 過，「一生都賭喺微電腦上」，佢嘅目標係「30歲時，賺足夠嘅錢投資；40歲時，落一個大賭注，做一筆大投資，對人生有一個大挑戰；50歲，要實現公司嘅 目標；60歲時，接力交棒畀下一代。」孫正義今年51歲，離交棒仲有9年，佢唔係蹺埋雙手等退休，而係喺嚟緊10年，定下大計──要喺退休前將軟庫打造成 世界第一嘅手機上網公司。據美國財經雜誌《福布斯》08年全球富豪排名榜，孫正義排名第201位，身家高達51億美金，約398億港銀，佢亦係日本第5大 富豪，佢創辦嘅軟庫家陣市值達1527億港銀，公司持有日本雅虎4成股權，市值約685億港銀。電郵：
[email protected]