ZKIZ Archives


葉董事非米芝蓮 左丁山

2010-11-20  AD





 

呢輪有食神照 住,因緣際會,食咗好多餐靚嘢,尤其是試咗好幾間叫做有名嘅西餐廳,時下西餐,以意大利菜為主,但似乎間間大同小異,味道係可口,冇乜可彈之處,但特色欠 奉噃,若果話,有邊間推薦,一定要試完又試呀?答案就係冇,OK啦。諗真啲,都係馬會沙田會所百駿廳前一輪請咗嗰位Alain Passard(見十月二十六日本欄)最正斗,佢明年再來嘅話,一定要盡早卜位。

喺馬場碰到葉董事,談起Passard,佢都話好正,嗰味 黃汁雞,令佢難忘。講到食評,葉董叻過馬評,問佢攞貼士去邊度食,好過問佢賽馬心得,佢在報紙話好嘅,自己照試一定得益;但如果佢話餐廳環境好,氣氛好, 服務正,夜景靚嘅,左丁山蠢蠢地,就當係猜謎乩文啫。講講吓,葉董好正經咁話:「喂,左丁山,你嗰次話我係米芝蓮食評家,有份參選本港米芝蓮食肆嘅挑選工 作,必須澄清,我唔係挑選人員,我從無參加過挑選工作,你寫人地又信,你要更正呀!」

哈,咦,左丁山係睇過其他報道係咁講嘅噃,原來係流 料?葉董話人地點寫,佢睇唔到,可以當作不知,但佢日日睇住左丁山有冇亂噏,佢啲朋友又係,左丁山一寫,就招來太多電話查詢,故此佢一定要大大聲講明: 「我唔係米芝蓮食評人!」

 

好嘅,好嘅,鎖你,鎖你,葉董,清楚嘞,以後如有其他人講及葉董與米芝蓮有關係,請勿相信。講番 食,馬主H有新舖開張,設於The One。佢嘅馬有「睡得好」、「睡眠科技」、「枕住贏」,全部與佢嘅枕頭被鋪床上用品有關。佢間iSimple開幕之日,請咗不少工業總會、廠商會啲老友 及其他人等到The One十九樓嘅Harlan's食餐先,呢間本來係IFC名店,現在搬咗過九龍,老闆係餐具(刀叉)供應商,賣餐具賣到開餐廳,唔通飲食業更好賺?呢間 Harlan's有露天大露台,望270度中環海景,睇放煙花就冇得彈嘞。席間碰到一位N先生,係印染業前輩,壹仔社長嘅同鄉,印染N對左丁山講:「肥佬 黎係我地紡織界怪傑,當年我接佢嘅印染生意,接到做唔切,估唔到佢轉咗行一樣醒得咁交關!」


PermaLink: https://articles.zkiz.com/?id=19367

Next Page

ZKIZ Archives @ 2019