ZKIZ Archives


馬城市靜內 左丁山

2011-7-28 AD




 

日本北海道優選 馬拍賣會在靜內市舉行,由札幌新千歲機場駕車前往,需時兩個鐘頭以上,據柳尾和廣課長所言,靜內係一個海邊小市,人口二萬五千左右,八成人嘅工作與賽馬、 種馬有關,可以講係一個「馬城市」。市內絕少高樓大廈,我地入住嘅一間Wellington Hotel樓高八層,頂樓餐廳已經叫做Sky Lounge,里美小姐話市內酒店不多,間間細小,只在一年三次馬匹拍賣時期先至會客滿。果然,客房內之浴室十分狹窄,如果身形似鄭則士或者沈殿霞,入咗 去就轉唔到身,此乃日本特色。不過另一位海外人客係澳洲獸醫兼馬房負責人R,具高大身形,佢話最緊要乾淨企理,巴黎不少酒店房間都係同樣tiny啫。

城市雖細小,酒店外面幾十公尺之遙,就有一間名叫「赤鬍子」嘅居酒屋,以「燒物」出名喎,一行人在此吃晚餐,肥仔K狂點燒(烤)牛脷、燒雞、燒牛排骨、豆腐等等,十分美味,而且夠平,一大碟燒牛脷,只賣四百日圓(約四十港元),在東京與大阪,簡直係發夢價。

一 宿無話,第二朝晨早就起床,坐車三分鐘就到咗拍賣場地,場地內有二十三座馬房,容納三百八十匹馬,一個室內拍賣場,眼睇有座位三百左右,馬房與拍賣場之 間,有大草地如一個足球場,此外還有馬匹亮相圈。大會派一位不懂英文嘅獸醫帶我地周圍行,好彩有肥仔K做繙譯,否則唔知講乜好。去到馬房,按圖索驥,鍾意 睇第幾號就叫馬伕拉出嚟,日本人梗係好耐性,有禮貌嘅啦,啲週歲馬又好馴喎,企定定,任你摸腳、摸蹄,叫隻馬行圈二三十步,自然照辦,馬伕與馬房課長向我 地鞠躬,多謝我地肯賞面嚟睇辦。好彩一早知道此乃日本人習性,否則左丁山只係嚟到得個睇字嘅啫,正是搞搞震,冇幫襯之流。九時以後,一百九十匹馬分五批, 每批三十八隻,按號碼在大草地外站立約二十分鐘,在場準買家可以繞場逐隻睇,逐隻摸,拍照等等。一啲名種如Neo Universe子女有不少人圍觀,至於日本人唔熟悉嘅種馬如「奇異光芒」之後裔,就「門堪羅雀」咯!


PermaLink: https://articles.zkiz.com/?id=26564

Next Page

ZKIZ Archives @ 2019