📖 ZKIZ Archives

中原集團創辦人施永青，向來是地產界代言人，最近進一步變成「維權人」，帶領經紀上街，逼政府撤辣招。處處辣火頭，終於燒埋身。先是上月尾駕車返工途中，遭惡人截停扑爛車頭玻璃。上週四，又有whatsapp訊息瘋傳他「怒掟」過十億工商鋪。本刊找來這位「惹火人物」，親自解畫。見過鬼但不怕黑的施永青，只晦氣地指會封盤：「避免誤會，暫時唔賣住囉，但今晚可能發個夢就改變主意。」

上週四幾乎所有地產經紀及傳媒，都收到一個「驚嚇」whatsapp，內裡指施永青會將所有私人物業全數出售，還指他賣鋪是大跌市先兆！須知施永青手頭物業總值幾十億，消息自然震驚業界。據知，施永青原來並無下達旨意，只是員工想「假傳聖旨」推郁樓市，刺激成交；本刊再問施永青，他雖全程語帶輕鬆，但怨氣終究隱隱滲了出來。

記=記者施=施永青記：地產界有whatsapp瘋傳，話你將名下工商物業全都放售，是否屬實？施：我係有意減持，但根本無放過盤。啲人話個whatsapp係我助手Pheobe發嘅，但電話號碼都唔啱。只係有經紀打過來問Pheobe，我啲物業係咪有租約，但Pheobe絕無講過要放售。Whatsapp入面嘅盤有晒價錢，但唔係我定嘅，有啲價仲好唔實際。避免誤會，暫時唔賣住囉，短期封盤！（記：短期即幾耐？）我私人物業嘛，唔使交代咯，可能今晚發個夢就改變主意！記：太太有無下封口令（施出名恐內）？施：老婆係有鬧我！佢話：「你賣樓咪賣樓囉！關社會乜事，你無需要交代，呢件事你又做頭條，你知唔知人哋見到呢啲即係代表上次嚇你係無用，你係咪想人嚇多你一次呀，唔只想扑你個玻璃窗，想扑你個頭！」仲話：「你正死蠢，挑釁、刺激想扑你嘅人！」我話對唔住，今次真係唔關我事o架。其實，上次受襲，我呆咗成兩秒，坐响度唔識郁呀，遲啲都會講少啲。

投資香港受懲罰

記：你減持同政府辣招有關？施：同撤招有少少關係。不過政策都係一時嘅啫，減持原因有兩個：第一，我嘅私人投資組合原定為四三二一，物業四成，之後係股票、債券及黃金。點知物業係咁升值，最高升到佔組合達八成有多。唔想太集中於地產，一定要cut番落來，但cut來cut去都仲升囉！第二，最近見到政治爭拗、社會分化、矛盾，我驚未來會激化，房地產係不動產，擔心唔係話賣就賣得到。現時嘅社會情緒係仇商、仇富，尤其仇地產霸權。投資於香港要受懲罰o架，要俾重稅（編註：額外印花稅、買家印花稅及雙倍印花稅），民間情緒仇富嘛，有樓愈多，罪狀愈重，我咪減輕吓自己罪行囉！記：你去年開始出售物業（去年至今，施永青共沽貨套現逾四億七千萬），現地產佔投資組合的比例是幾多？施：近五成，本來應該要繼續減持至四成，但依家唔賣住啦！記：減持與早前受襲有無關係？施：梗係無關。有關，我仲搞咁多嘢咩！我信上次有人扑我架車，係唔關你老闆事（編註：有傳施永青受襲，是因早前接受了《壹週刊》「非常人語」訪問），所以就回應吓你，已經俾咗你老闆信任一票啦。記：擔憂香港前景，又在高位沽貨，繼續睇淡後市？施：我嘅睇法一直無隱瞞，最近亦無改變（編註：本月初他發表下半年發展商要劈價賣樓的言論，指細價新盤會減價百分之五至十，豪宅價格則會跌一成半至兩成）。不過，現在唔係需要恐慌性拋售嘅時候，所以我可以封盤，遲啲先算。

一個公職 都無

今次掟貨事件，被指是他「大」政府的招數之一。事實上，過往施永青深受政府重視，○五年曾蔭權出任特首，隨即擴大中策組旗下策略發展委員會的範疇及人數，視之為最重要的諮詢架構。同年十一月，施永青便以非官方委任成員身份入會，開始直接向政府發聲。○八年曾蔭權成立經濟機遇委員會應付金融海嘯，成員僅十名，發展商無個有影，施永青卻佔了一席。不過梁振英上場後，施永青一個公職都無，CY搵「級數差一截」、在本港「零」分行的置業國際集團主席蔡涯棉對外發聲，又處處干擾市場運作，絕對令施永青「有怨無路訴」，相信這才是他到處「辣火頭」之關鍵。

根據網上的「廢青指數測驗」，今年二十八歲的Patrick（李雋瑋）及Tinnie（關菀騰）， 應該是廢青的中堅分子。這對情侶討厭OT、手機不離手、喜歡網上購物、更獨愛「hea」爆的蛋黃哥。畢業後因難忍長期OT，決定辭工，轉開網上精品店 Uppacase，半年後成功轉戰樓上鋪，還連開兩間！兩人的父母，一直視他們為「宅男宅女」、「不事生產」，現時Uppacase月賺六萬，讓父母跌了 一地眼鏡碎。成功的關鍵，在於早人一步、洞悉「蛋黃哥」深得後生仔歡心，故早於上年尾從日本購入大量精品，結果一擊即中！證明兩位廢青，並不是全廢，想賺 錢還要食腦。

「蛋黃哥」，又叫梳乎蛋，其賣點好簡單，就是hea和懶，經常變身為荷包蛋、炒蛋等造型，今年在港、日、台紅爆！在台灣當地，設有「蛋黃府」給「信眾」參 拜；而在香港，除了踢走熊本熊，成為觀塘apm的café主題，又在尖沙咀The ONE設有點心店。早在去年尾，Patrick及Tinnie已獨具慧眼，將蛋黃哥引入香港。

搶「蛋黃哥」頭啖湯

「當時無乜人睇好佢喺香港hit到，但我哋就覺得佢夠晒hea，個樣好似咩都唔想撈咁，中晒香港人心態。一開始逐少逐少咁入貨，嗰陣時官方Twitter 開始每日都有更新，我哋就將佢轉載喺fans page度。」Tinnie說。此fans page，就是由二人建立，首個在facebook出現的蛋黃哥中文版fans page。Patrick及Tinnie還會將引入的蛋黃哥精品，放在fans page推介。由於香港有一班十分緊貼日本精品潮的擁躉，所以一上架已有人留意：「我哋個個月都去日本，見到愈出愈多，啲客都會問邊一款有無得賣，我哋就 開始大膽入貨。」二人並專攻較輕磅的文具：「筆、簿等雖然價錢唔高，但啲客一買就買好多，而且運費又平啲，賺嘅會比賣公仔好。」由於二人趕及在香港總代理 入貨前大手宣傳，在今年初幾乎做獨市生意：「佢始終係新角色，香港Sanrio都未對佢有好大信心。其實啲客一入到嚟，唔理係咩產品，只要係蛋黃哥嘅都 掃。最誇張試過成間精品店有一半生意，都係來自蛋黃哥，一日做咗兩萬蚊生意。」由於現時蛋黃哥精品已到處有售，二人坦言發「蛋黃哥」財的時間已到尾聲： 「代理見佢紅都係咁出，太過氾濫生意就會分薄。」

捧紅精品角色

二人要再覓下一個爆紅目標；不過這條路他們早已行過，而且深知要賺錢，不是要捧紅鋪頭，而是捧紅精品的角色。所以當初開店，他們第一步不是建立店鋪網頁， 而是建立角色facebook專頁。Patrick指出：「Tinnie之前做網上廣告設計，知道如果角色得意，唔少人都會首先用角色個名喺網上 search。如果用鋪頭名就比較難搵到。」二人經驗所得，同一個內容，在角色專頁的like數，比自己店鋪專頁的多逾數倍：「有時角色獨立專頁嘅 like可以有三、四百個，自己公司嘅就得十幾個。」雖然設專頁花費是零，但Patrick指所花心血相當多：「每日要揀時間update，要諗寫乜同影 相，都幾花時間。我哋識少少日文，配合埋Google Translate，都估到七、八成。」現時獨立經營的專頁有六個，他們亦迫不得已放棄部分專頁：「好似農場精靈咁，因為新貨唔多，而家我哋都好少 update啦。」除了吸引港人，原來專頁亦吸引不少澳門及台灣網民。Patrick透露台灣人的「facebook癮」比港人更深：「佢哋一知道個網， 會click入去相簿一張張咁like啲相！更加有唔少網民飛過嚟香港搵我哋。」訪問當天，就有來自澳門的劉小姐，經facebook找到店鋪，她說： 「自己都係第一次嚟，因為澳門賣精品嘅鋪頭比較少款，價錢又貴啲，平均三、四個月都會嚟香港買精品，見靚就會買！」當初Uppacase並無實體鋪，只在 旺角設交收點，後來兩位老闆覺得地方開始不夠用，決定搬到銅鑼灣現址，卻剛巧碰上「佔中」。生意雖受影響，但二人早預算初期要守一段時間。幸好不久，就遇 上了「救星」蛋黃哥。

一季唔得即斷貨

卡通角色精品潮，來得急、去得快，如早前「熊本熊」攻港，有不少擁躉至今仍對它情有獨鍾，但日本方面已甚少推出它的新精品。Tinnie解釋：「新角色嘅 生產周期都唔會好長，日本方面見銷量跌，下一季就會即刻唔出。都有啲客會拎番佢之前出嘅product問有無，我都同佢哋講已經斷晒。」Patrick就 指曾在日本掀起熱潮的紙兔、Né-net，以為在香港都會成功，但最後完全吸引不到港人注意：「紙兔搵埋AKB48配音，但喺香港真係 製造唔到話題，我哋一試唔得就要放棄。」Tinnie表示，推出新角色前都會將它的圖及貨品上載，吸引網友給「like」，作為入貨指標，但有時睇 「like」亦未必足夠：「好似蛋黃哥咁，依家嘅like其實無少到，啲人都一樣覺得佢得意，但係已未必真係會嚟買。我哋依家都要睇like同盤數夾唔 夾，好似將件貨放咗上網，真係見鋪頭多人嚟問同埋買，我哋先測試到個角色，係唔係真係吸引到人消費。」

兩個「廢青」的誕生

兩位做生意頭頭是道的老闆，原是「廢青」。Patrick及Tinnie畢業後，齊齊加入廣告行列，三年間差不多日日OT，令他們萌生去意：「夜晚十點有 得收工已經好好，好多時都要做到凌晨三、四點，人工萬幾蚊，無咩私人時間。」當時Patrick的朋友在facebook經營手機資訊平台，「like」 數達十萬，但開始無意經營，二人決定借用來作網購：「當時係賣公仔手機殼，發現原來都幾多人鍾意，我哋覺得有得做，決定喺網上面搵多啲得意嘢做代購。」不 久Tinnie更辭去工作全職投入網購：「份工成日做埋啲無意義嘅pitching（俾稿），OT嚟唔知做乜，頂唔順！」半年後Patrick亦辭工加 入。後來因網購生意愈做愈有，二人用了積蓄及之前盈利共十萬，租用旺角商業大廈樓上鋪作交收點。最初二人不懂門路，決定向大型連鎖精品店叩門，請教入貨途 徑，漸漸引起批發商留意：「當時見到農場精靈，覺得個樣夠怪，決定入貨試吓。」當時Tinnie一早起床就上網跟客人聯絡、上載圖片及訂貨。但父母卻誤會 她嫌工作太辛苦，辭職在家玩電腦。她抱怨說：「佢哋成日話我一日到黑掛住上網，又唔搵工，但我做緊乜講極佢哋都唔明o架啦，都唔想解釋。」

寧擴充不願上車

對於現時好多人都覺得年輕人「唔捱得」，二人立刻搶着「平反」：「其實打幾晚通宵機都好辛苦，其實係好捱得。」、「啲人覺得為份工仆心仆命先至好，但係值 唔值先得o架！」二人坦言開店後，才發現OT時間比打工時更嚴重：「好似近排分店趕開張，幾晚都無得瞓，好辛苦，但係自己生意覺得好開心。」 Patrick及Tinnie拍拖多年，他們都有共識結婚，對於上車，Patrick直言「唔諗住」：「講真，俾首期嘅錢有喺度，但係真係唔想俾層樓綁 死，如果啲錢用嚟開分店仲開心。」Tinnie亦深表認同：「上到車咪又係幫發展商供樓，而家大部分時間都係為間鋪，有錢都會諗鋪頭先，有時我都當嫁咗俾 事業喇！」

開業資料（06/2014）

租金#$120,000裝修$150,000入貨$200,000雜費$30,000總投資$500,000銅鑼灣總店#三按一上

營業資料（11/2015）

營業額$300,000租金$30,000人工*$60,000入貨$120,000雜費$30,000盈利$60,000*2位兼職，3位全職連兩位老闆

撰文：梁延宇攝影：關永浩攝錄：陳浩樂、廖健昌