出口術犧牲姚盈盈陳庭欣搞掂黃子雄幫拖
1 :
GS(14)@2015-01-30 01:39:432015-01-29 NM
做咗三年的長命劇《愛‧回家》，成功造就劇中藝人知名度提升，爆騷又有機會搵快錢；但有指大台計劃添食到七百集後就收檔。去年才加入，在劇中做路人甲飾演泌尿科醫生的陳庭欣，眼見機不可失，出盡嗲功收服對手「查生」黃子雄，令對方以同醫生才有感情交流做理由，說服監製，將在劇中跟前妻姚盈盈的感情戲，轉移到她身上。積極爭取拍劇
一○年港姐冠軍陳庭欣，長期做節目主持，到近年才有機會拍劇，去年《愛‧回家》大洗牌，有份入組的她被派演醫生閒角，間中出鏡幫律師樓員工睇病檢查身體，角色可有可無。「Toby（陳庭欣）係個好進取嘅人，佢發覺做主持機會唔多，大騷好多時又唔輪到自己，所以就向戲劇組拍門，只要收到風有監製要搵人，佢就會即刻自薦，試過同監製講話知道阿邊個唔得閒，啲期會好難度，叫人改用佢，總之出名積極。」一名劇組工作人員說。加入《愛‧回家》後，陳庭欣抓緊機會，重點向對手黃子雄埋手。「佢同黃子雄合作過《載得有情人》，嗰時已經氹得對方好開心，喺《愛‧回家》佢兩個又最多對手戲，開親工都會一齊自拍，Toby又會將啲開工相放上微博，比起姚盈盈，佢識做人好多。」
同前妻唔夾
據了解，跟陳庭欣合作將近一年的黃子雄亦經常同導演、監製說跟她合作好有默契，尤其拍感情戲，自自然然就有交流，比起同姚盈盈，效果相差好遠。「黃子雄成日提住同Toby有火花，叫監製加條感情線俾佢哋，早排監製終於答應咗佢，所以嚟緊查生唔會再翻撻前妻，因為佢同Toby會撻着，兩個人會拍拖多啲戲份。」劇組工作人員說。可惜《愛‧回家》收視近日已跌破二字頭落到十七點，有指無綫打算五月腰斬劇集止血，即使陳庭欣搞掂黃子雄爭取加戲份，也時日無多。
出出入入
《愛‧回家》女角出出入入，唔聽話又或者話事人珍姐曾勵珍唔like，一定冇得留低。
朱慧敏在劇中升呢做女一的朱慧敏，被指將是非當人情，工作態度不佳，更將劇組開大會的內容外洩，被珍姐再三警告後依然唔收斂，結果被掟出局。
湯洛雯港姐落選後雖然不斷有機會拍劇做主持，但開工成日發夢唔投入，叮走。
蔣家旻被安排飾演人見人愛的馬子妮，令人氣升咗唔少，不過前年因瞞住珍姐拍剝衫戲，結果角色被安排出國，守行為半年，去年底終於可以再回家。