ZKIZ Archives


合規長做長有 左丁山

2010-11-22  AD




 

為咗健康着想,左丁山食過午飯後,盡量行路返寫字樓,橫掂來來去去都係在中環、金鐘、灣仔吃飯嘅啫,行路可至,出多幾滴汗,冇所謂吖。

呢 日在喜萬年與一班前輩拜拜之後,行返中環,經過太古廣場,碰到美國賓架K,佢每年來港一行,領略亞洲風情,橫掂退休已久,大把時間啫,問起近況,賓架K話 佢吃長俸與社會保障金已有一段時間,點知接到舊上司電話,叫佢回歸復職,在合規部工作,負責追蹤大額現金活動情況,於是又多咗一份糧,日日花四個小時往來 曼赫頓都冇計咯。賓架K話:「自九一一與金融海嘯之後,美國監管機構急速膨脹,追查銀行大額資金來源,銀行合規(compliance)部不得不大力擴 充,日日填寫報告交畀政府。銀行唔可以輕易炒合規部主管o架,如果要炒就首先要向監管當局詳細解釋,所以我老闆有免死金牌,份工非常穩陣,老闆話我在銀行 經驗豐富到極,要我日日睇報告,追查疑點,做到七十幾歲都有得做,益我收多一張paycheck,只係我個女失業,搵唔到工,奧巴馬上台之後,美國未好 過。」

有兩位世姪女在澳洲攻讀工程,返港後亦係在銀行嘅合規部工作,問過其中一位工作情況如何,佢話日日填表寫報告,毫無創意,自覺係銀行 嘅dead cost,對生產力毫無貢獻。不過唔做唔得吖,要向監管機構交差吖嘛。世姪女所言,令左丁山想起年青之時,為銀行填寫香港區之「策略執行計劃報告」、「全 港貸款分類分析報告」……加加埋埋每季要交幾百頁功課,送往銀行嘅東京亞洲總部,由亞洲策劃部門審閱。如是者過咗兩年,亞洲策劃部一個副總裁調嚟香港分 行,做左丁山上司,某日帶佢去沙田馬場跑馬,講馬之餘,問佢:「我地交咗幾千頁報告去東京畀你個部門睇,你地分析到乜嘢出嚟呀?」呢位VP眨眨眼話:「我 地銀行亞洲有咁多分行,一年交嚟萬幾頁報告叫我點睇?一頁都冇睇過,我嘅頂頭上司等緊退休,更加唔睇!」左丁山為之啼笑皆非,由那一刻到現在,都唔相信有 人會真係細心研讀啲銀行數字報告,除非出現類似雷曼破產事件啦。


PermaLink: https://articles.zkiz.com/?id=19399

烹飪節目長做長有阿蘇喪鬧人May姐勁落雞汁

1 : GS(14)@2017-01-09 08:11:25

講到教煮餸嘅節目,真係長做長有,喺香港出過唔好著名烹飪主持,以下晝啲婦女節目為地盤嘅,有方太(方任利莎)、李曾鵬展、以至近年嘅李錦聯等,後來演變到晚上都有播,好似乜都加啲雞汁嘅「May姐」馮美基,仲有鍾意講「雞有雞味,魚有魚味」嘅黃麗梅等,當然唔少得由有線做到無綫嘅肥媽Maria Cordero,佢主持嘅教煮食節目添食再添食,仲有近日「人憑節目貴」嘅《阿爺廚房》主持李家鼎,全部都唔講得笑。


方太(方任利莎)

方太於1970年代先後於香港家政中心及超群家政中心擔任烹飪導師,因超群家政中心班導師會輪流代替李曾超群喺麗的電視《下午茶》主持烹飪環節,方太開始喺電視上教烹飪。方太於1979年正式加入《下午茶》。到1982年,方太喺家庭節目《午間小敘》(後改名為《方太生活廣場》)主持烹飪欄目,其後方太更推出多本烹飪書。


黃麗梅

喺亞視效力多年嘅黃麗梅,除咗主持《今日睇真D》令觀眾留下深刻印象外,佢主持飲食節目都係一個標誌,佢主持過嘅包括《中國八大名菜》、《覓食新煮意》、《味是故鄉濃》同《煮食無界限》等系列,而佢喺節目內曾經不時提到「隻雞好有雞味」、「食物好鮮味」、「好鮮甜」,因而成為經典名言。


馮美基(May姐)

著外傳媒人May姐曾加入麗的電視,亦係無綫嘅開台功臣,到1992年加入有線電視。近年轉戰飲食界嘅May姐開餅店又推出食譜,到2011年及2013年,May姐為無綫主持飲食節目《May姐有請》,因為May姐不時喺節目中大笑、而且喺好多菜色菜都加入(多次提及)贊助商提供嘅雞汁,引起網民惡搞和取笑。


肥媽Maria Cordero

肥媽歌喉靚,但煮藝仲勁,佢喺1990年代尾加入有線,到2003年至2009年其間主持《肥媽私房菜》,大受歡迎,其後肥媽過檔到無綫,因主持飲食節目《食平D》系列而令佢嘅「煮婦」地位更加穩固。據知,原本由電視台擔任節目製作,後來變成由肥媽嘅團隊製作,再賣番版權畀無綫。




來源: http://hk.apple.nextmedia.com/entertainment/art/20170109/19891295
PermaLink: https://articles.zkiz.com/?id=322027

Next Page

ZKIZ Archives @ 2019