ZKIZ Archives


投資股市:鐵江現貨(一) 阿牛

http://hk.myblog.yahoo.com/yomagyomag/article?mid=2630

鐵江現貨

鐵江現貨,中文叫『鐵貨』,母公司Petropavlovsk簡稱PLC,在英國主版上市,喺俄羅斯嘅礦務公司,開採釩鐵鈦礦;同我地隻中國鐵鈦,業務一樣。阿牛厚面皮啲講,即喺我地『行家』。

         

公司點解叫鐵江現貨,又點解叫IRC,阿牛睇晒成本招股書都唔明,都唔知I喺乜,R同C又喺乜,淨喺知道同『期貨』『現貨』喺冇關係嘅。公司現在投產嘅鐵礦全部來自一個礦坑:Kuranakh。礦石生產之後,就做正常嘅選礦,研碎,然後就賣去中國黑龍江,或者『想』運去海港出口,賣埠。下面幅地圖就喺招股書裡面提供嘅。

 

          

 

礦場在中俄邊境,冇幾遠嘅左上角,寫住Kuranakh嗰度。不過幅地圖冇提供一樣好重要嘅嘢:比例尺。

佢撞啱阿牛,咁佢唔好彩喇;因為佢唔劃,立即就引起懷疑,引阿牛搵幅正規地圖嚟度佢。經量度後,原來礦場離開海邊,右下角嘅大港口Vladivostok,即喺海參威,成二千幾公里遠!

 

       

大家知唔知二千幾里有幾遠?

答案喺遠過香港去北京。如果坐火車去,普通慢速度要兩日。所以上面話『想』運 出口,都喺想吓好喇,因為運到港口,運費已經貴到叫救命,都唔駛賣囉。雖然招股書都幻想喺近啲嘅Sovetskaya Gavan,俄羅斯政府可能起個新港口,不過咁嚴重嘅幻想,都喺當冇好啲囉。而且運嚟中國嘅礦沙,有冇港口,都喺靠陸路運輸,鐵路先喺正經,有冇新港口一 啲關係都冇。

我地中國鐵鈦運礦石都喺講最遠三、兩百里路,近嘅一百幾十里,二千里,即喺鐵江要運好幾倍咁遠。所以鐵江由礦場,就算近近地運去黑龍江的估計成本,都高達83.72美分/乾公噸。相比之下,澳洲礦是36.17美分,巴西礦是28.65美分。簡單嚟講即喺鐵江貴三倍。當然,澳洲同巴西嘅礦要再坐船坐車先運到中國,最後加加埋埋,可能抵消番鐵江條數。招股書都特別僻一頁計條數出嚟,證明佢地運費唔喺特貴。

不過佢地都要承認,隨著中國鐵路不斷改善,海路到中國的澳洲和巴西礦石,由大連港上岸之後,運到黑龍江的運輸成本將會逐年漸漸下降,但喺俄羅斯的西伯利亞鐵路,就日漸殘破,運力和運輸成本都會日趨惡劣。在風險因素一欄,公司都披露:

『本集團營運十分倚重俄羅斯鐵路公司經營的鐵路貨運網絡,俄羅斯的國有基建設施發展時期主要在蘇聯及前蘇聯時期興建,並且最近15至20年未獲得充裕資金修護。俄羅斯鐵路系統不斷惡化,軌道車缺乏,容量有限而有中斷風險,如果未能於其後三年改進軌道車輛,可能導至可運作的軌道車輛短缺。倘於Sovetskaya Gavan的港口擴建並不進行,本集團的營運會隨著項目的生產增加而更倚賴俄羅斯鐵路系統。』

 

        

一言蔽之,將來運輸會越來越麻煩,越來越大鑊。

點解講嚟講去淨喺講黑龍江呢?因為啲鐵根本賣唔遠,除左賣去黑龍江之外,送禮自奉都冇乜用,賣去外國,吹水嘅啫,運費咁貴根本冇可能。所以佢同中國嘅鐵廠簽晒約,掛左勾,全部喺賣嚟中國嘅喇。


PermaLink: https://articles.zkiz.com/?id=18320

投資股市:鐵江現貨(二) 阿牛

http://hk.myblog.yahoo.com/yomagyomag/article?mid=2631

投資股市:鐵江現貨(二)

 

              

 

黑龍江喺中國最北嘅省份,黑龍江嘅哈爾濱大家一定聽過,再北就喺大興安嶺同俄 羅斯接壤。呢度亦喺滿清嘅發祥地,『白山黑水』就喺最佳形容。山喺白嘅,因為長年積雪,水喺黑嘅,因為太陽光唔夠,而且日照角度低,斜斜地照埋嚟,而唔喺 頭殼頂照落嚟,加上好早就天黑,所以連河水都照唔通,啲水望落去黑monk monk。

滿洲人未入關之前,在關外撈邊行嘅呢?

大家多數會答:佢地喺遊牧民族。

錯嘅。

遊牧民族都有啲羊馬,遊嚟遊去,但喺滿洲人連呢啲動物都養唔到,因為環境惡劣;牧都冇得遊,滿洲人只有做獵人,靠通山走打野獸。所以呢度環境有幾惡劣,可想而知。

 

而家就梗唔喺咁,好好多喇。不過黑龍江亦唔喺富庶嘅省份。哈爾濱市如果計人均收入,全國排81,去年喺RMB745一個月,黑龍江省,如果全國計,佢嘅收入喺三十一個省和自治市中排第二十,成績屬中下。

作為一個鋼鐵銷售市場,阿牛就覺得黑龍江省非常一般,新建設唔喺冇,但唔喺特 別多;而且中國東北自己都生產大量礦物。大家如果記得日本仔侵華時,攞左東北嘅礦產資源之後,就冒險發動太平洋戰爭,因為佢地諗住有左中國東北,資源都已 經夠用。後來當然發覺冇石油喺另外一個至命弱點,但喺發覺時都已經太遲了。

         

好喇,下面就喺哈爾濱嘅全年氣溫,大家可以睇到每年有一半時間喺零下嘅。Kuranakh比哈爾濱再 北啲,再內陸啲,而且礦山喺高地,所以更冷,氣候更差。如果大家仲記得阿牛分析中國鐵鈦,就會記得鐵礦喺露天開採的,所以即喺話,有半年時間要在零度以 下,露天採礦。零下都未喺問題,仲會落雪同埋結冰,而且啲機器要冬天在零下十度操作,幾個月後夏天就在二,三十度氣溫操作,對機器損害很大,分分鐘修理機 器都修到你暈陀陀。由於環境惡劣,所以連員工都要請雙倍,因為啲工人不能回家,要做滿一個月,先放一個月假,然後先番得屋企見老婆。公司亦多次提及自己擁 有一隊有經驗嘅開採團隊,呢樣嘢亦喜亦憂,因為只要班人唔扭計,唔跳槽,咁就好地地,如果有乜伊郁,跳草裙舞,咁就大鑊喇。零下二十度,人留在室外,先唔 好講有冇生產力,要保住條命,幾個鐘後行得番入嚟,都喺一門學問,唔喺人人掂㗎。啲工人如果走左,搵邊個做呀?

 

       

礦採到之後,跟住就要用水用電嚟鍊礦。阿牛睇落佢地嘅電力,問題不大,但喺水源就缺啲,連員工嘅飲用水,都要由附近鄉莊用小水管引過嚟。

講到呢度,大家都可以想像到當地運作嘅情況,就喺有啲工人在冰天雪地中,下午 三、四點已經要開探射燈,挖啲石頭出嚟,剷上架運礦車,先運去揀礦廠,用機器研碎,篩選,之後又搬番上車,轉去火車站等轉上啲老爺火車度,行幾日,運到嚟 中國邊境,清關進口,然後運去黑龍江嘅某處,等候進廠提鍊。

開完礦之後,工人落左班就番宿舍,煮嘢食,唱民歌同跳土風舞。

                       

定喺番宿舍飲酒食煙,賭錢同打交呢?

        


PermaLink: https://articles.zkiz.com/?id=18384

投資股市:鐵江現貨(三) 阿牛

http://hk.myblog.yahoo.com/yomagyomag/article?mid=2632

 

 

鐵江現貨,上市集資三十至四十億。上市嘅錢,喺用嚟開發公司第二個礦坑,該個礦坑在一個叫Kimkan的地方,因為當地的前期工作已經做好,可以開採了;但喺:

公司已經斗零都冇。

       

 

Kuranakh嘅一號礦呢,點解賺唔到錢呢?原來2008年Kuranakh一開始投產,就撞啱鐵礦價錢下降,由於缺乏競爭力,於是唯有停產,一切停頓,減少損失。今年初開始由於鐵礦石價格節節上升,所以公司捲土從來,從新投產。

公司自成立到現在,成盤數都喺蝕嘅;最叻就喺Kuranakh剛投產時,嗰年好少少,今年個預測喺全年唔會蝕多過九千五百萬美元,即喺大約七億幾港元!

上市集資得嚟嘅錢喺用嚟給Kimkan投產,同埋處理種種『財務及會計義務』的,簡稱減債。

如果講基本因素,就甚為惡劣;2008年已經證實左,鐵礦價稍為下跌,鐵江就要停產,可見佢嘅開採成本,貴到乜嘢程度。人地啲礦場,價錢差就最多賺少啲,吊吓鹽水,捱過左再算;鐵江一撞到鐵礦跌價就直情摺埋,十分恐怖。

 

所以:

 

1)長線嚟講,呢隻嘢前景認真麻麻。

 

2)同我地嘅中國鐵鈦比,完全冇得揮。不過多一隻鐵礦股上市,多左話題,對我地隻鐵鈦,應該有正面幫助。

3)俄羅斯股票,在港上市的有486俄鋁Rusal,但大家唔多捧場,股價麻麻。

 

       

4)呢輪嘅新股非常當炒,好似隻隻都得。

5)但喺,聽講李嘉誠,長實同馬世民竟然入股做基礎投資者,而且股份禁售六個月。

嗱,阿牛又考吓大家,如果你喺基礎投資者,你會點呢?

首 先,間公司長遠落去,真喺唔知會點,長期投資就未必制得過,所以唯有睇中短線。首先唔好俾佢跌,更加不能破發,否則啲股評人,你一言,我一語,數晒啲弱點 出嚟,咁就死得喇,永不超生。所以一上市就要護盤,頂住個雞頭,一路向上。由於佢只喺三、四十億企業,唔喺農行咁大,要頂住都唔喺乜嘢困難。跟住得閒搵啲 『友好』,寫吓文章介紹吓,到Kimkan礦投產又當新前景,吹行佢,啲股民知Q咩,又唔做功課,多人話好咪買囉。到個股價升得好好地,比發行價高出幾 十%,咁就慢慢滲啲貨出嚟。

 

        

即喺有得搏,但唔喺實得。升起嚟,有一倍利潤都唔出奇。

                    * * * * * * * * * * * * * * * * * * * * * *

阿牛策略:行家上市,認購一手,以表支持。瞓身頂頭鎚,你唔好預我。

睇定再算。

        


PermaLink: https://articles.zkiz.com/?id=18385

投資港股:鐵江現貨(四) 阿牛

http://hk.myblog.yahoo.com/yomagyomag/article?mid=2786

投資港股:鐵江現貨(四)

Blog友,股代周瑜先生,今晚俾左個留言阿牛,話:

市場消息,俄國礦企鐵江現貨<01029.HK>擬將招股價由原來每股2.23元,降至每股1.8元;大股東亦不會配售舊股。

公司原計劃發售13.25億股,當中包括2.55億股舊股。按此計算,集資額由原來最多39.75億元降至19.26億元。

好大獲呀

 

呢段嘢喺AAstocks今日中午嘅新聞稿。當中最後嗰句喺阿周先生嘅comment,阿牛估佢個『獲』字打錯啫,應該喺『鑊』先至啱。照估計阿周先生意思喺『大乜鑊』 。而唔喺『大收獲』。冇問題,睇得明就得喇。

 

不過阿牛反而覺得未必喺『鑊』,應該真喺『獲』都未定。

 

首先鐵江招股,最近嚟計都怕且喺至醜樣嗰隻,大家應該都有聽聞過。咁如果我喺管理層,就橫豎都喺囉,一定用上限訂價,賣到盡,然後good水鬆人。喺有料到嘅,攞左錢,努力做嘢,用行動証明俾大家睇;喺冇料到嘅,呷左水,番俄羅斯慢慢meat。

 

咁點解要降定價,減街貨,連『先舊後新』配股都放棄埋呢?

答案喺:想炒起佢。

但公司連斗令都冇,咁點炒呢?

即喺話庄家另有其人。

       

大家話乜人呢,喺咪策略性股東最有可能呀!

 

阿牛都講過,間嘢啲料咁差,首要條件就喺不能俾佢破發,否則永不超生。要唔破發,就要死頂著;所以HKD1.8就好頂過HKD3.0好多。HKD1.8炒上HKD3.0就喺升60%,如果HKD3.0發行,死頂著HKD3.0就只喺叫做在發行價徘徊,用嘅錢就差不多;但喺你話邊樣好聽啲吖?

 

我估鐵江同策略股東有『默契』,即喺超額多少,就幾錢出,唔超額又點,好差又點點點……

 

如果阿牛估啱,在上市前兩日就有人出暗盤價高HKD1.8兩成,即喺兩個一毫半。在大家猶疑之際,一上市就高開兩成半,即喺兩個二毫半,然後死頂住,中午炒上兩個三毫半,下午鬆鬆手,由得佢跌番落兩個一毫半收市。跟著連續幾日,漸漸炒上二個七,等街貨歸邊後凍結在兩個半左近,遲啲搵機會再推高一浸出貨。

 

 

如果真喺咁,阿牛個部署將在上市前一天,十三號星期三,先用亂炒基金嘅全部錢,買入893中國鐵鈦。因為十四號一早,鐵江上市如果上升,893多數陪跑,升番二、三個%。咁十四號上市日,近中午先沽晒啲893套現,夾賺佢幾%,有幾多執幾多。跟著下午收市前,三點九,全部錢買入鐵江,大約HKD2.15。跟住等一等,揸幾日,HKD2.6左右賣,賺四毫半子;加埋鐵鈦嘅大約3%,共賺24%。

 

不過有好幾個情況要注意:

 

1) 如果暗盤價唔得,就唔入893,寧願放棄3%,等上市再決定玩唔玩。

 

 

2) 如果上升唔夠預期咁多,就照買,不過『止賺點,按比例調低』。

 

 

3) 如果第一日收市升太多,多過30%,即喺兩個三毫半,就完全唔買,因為怕水位已經唔多,寧願拉倒放棄。

 

 

4) 如果買入後麻麻地,唔炒上兩個六,而個市又唔好,就分分斬倉叫停。不理賺蝕。

 

呢鋪喺咪幾有趣呢。

       

P.S. 少少修正:只要暗盤價出左,確認高兩成,就可以買893,廢事893炒高左,買貴嘢;唔一定十三號買,早啲都得。

P.S. 2010/10/9 鐵江延期上喎,麻麻地喇,新股嘅氣氛越嚟越差。


PermaLink: https://articles.zkiz.com/?id=18541

投資港股:鐵江現貨(五) 阿牛

http://hk.myblog.yahoo.com/yomagyomag/article?mid=2880

 

投資港股:鐵江現貨(五)

隻鐵江本來今日星期四上市,而家有變,要從新認購,下星期四先上市。咁多事實,咁多攪作,個樣就似模似樣,似有人『做嘢』。雖然講fundamentals,鐵江就得啖笑,但喺股市唔喺講fundamentals嘅,特別喺短線的時候。

呢幾日嘅新股麻麻地,前兩日上市嘅2266麗悅,同1733永暉焦煤,齊齊插水。永暉比招股價跌9%;麗悅招股價HKD2.2,但第一日收市HKD1.88,即喺低14.5%,喺今年除左873國際泰豐之外,首日跌最多,最難睇嘅一隻新股。

 

             

 

呢隻股票喺035遠東發展分拆出嚟嘅。佢引起阿牛注意喺因為佢又有兩位本地策略性投資者,一位喺四叔李兆基先生,另一位喺鄭裕彤先生,每人入股一億。

在上市之前,嗰一兩日都有消息佢暗盤價低招股價三、四%,其實咁樣對個上市價,已經有啲啟示,但喺又好似冇乜人擔心,可能因為隻股票個profile本來唔差,在香港、大陸、同東南亞有三千幾間酒店房,做遊客生意。呢樣嘢阿牛就覺得有關人士疏忽左啲,凡事都唔應該咁托大,小心啲得㗎!

 

佢集團其中一間本地酒店就喺麗悅酒店,位處灣仔。阿牛睇過佢個homepage,一間普通房得18平米,喺好細好迫嘅一種房,都要人USD277一日,寬頻加USD20,然後再加一服務費,共HKD2550一日!如果有人住,就真喺都幾好賺㗎。我地平常住嘅酒店,細晒都有30平米一間房,呢個差唔多喺國際默認嘅雙人房標準。18平米,細得好誇張㗎喇,連行李喼都放唔落;麗悅仲勁嘅就喺,15平米『標準房』都有,但價錢阿牛就查唔到。

好喇,第一日,股價自由發揮之下,變左咁樣:

      

 

雖然嗰日個市上升二百幾點,結果隻2266都喺低收一成半。跟住到左第二天,報紙都賣埋,話唔喺好靚,咁於是乎引起『各方好友』嘅關注,在第二日大市下跌嘅情況下,逆市炒高7.45%,收市報HKD2.02。所以:輪到隻鐵江,就真喺暗盤唔好低開,否則千祈唔好跟。當然如果暗盤高開,就照原本計劃,買入鐵鈦打頭陣。

好喇,假設真喺低開,其實喺可以考慮撈底,因為各位策略性投資者,仲蝕得金過我地,跌得太低,好多『各方好友』會關注,於是乎股價有機會反彈。

035遠東發展,喺邱氏家族嘅。佢地呢家人嘅慳儉,俾阿牛印象好深。首先喺好耐好耐以前住過佢地嘅長洲華威酒店;都已經一九九幾年代;阿牛第一次見到香港有酒店熄晒燈,熄晒冷氣慳電。

        

第二,早幾年,阿牛睇過佢地有個樓盤叫清水灣山莊,啲樓喺以『清水樓』形式交吉;人地啲示範單位天花龍鳳嚟呃人,佢個示範單位,就俾間清水樓你睇,成個厠所爛容容,幾乎鋼筋都睇到咁滯,印象深刻。

             

 

第三,阿牛睇過一篇專訪,講佢老爺,邱德根先生;佢屋企大廳有一排戲院用嘅『彈摺櫈』,喺拆元朗最後一間戲院時,攞番屋企嘅。阿牛以為老人家念舊,都好正常啫,因為邱老先生喺做戲院起家嘅。點知佢自己話俾記者聽:

『啲櫈唔喺好爛,仲坐得,唔好掉左佢,咪拆返嚟自己坐囉。』

唔記得話俾大家聽,麗悅酒店即喺新華社舊址嗰度,跑馬地墳場在佢後面,唔夠廿呎。

        


PermaLink: https://articles.zkiz.com/?id=18542

投資港股:鐵江現貨(六) 阿牛

http://hk.myblog.yahoo.com/yomagyomag/article?mid=2902

尋日講隻麗悅上市,佢個模式其實喺好值得我地花多幾分鐘,睇清楚作為鐵江下星期上市嘅借鏡。

我地又睇番佢幅圖。

        

 

首先隔夜嘅暗盤價低招股價~4%,即喺HKD2.1左右。咁一開市咪再俾人質低多4%試兩蚊囉。呢度其實有兩樣嘢,第一,真喺千唔著萬唔著,唔應該俾暗盤價插水。第二喺,個股價咁近兩蚊,呢啲整數喺重要心理關口。如果隻股票歷史夠耐,守得好穩,呢啲就喺支持位;但喺而家喺新股,兩蚊就喺阻力位。

 

結果第一口價開左HKD1.99,跟住都未見過兩蚊。所以鐵江貶值去到HKD1.8,其實喺好事嚟,有腦嘅行為,變左兩蚊個位喺『上破』,唔喺『跌穿』,如果血肉長城守得住兩蚊個位,咁就好穩陣。

講番嗰日隻麗悅,俾人喺咁質,質到中午已經散晒,最差喺上午臨收市,衰到HKD1.76。下午一開市,其實有人嘗試頂住,一路由兩點半買到三點,買番上HKD1.9,大家睇成交量都睇到,嗰半個鐘喺做左好多成交。 HKD1.9條血肉長城整好之後就守住,到臨收市,再不惜代價守住個九嘅關口。

 

                                       

問題喺呢度喇,假設隻鐵江一模一樣,咁我地講左第一日下跌,喺唔追入嘅。到收市跌十幾%,究竟買唔買得過,搏反彈呢?

 

                                  

阿牛建議就唔好制喇,因為如果有料到,第二日喺會強勢出擊,第二日買都未遲。

到左第二日,就要密切留意開市價。第二日如果有人『做嘢』,咁就一定高開;我地第二朝高開先買都未遲。當日高開,一定唔會好多,可能幾分錢,但喺一日流流長,開市做左個靚位之後,有排頂,有排守,所就冇咁快炒上嘅喇;要到臨收市先郁㗎喇。

                              

咁我地仲要睇住佢喺咪守得住開市價,定喺虛火。如果守得住,中午收市前就買貨。

我地又睇下第一日跌9%嘅永暉焦煤。

 

        

 

佢第一日就有啲唔同,佢一開市,跌到HKD3.36,跟住俾人急速買番上HKD3.5,然後守住,喺下午番嚟三點半過後先守唔住,俾人沽到HKD3.38。

 

佢第二日又喺高開番,然後成日守實,下午就炒上HKD3.6。

所以遇啱上市唔靚嘅,第一日就唔好諗佢,第二朝先睇佢有冇高開,同守唔守得住,先決定買唔買。

假如買左,又幾時賣呢?

 

到左第三日,兩隻嘢,基本都冇晒力,一隻上升HKD0.02,另一隻跌HKD0.02。所以阿牛建議,到第二日,下午三點四十五分,就合埋眼,冇眼睇出貨。

咁賺幾多呢?

 

5%至7%。

辛苦一個晏晝,搏一個反彈,薄切一片,喺得咁多喇!               


PermaLink: https://articles.zkiz.com/?id=18543

投資港股:鐵江現貨(七) 阿牛

http://hk.myblog.yahoo.com/yomagyomag/article?mid=2920

我地今日又睇吓另一隻股票。

呢隻喺遲一日十四號上市嘅956新天綠色能源。公司喺在河北攪天然氣分銷的,兼且攪埋風力發電,喺熱爆嘅環保能源範疇。隻嘢超額就超好多倍,喺今年第四大凍資股票,十分受投資者睇重。之但喺雷聲大雨點小,未上市已經潛水,暗盤價比招股價的HKD2.66低一成,得兩個四;結果上市捱足一日,努力守足一日,以HKD2.64微跌收市。

 

       

 

佢個招股價其實訂得唔錯,HKD2.66。嗰六毫六子,在五毫過少少,下破兩蚊十分困難,就算衰到貼,都喺好似而家咁低開一成;在兩個四呢啲位其實都好難鏟落兩蚊,咁樣容易防守好多。相反,要上破三蚊,就喺13%,唔喺太難,如果上左之後,跌番落嚟嘅機會唔大。

 

當日下午,佢已經好努力咁盡量想扯高收市,不過都喺差少少,達唔番到招股價HKD2.66。到左第二日,佢都喺高六分錢開市,開二個七;之但喺到下午,佢就波平如鏡,冇左尋日嗰兩隻股票嘅升幅。

所以如果我地好似昨日咁,在第二日中午入左市,到下午,就原全冇升幅,連我地原本鐵板燒嗰一片薄切牛肉都冇埋,淨番塊鐵板。


        

即喺食白果!

                

阿牛就建議白果都照食,在第二日收市前了斷左佢,最多蝕使費。如果唔狠下決心,就分分鐘要長揸,即喺中長線投資落隻股票度。我地原本喺冇意圖咁樣做,亦都唔覺得隻嘢喺我地長線投資嘅對象,只不過喺想趁上市時,兵荒馬亂,揾少少著數。

千萬不要搞錯自己意圖。因為有另外一種食物等緊我地:

       

食薄牛肉定喺食白果,喺個天安排俾我地嘅。

食蕉喺自己攞嚟嘅。

P.S.   阿牛行開幾天,暫時覆唔到大家嘅留言,敬請原諒。

PermaLink: https://articles.zkiz.com/?id=18544

投資港股:鐵江現貨(八) 阿牛

http://hk.myblog.yahoo.com/yomagyomag/article?mid=2927

講左兩日新股上市,講左啲低開守唔到招股價嘅弱勢股。今日講吓高開嘅強勢股。

       

 

十三號嗰日有三隻新股又上市,最靚喺580賽晶電子電力。招股價HKD1.76,暗盤高開近兩成,上市首日以HKD2.5收市。當日開市已經有兩個二毫七,跟住一直向上,基本上一直炒上,冇乜點回過,只喺中午稍為定一定,下午再升4%。全日低位喺開市嘅兩個二毫七,最平穩喺中牛十一點半至十二點,守在兩個四毫二,接近成半個鐘。

到左第二日,十四號,小裂口高開五分錢,做HKD2.55,跟住就做左全日高位HKD2.63,接住慢慢回落,全日最低喺十一點嗰陣,做左十分鐘兩個四毫幾,跟住好緩慢同輕微咁上升,上番兩個半樓上,一直到收市。收市喺HKD2.53,叫做守住股價,但喺升幅欠奉,乏善足陳;第二日基本上冇貢獻。

 

      

我地如果同嗰兩日恆生指數比對一下,就見到指數都喺『V』字型。楊丞琳都話喺。

                     

 

中午十一二點最低。所以賽晶股價,基本吻合大市走勢,只不過加多一個上升成份在內而已。

驟眼睇吓,我地想揾個位入市,揾個位出貨,執番一片『薄牛肉』,跟本都好困難。如果細心望落去,第一日開市嗰陣,如果可以衝入去掃貨,喺可以買到兩個四樓下嘅貨。咁樣到第二日收市賣貨,賣兩個五毫三,都有7.5%,算喺有啲執吓。之不過,大家得6分鐘時間!手快有,手慢冇。

 

                                            

 

如果我地睇吓昨日講隻新天,一樣有咁情況,開市有幾分鐘急速扯高。新天就有14分鐘;大家執生喇。

                                               


PermaLink: https://articles.zkiz.com/?id=18545

投資港股:鐵江現貨(九) 阿牛

http://hk.myblog.yahoo.com/yomagyomag/article?mid=2930

讓阿牛歸納一下過去幾天的新股上市策略,來厘定我對鐵江現貨上市的炒賣策略。

 

首先,亂炒基金已經花了一半買入297中化化肥,所以只剩一半,即喺porfolio嘅2.5%。阿牛亦沒有意圖抽調其他錢加碼。

到下星期三,上市前一天,密切留意暗盤價。如果開紅盤,即喺暗盤價高過HKD1.8,咁就全部錢買入893中國鐵鈦。

                 

 

前兩天有Blog友問,如果暗盤出得遲,買唔切鐵鈦,咁點好。呢個問題問得好,因為阿牛本身大把鐵鈦股票,自己借俾自己就攪掂,根本唔駛買;只要借幾多,過兩日補反幾多便是。如果閣下冇鐵鈦在手,我贊成睇到暗盤價,喺去馬先至好入鐵鈦;遲遲睇唔到,就寧願放棄左呢第一part算數;唔值得一早買定。

好喇,到上市嗰日,一開市就立即入貨,喺用鐵鈦嘅等值買入;跟住坐喺度睇戲。呢個時候,即喺有鐵鈦,又有鐵江,但喺錢就得一半;如果炒過股票嘅朋友就知道,只要同一日沽出鐵鈦,咁就三日後自動會對數,冇所謂嘅。

隻鐵鈦,就以下午收市前,三點九,賣出就最有可能賺錢。亦即喺話,當日全日唔須要做嘢,行行企企,可以做吓其他嘢唔駛咁緊張。

買左之後就等第二朝一開市,趁佢開高少少,頭嗰十分鐘;最好疊正第八分鐘就立即出貨。賺多賺少就要睇個天錫唔錫我地喇。

如果暗盤跌破底價,咁就坐定定,乜都唔好郁,等上市再算。

上市第一天,亦唔買貨,隔岸觀火;到第二日,一開市小裂口開高,就立即入市。然後到當日下午三點半,不問價沽出;完成整套動作。

有賺嘅,好彩時20%都有可能,唔好彩時,蝕1%至2%亦未可知。

 

簡單嚟講,就喺用暗盤價高低分開兩種玩法;而兩種都喺睇住個時間做人,唔喺睇股價做人。

咁玩法,喺咪新奇好玩呀?


PermaLink: https://articles.zkiz.com/?id=18612

投資港股:鐵江現貨(十) 阿牛

http://hk.myblog.yahoo.com/yomagyomag/article?mid=3005

阿牛今日番到香港,睇到鐵江招股,最後招左個大頭佛出嚟,正一流口水嘢。

 

                              

 

啱啱Blog友kit2010君報料:

<匯港通訊> 鐵江現貨(01029)將於明早掛牌,輝立證券原會於今日收市後,即下午4時30分,提供暗盤交易,但該行已決定今天只做華地國際(01700)的暗盤交易,沒有鐵貨份兒。

輝立證券企業融資主任陳英傑解釋,主要因為中央結算(CCASS)要在今日下午3時40-45分,才能供應鐵江的股份,該行未有足夠時間處理,所以趕不及在4時30分進行交易,因此便不提供鐵貨暗盤交易。

 

另外aastocks話:

大幅削減IPO規模鐵江現貨<01029.HK>公布最終配發結果,公開發售接 獲3192.4萬股認購,即約0.24倍,及發售總數3.07%,未獲認購股份重新調整,國際配售最終數目為10.08億股,佔發售總數96.93%。每 股定價1.8元集資淨額17.22億元。股份預期明(21日)掛牌。

所以唔好講暗盤,公開發售都賣唔晒,明日街貨得3000萬股,另外有10億股喺國際配受買家手中。個形勢變得好得意,因為幾乎冇街貨咁滯,貨已經歸晒邊。

如果講反應,咁就核突到嘔,但喺如果有人打庄,得咁少街貨,炒到升一倍都一啲唔難。

阿牛覺得:

1) 先忘記893鐵鈦嗰截,嗰截切左唔要。

2) 可能有得炒都未定。

3) 明日唔郁手,作壁上觀。

4) 後日如果高開,後日星期五一早入市。

5) 後日如果低開,全部拉倒,當睇左場戲,學左嘢就算。

6) 如果入到貨,後日下午三時半出貨。

祝大家好運!

PermaLink: https://articles.zkiz.com/?id=18644

Next Page

ZKIZ Archives @ 2019