ZKIZ Archives


鐵夾奇遇記

2013-08-01  NM
 
 

 

早前阿姐汪明荃被爆格,整個夾萬遭賊人抬走,損失逾三百萬,成為報章頭條。自封鋪頭為「夾萬王」的夾萬店老闆鍾志成,反指阿姐「唔識用夾萬」。四十歲的他,在旺角、灣仔開鋪賣自家品牌夾萬。對着冷冰冰的夾萬十多年,見盡人生百態,遇上不同客人,他表面寸嘴,內心感慨:「好多客買夾萬,唔係防外人,而係防身邊人。原來,無咗信任,先要買夾萬!」

點解鋪頭叫做夾萬王?因為全港只有我,將一道金庫門放在門市。這道鋼門防鑽防爆防彈,還可以接駁防盜系統,售價三十幾萬,通常銀行、珠寶行或找換店先會裝。香港咁多有錢人,零售有得做,所以放喺鋪頭做生招牌。首富李嘉誠和賭王三太屋企都有類似裝置,行家仲話,誠哥單係起防爆防彈的圍牆,已經要八百萬!

錯將夾萬當櫃桶

汪明荃屋企被爆竊,報紙話賊人抬走的夾萬約重三、四十公斤,這個重量好易抬得起,問題係阿姐無用拉爆螺絲,將夾萬鎖落地下或牆身。其實安裝費只係幾百蚊,但咁就無咁易被賊人抬走啦!好多人唔識用夾萬,以為上鎖就安全,但如果無鑲實,夾萬同普通櫃桶完全無分別,蠢咗喇!我哋嘅夾萬主要喺韓國、美國及內地搵工廠生產,售價由幾百至廿萬不等,豐儉由人,主要視乎重量、大小及鎖的款式而定。具防火功能會貴一倍,買家主要係律師、會計師及建築師等,佢哋最怕文件被火燒。夾萬鎖不外乎用鎖匙、電子鎖、機械鎖及指紋鎖,但沒有一樣完美;鎖匙會唔見,電子和機械鎖要記密碼,而指紋鎖亦驚會無電。

親情不及身外物

以前嘅人習慣將貴重物品放在銀行,但○四年星展銀行試過將保險箱丟去堆填區,○八年又雷曼爆煲,好多人信唔過銀行,開始流行自置夾萬。買個夾萬在家,表面上防盜賊,但其實更多人是信不過最親的家人,即是所謂的家賊難防。試過有老豆買夾萬,因為驚個仔偷嘢去典當。鎖在夾萬的,不一定是錢,而是「秘密」。有個客買咗部iPad,唔想屋企人知,一回家就放入夾萬。有兩公婆,前後腳、分頭來買夾萬,因為不想讓對方知道自己收埋啲乜。甚至有一家幾口,每人買一個夾萬,連工人都有份。以前有錢人先會買夾萬,依家中學生都有。我和老婆也是一人一個,幸好兩個女年紀仲細,唔使買住。好多客名義上是求安全感、互相尊重私隱,唉,都係唔信任嘅一個藉口。

人生沒有「夾萬」

未曾做夾萬前,我做電影嘅幕後工作人員,其後移民澳洲搞餐館,嫌悶,九十年代尾回流。當時,請了個外傭照顧小朋友,點知佢竟偷走太太的珠寶首飾,價值幾萬蚊,有些是我爸媽送給她的禮物,買唔番。香港有成幾十萬外傭,我覺得有市場,便於○一年和爸爸同哥哥,投資近千萬,開設「盛威」,賣夾萬,平均一個月生意額過三百萬,市佔率七成。每年農曆新年,生意最好。○六年,我哋曾贊助電影《寶貝計劃》,提供專業意見和夾萬做道具。套戲講許冠文聽聲開夾萬,傻嘅,做唔到o架,電影橋段啫!三年前,因與後來加入的內地股東意見不合,索性賣盤予對方。根據合約,兩年內唔可以做夾萬生意。今年過完冷河,一於捲土重來,現時每月生意額有百五萬元。財產可以放入夾萬,做人做生意就要面對各種風險。做生意咁耐,被走數、壓價的例子多到講唔晒。試過運一批貨去意大利,到埗後對方才臨時要求減價兩成,唯有打回頭,蝕咗幾萬蚊。幾十歲人,總會試過被人呃,沒有「夾萬」幫到你,只能說句:求人不如求己,最緊要識自保!

PermaLink: https://articles.zkiz.com/?id=70860

Next Page

ZKIZ Archives @ 2019