中環在線：稻香鍾偉平至愛菠蘿包 李華華
2008-09-12 AppleDaily
稻 香（573）噚日舉行嘅業績記招，特別擺咗份high tea西式茶點，同稻香格格不入。伙頭主席鍾偉平解釋，佢哋之前喺深圳開咗間西餐加茶餐廳食肆叫「hi tea」，所以趁公佈業績宣傳吓。不過，鍾主席話，自己都係鍾意港式包點多啲，菠蘿包加奶茶最啱佢心水。佢仲話，7月飛咗轉去英國覓食試菜，雖然英國啲炸 魚薯條出名，但鍾偉平話晒係食家兼上市公司主席，出門試菜梗係搵靚嘢食，出發前同事已經幫佢做晒準備，不過佢就唔肯開名講邊間啲嘢好食，費事幫人宣傳。不 過，喺英國一個禮拜，鍾偉平話西餐唐餐都有食，中餐特別對一味腐皮腸粉印象深刻，呢款點心用腐皮包住蝦膠等餡料油炸，個樣似腸粉，好味之餘仲有創意。
十月北京試新菜
鍾偉平每年都會出埠四五次周圍去試食，下個月稻香會開多間中菜西食嘅「鍾菜」，所以鍾主席喺英國特別留意食肆點樣中菜西食。10月中就飛北京，佢話呢兩年北京搞奧運前後，新餐館多咗好多，所以要去試吓。