ZKIZ Archives


【專題籽】王維基曾錦強@TED 18分鐘濃縮智慧

1 : GS(14)@2016-03-13 02:40:59

王維基(HKTV聯合創辦人及主席)王維基對創作仍有團火,表示會繼續放資源做以香港為本的創意工業,製作大樓也繼續興建中。



【專題籽:胚芽故事】「這是最好的時代,這是最壞的世代。」咁樣形容當下香港,相信狄更斯翻生都會驚嘆自家文字的持久力。如果否極真的泰來,泰來前要破舊立新,膽識加創見就要打孖上。今年TEDxKowloon邀來唔喜歡行舊路的猛人現身說法,腦筋經常急轉彎的王維基,喺廣告界好得交關的曾錦強,都是框跌落來跨出去的表表者。當地球都有2.0時,一切都應該有個新世界。2016年3月20日,記住呢18分鐘,可能影響你一生。

王維基:咪同我講加油,我好難受!

聽talk最正係講者經年累月的人生歷練,一萬碗水煲埋一碗,濃縮成18分鐘奉上。你開稀又開稀,還是啖啖精華,嗒落有智慧。源自美國的TED可能係世上最強的演講生產商,召集勁人開講,微軟創辦人蓋茨、美國前總統克林頓、物理學家霍金、美國第一夫人米歇爾等都踏上過TED舞台塞錢入觀眾袋。TED鼓勵各地粉絲自發組織演講,遍地開花,TEDxKowloon就是香港本地版,良心CEO莊偉忠都曾任演講嘉賓。今年大會廣邀12位前瞻人士,共通點都係鍾意開創新方向,人唔做我偏偏要做。當中包括韌力堪比《復仇勇者》的「魔童」王維基,由自認乞人憎的沙塵友,到今天市民爭相跟他自拍,再送句窩心加油,中間經歷,唔知唔係香港人,但這如坐十級斜度過山車的滋味,無論聽幾多個18分鐘,都永遠得佢感受到切膚之痛與荒謬。他自嘲:「到時我會講呢幾年的慘痛經歷,即使講得不好,冇表演分,都有同情分。」他最想要的才不是同情,「大家行過唔好再同我講加油,我好難受,我想放棄㗎,你同我講加油,咁我應該點?」叫人加油有時都是種壓力。「係㗎,不過老實講我心深深處都真係開心。」他曾經形容搞香港電視「比行毅行者更難行」,改革香港電視業,明明可以早點成功,偏偏ViuTV遲來先上岸。「最想看當然係蔣麗芸同林日曦去旅行啦,但阿曦話我會好失望,佢哋全程冇講過嘢。」他欣賞新台以本土為出發點。「香港雖然只係個得700萬人的城市,但香港好獨特,有佢嘅歷史意義,我們唔可以一手抹咗佢,不應該只遷就13億人,否則只會淪為三不像。」敢言的他天不怕地不怕,不理世俗期望,令他有空間think big。「盡諗,有咁大得咁大,一定要諗得大。你看愛因斯坦,看他的髮型,所有具創意、會思考的人都是一副『我不會理你的態度』。」



他欣賞ViuTV節目照顧香港人口味,不刻意迎合13億人口。

他認為自我中心、不理世俗眼光的人都較有創見和自私,Steve Jobs是表表者。



冧觀眾絕招 跳芭蕾舞?

別人感受從來不是王維基的行事規範。「呢類人有樣唔好,就係自私,表表者就係Steve Jobs。我都一樣,到今天都是個很自私的人。我只諗自己鍾意乜,你唔鍾意乜,我根本唔在乎。」無時無刻都諗嘢嘅佢,聲稱即使做緊訪問時有半個腦都在思考如何降低HKTV mall的運輸成本至$40以下。他笑道:「腦可以越行越快,同我共事的同事好幸福,經常受我逼迫,諗快啲諗快啲,其實他們以往蠢啲。」把口不饒人,以為上台對他來說濕濕碎,卻竟然衰在陳志雲的台上。「係《志雲飯局》舞台版,我唔知自己當年點解咁戇居上台彈鋼琴,嗰次我真係發台瘟,斷咗片。」咁瘀都經歷過,他說自己之後都沒驚過。問他有沒有絕招冧觀眾,「跳芭蕾舞好冇?」喂你敢跳,我敢睇㗎!



王維基曾在《志雲飯局》舞台版為陳志雲伴奏,彈彈吓發台瘟,陳志雲執生繼續唱歌。

由電視大亨變成送貨大叔,贏得大眾支持,五年前的他肯定估唔到會咁。


曾錦強(The Bees Group行政總裁)曾錦強創業前於全港最大廣告集團Group M任CEO十多年,在任期間公司盈利升了六十幾倍,很多人不明他為何冒險創業,他說他愛「自由」。

曾錦強:我有更「變態」福利方案!

共贏,打工仔當然想,但老闆肯定牙痛咁聲。股東分的錢跟員工一樣?唔係啩?主張跟員工分享成果的廣告集團The Bees Group CEO曾錦強,同樣喜歡走出框框,幾年前放棄全港最大廣告集團CEO一職,寧願創業做老闆,其公司變態到生日放兩日、買書看戲入公司數、$3,000睇騷津貼、OT錢冇上限,聞者心心聽者葡萄。他們公司還有三三三分紅制。「公司由出錢的股東與出力的員工組成,要一視同仁。其實咁樣做,公司仲賺多咗錢。」很多人都不明白對員工好,其實也是投放資源的方式。「其實都唔係好變態,我有個方案更變態,係公司付錢請員工爸媽去旅行,我覺得越多人想公司成功,公司最後就會成功,我想做到令同事家人都很想公司成功。」可惜最後因合伙人覺得銀碼太大,擱下計劃,但他認為其實公司可以負擔。廣告行內員工流失率普遍超過百分百,同一個職位每年轉幾個人,曾錦強的公司過去四年,每年流失率最多只有百分之十幾。留住員工的,除了福利,還有他的積極不干預政策。「我覺得一個老闆成日問住員工,係會構成壓力,冇特別事,我唔會打搞佢哋。」很多老闆「領導」、「督導」不分,這個非一般老闆,不用常規管人手,正如讀統計的他笑自己「不務正業」做廣告。「世界充滿選擇,可以隨着內心的呼喚去做。」演講時他會用自身的創業故事證明世界有無限可能。





曾錦強不愛「恐懼管理」,不愛換血激發員工效率,因怕這樣會令人性醜惡面浮現。

三三三分紅制度概念來自施永青,中原地產也用這獎賞制。



其他講者名單



Sam Gellman*Uber香港總經理

余偉業社企「要有光」創辦人及行政總裁

梁百行社企「全城街馬」創辦人及行政總裁



張詠妍社企「Oh my kids」創辦人

黃詠詩舞台劇編劇、演員

Jonathan Zeman*蘭桂坊集團行政總裁





曾志浩「平等分享行動」發起人、室內設計師

Sean Lee-Davies*藝術家、影視製作人、電視節目主持





鄒崇銘香港理工大學應用社會科學系講師

魏華星香港社會創投基金創辦人及行政總裁



*演講以英語進行日期:3月20日地點:中環鴨巴甸街35號元創方2樓票價:$380、$480



記者:葉青霞攝影:許先煜、林栢鈞編輯:陳漢榮美術:楊永昌





來源: http://hk.apple.nextmedia.com/su ... t/20160312/19525655
PermaLink: https://articles.zkiz.com/?id=297762

Next Page

ZKIZ Archives @ 2019