| ||||||
在香港，環保和賺錢，是兩碼子的事。但對於天生愛發明的黃國良而言，只要再動少許腦筋，環保和金錢可兩者兼得。 黃國良本來從事工程業，工作時總在思考如何有效節能，鬼主意多多，如利用冷氣機排放的熱氣，把水預熱；又或使光管在無人狀態下自動關閉，甚至把健身單車與發電器結合。今年五十四歲的他，為了實踐諗頭，毅然辭去每月收入連津貼達十三萬元的醫管局工程師一職，於三年前開設「三得環復科技」（指環境復原），賣其自家製作的慳電產品。客人慳的電費愈多，他賺的愈多。 環保父親帶頭，全家響應，兩名兒子頌焜及頌賢幫手sell客，而做全職師奶多年的黃太亦「出山」任店鋪文職。開業三年，扣除一家四口人工，每月淨賺六萬元。 國良整個衣櫃，只有幾套衫；採訪這幾天，一貫恤衫西褲，外表一本正經，但開口對答，卻一點都「不正路」，「點解環保？咁我問你，點解上帝要創造人？冇人咪冇污染囉。」、「你講吓星哥（黃錦星）做咗啲乜？」、「我哋以前啲衫，縫縫補補又三年啦！」他邊說，邊蹲在地上對着一部划艇機，把零件拆完又裝。他說：「朋友叫我將佢部舊嘅划艇機，改造成發電划艇機，呢啲小意思啦，收佢幾千蚊玩吓。」熱愛發明，大概是一種基因，黃國良說小時候趁母親外出，一個人掏出炮仗內的火藥製作小型火箭，「結果出火位塞得太實，變咗炸藥，整到間屋一笪笪。」他失笑說。 黃國良於香港理工學院修讀工程，畢業後加入政府。創業前在醫管局做了二十多年工程師。任職期間，他曾提出利用冷氣機排出的熱氣把水預熱，費盡唇舌才能說服高層使用。他又拿過醫管局十大傑出員工獎，不過愈做，就愈發現醫管局官僚，「口講環保，又無實質行動。」故他決定辭職，自行創業。他把鋪名改作「三得」，是希望生意可結合天時、地利、人和。 神奇單車發電機 黃國良的第一項發明，是發電健身單車。「有次諗起細個時單車嘅車頭燈，都係踩踏發電，咪試吓用健身單車得唔得！」他最初把小風扇接駁到健身單車上，讓人做運動時，可以享受自己製造的風降溫，這猶如國產凌凌漆中的「太陽能電筒」，有點「估你唔到」。後來黃國良把發明改良為接駁發電機及插座，用作電話及iPad充電，他說：「踩動時平均有一百五十瓦能量，踩完可以將電能儲起，留待有需要時用嚟充電，駁落大風扇都得。」零件如健身單車及發電機等，都是從內地入貨，他把零件組合後，一部發電單車可賣六千元，比一般健身單車貴三至四倍，他堅持說：「六千蚊唔算貴，你去外國買成萬銀o架！」這部單車，曾賣予學校或環保機構，如聖保羅男女中學附屬小學，曾一次過買五架，黃國良坦言零售客比較少，「嚟緊會做推廣o架喇，俾個折頭，五千蚊左右。」亦坦言產品非原創，「外國都有，不過好少去到零售層面。」除了單車，「三得」亦有售其他節能產品，如感應節能接駁器，即把感應器接駁光管，在感應到無人時，光管便熄滅，有人經過才開啟，記者指這種燈現在很多地方有得賣，他後悔說：「我好多年前已諗到。」 新鮮拆賬計收入 黃國良深明單靠發明，雖可滿足自己，卻難有穩定收入，於是包辦企業的環保工程，如更換LED燈，加裝太陽能板及風力發電設備等。黃國良說：「LED燈可以慳兩到三成電費，唔熱、唔易壞，有市場。」但他們剛開業時，市場對LED燈認識未深，加上此類燈比一般燈貴數倍，根本無人想換，「人哋又會諗，換完唔係你咁講點算先？」為了爭取這方面生意，黃國良想出與客戶拆賬當收入。其中一宗生意是粉嶺的海聯皇宮大酒家，他免費為對方更換二千盞不同種類的燈具。如意算盤是其後三年，酒樓把每月所省的電費拆賬，酒家三成，他得七成。不過因內地製造過程失誤，二千盞燈在一個月內壞掉一半，公司要急着為酒家換上新燈「補飛」。黃國良的大仔頌焜想起仍一額汗，「喺內地搵廠家，咩事都可能發生。我哋試過要求整一批600mm嘅燈管，佢出咗500mm，仲要問我哋有冇咩問題喎。」替海聯皇宮大酒家換燈的總成本，要三十萬元。今年開始，酒家每月電費由十萬減至七萬，黃國良每月得二萬元，回本在望。如「慳電」情況持續，約滿後黃國良能賺三十萬。曾幫襯黃國良改裝全港約數百個展示櫥窗燈的Oakley眼鏡公司，負責人吳先生說：「LED溫度較低，唔會對櫥窗內貨物造成損壞。以前啲眼鏡擺咗幾個月，啲燈就烤到部分貨甩色。」黃國良曾替保險集團Aviva的環保船安裝太陽能板及風力發電設備，所產生的電力能維持船內的燈、風扇等電器運作，一宗生意收費約十多萬元，毛利約兩、三成。 人肉搵客大法 為此生意，做了多年全職師奶的黃太，也「出山」幫老公處理文書。黃國良的兩名兒子，大仔頌焜自高中起已到北京讀書，三年前在廈門大學化學系畢業後，本想留在內地發展，幼子頌賢則仍讀夜校。知道父親要開鋪，前者立即回港、後者則朝早幫父親打工，晚上返學。兩兄弟主力替公司開拓客源，第一步是行街。頌焜說：「細佬行商場，我就行酒樓，逐戶拍門，問人哋換唔換LED燈，一個月問了幾百間。」最初吃閉門羮多，數個月來只有旺角荷李活商業中心的商鋪「理睬」，「佢哋有櫥窗做展示，我建議啲燈轉做LED，冇咁易壞之餘又慳電，千幾蚊，佢哋願意試，好鬼開心。」本來「三得」在紅磡，由於他們的產品較為大件，適合家居面積較大的家庭，故兩個月前把鋪頭搬往元朗。頌焜亦參加了「西貢海濱樂園發展計劃」，以日租二百四十元，租下兩個攤位，逢週六、日在西貢海濱擺檔，擺放公司的小型產品，如在內地入貨的太陽能花園燈、太陽能摩天輪模型及太陽能星球模型。不過攤檔旺丁不旺財，他們說銷售其次，旨在宣傳。Oakley及Aviva等大客亦在這裡認識「三得」：「唔好睇小攤位呀，雖然一日得千零蚊生意，但好多大客都喺呢度搵返嚟o架！」頌焜笑說。這裡亦正好讓他們做市場調查，「之前賣太陽能手提電話充電器，客人話效果一般，所以我哋唔再入貨。」他說試過擺賣太陽能聚光加熱器，結果有一天陽光猛烈，鍋子竟聚焦在一名女士的LV袋上，並燒了個小洞，「我哋唔係特登o架，賠咗五百蚊俾佢，以後都唔再賣加熱器。」頌焜說。 最終成兒子偶像 一家人創業，少不免有磨擦。採訪期間，不時聽到房間中傳出黃國良罵頌賢的聲音，「咩format嚟o架，你打緊乜嘢呀」、「你做咗成三個月都做唔掂」、「同你哋做嘢真係辛苦」，連黃太亦被罵。結果為三父子拍照時，頌賢面如死灰，記者叫大伙兒笑一笑，黃國良也不忘揶揄：「俾人鬧完梗係笑唔出啦！」表面鬧，卻對兒子前途充滿信心，他說：「你覺得我叻啲定我個仔叻啲？梗係青出於藍啦！」而兩兄弟亦一向視父親為偶像，背着父親在記者面前說：「呢條友真係好勁o架，文又得，武又得！」 開業資料（6/10） ^二按一上（紅磡舊鋪）租金$75,000入貨$300,000裝修$100,000冷氣系統$100,000^總投資$575,000 營業資料（9/13） ^一家四人及一名員工營業額$400,000入貨$210,000租金$23,000人工$100,000^雜費$5,000盈利$62,000 一點意見 伍健華先生 香港環保產業協會副會長1.主攻四大發明研發精神可嘉，但發電健身單車難work，香港家居面積細，放一部健身單車都唔易，何況賣六千元？慳到的電費遠低於買單車的花費。可試吓sell俾商場，等人們經過可以試踏，幫電話充電。如要研發，可主攻照明、熱水、空調及文儀，包括改良影印機的省電模式、發展省電投影機。2.降低換燈回本期呢幾年唔少大型連鎖店，都肯採用環保LED燈，生意比以前容易做，但因LED燈成本較高，要吸引小商戶，要在入貨方面降低成本，縮短換燈回本期，以吸引更多小鋪及家用客。太陽能板、風力發電等系統比較適合用於獨立屋，香港市場較細，心機都係放喺研發不同種類的節能燈和節能感應器。 | ||||||