| ||||||
來港發展一度由幕後走到幕前拍劇的音樂人陳奐仁（Hanjin），今年決定走回頭路，重張旗鼓，落重本裝修開錄音室；豈料裝修公司開天索價二百六十萬，普通木門也要七千；面懵心精的他見唔對路，搵地產界朋友幫手格價，結果埋單差一半價錢有多，險被當羊牯生劏的陳奐仁，慳番唔少。業主逼遷 年前陳奐仁因為業主賣樓，被迫壯士斷臂，放棄原有的錄音室，無地方做音樂，去年他索性轉攻幕前，拍劇、拍電影、做舞台劇再開演唱會，搵得到之餘，仲攞埋金像獎最佳新演員。不過，音樂始終排第一！陳奐仁對重搞錄音室一直未死心，早前他終於在黃竹坑找到合適地方，並第一時間搵裝修公司報價，重張旗鼓。「我見到張報價單嚇咗一跳，成二百六十萬，普通一道實心門都收七千，我同對方講唔使實心門，都要收五千。」陳奐仁說。 唔敢加價 被當水魚的陳奐仁，新加坡國立大學經濟系畢業，當然識計數，見裝修公司開天索價，於是向地產界朋友求救，轉公司再親自落區格價，結果埋單計數只需百零萬，慳足一半有多。「朋友話可能對方見我係藝人，所以先開價咁高；之後我同BB（陳奐仁太太暱稱）都有親自跟實啲工程，免得再節外生枝，阻慢進度。」 除了掟過百萬裝修，錄音室在器材設備方面亦有加碼，不過陳奐仁強調自己無將成本加諸客戶身上，依然五萬一首歌，收舊價！「依家唱片公司投資做碟好謹慎，好少會成張大碟咁做，多數都係EP或者Single，但我有番自己嘅錄音室，就可以做定多點歌，等人有得揀。」陳奐仁說。泊黃栢高碼頭加盟太陽娛樂後，陳奐仁不但成為公司御用音樂人，今年還有機會返內地拍戲，跟內地導演李欣合作，由於他戲中角色是個土生土長上海人，稍後陳奐仁會跟老師上課，學好上海話，開創新天地！ 市差唔易做 出碟唔賣錢，唱片公司縮皮，陳奐仁投資開錄音室，花費百萬裝修，還要提供一條龍服務，作曲、作詞、編曲全包。張敬軒有契媽投資六千萬於廣州開錄音室，佔地三萬呎，頂級錄音器材，足以應付音響樂團高規格要求，設備齊全到連住宿都有，但開業以來，本地歌手預算有限，甚少幫襯。陳奐仁靠自己，錄音室要做到收支平衡，更不容易。 | ||||||