ZKIZ Archives


恆大有鋪金主命


 
2014-06-12  NM  
 

 

最近馬雲嘅阿里巴巴集團,以十二億元人民幣,入股恆大地產(3333)足球隊五成權益。想當年,恆大主席許家印只係以一億元入貨,呢單交易,就將隊波抬價至二十四億元以上,咁馬雲仲唔係真正嘅「點金勝手」?,

今次許家印仲搶胡,揮低對家綠城中國(3900)支足球隊,令創辦人宋衞平恨得牙癢癢。唔講誰對誰錯,齋講「命水」,許家印已贏曬。綠城同恆大,都係內房股、都係「莫財」、都係無厘頭走去搞波,但後者往往喺緊要關頭,就有金主出手。○九年恆大上市,身為彤叔鋤弟友嘅許家印,就搵到彤叔、大劉、張松橋等富豪撐場,恆大上市首日股價飆升三、四成。後來恆大水緊,要多次發行優先票據吊命,一樣由大劉重鎚認購,安然渡過難關。仲有噃,市場傳聞,許家印同宋衞平一樣,都係咁鍾意過大海豪賭,不過後者卻賭到連間上市公司嘅股權,都要拱手讓人。邊個條命好啲(或者話邊個精啲),一清二楚。

大劉搵人接火棒

呢排零售業轉勢,鋪市真係無眼睇。小宗行經銅鑼灣,數一數吉鋪,竟有二、三十間之多,仲未包括啲樓上死鋪。咁呢幾年高價入貨者,接緊邊個火棒?嗱,華人置業(127)本來喺銅鑼灣有商場「銅鑼灣地帶」,去年二月,政府宣佈加重印花稅,大劉突然即日拆售商場,一共一百八十個舖位,賣走一半有多,就咁套現十幾億。呢啲每個面積幾十呎嘅鋪仔,有「自由行」概念,售價嚇嚇過千萬,一樣有人落疊。當年大劉「代搵租客」,仲保證小業主頭兩年嘅租金回報,有成五釐,筍噃!不過咁,小宗問過場內租客,原來佢哋只係交緊萬五至兩萬蚊租俾代理收租嘅華置,即回報率兩釐,有啲鋪仲吉嘅!回報差價就由華置「暗啞抵」補貼,估計大劉因此使唔多過一億,除笨有精。只係班小業主仍吔吔烏,以為自己可一鋪養三代,幾時先發達夢醒?過多兩年囉!

何佐芝喪禮只限獲邀親朋

商台何佐芝騎鶴西去,社會上下不勝唏噓;員工固然緬懷呢個好老闆,聽眾更加記得佢點樣同班謀殺林彬嘅土共鍊過。但人係唔可以同天然規律搞對抗者,何老闆以九十五歲高齡辭世,福氣嚟嘅。

雖然深受愛戴,但何老闆之喪禮則好低調;非但唔會搞公祭,更只限受邀請親朋參加。獲邀者肯定係何老闆嘅真正朋友矣。

本週特產強國人菠蘿牛

牛角酥(croissant)乃鄧總舵主之至愛,佢老人家一九七四年去聯合國開會,回程特登喺巴黎停一停,整番一百隻頂癮。返到北京,同樣留法嘅周恩來總理嚟接機,一見到牛角酥,猴急到即場趙。佢兩者對呢個法國名產如何嚮往,可以想見。可惜吖,時至今日若果仲未去見馬克思,落嚟整番隻港產之BALL LAW COWSSANT,佢哋當又知道法國人能,香港人更能。

職場秘笈煉獄的開始

港大建築系畢業,由一個小小的項目經理,扶搖直上,升任至富豪國際(78)、百利保(617)及世紀城市(355)的董事。他每期分享不同的職場經驗及秘笈;要上位,無往不利。

阿仔下星期大學畢業,太太要我過美國參加他的畢業典禮。但這幾個月,忙得交關,想過不去!讀書時期,正是一生人最開心的時候,而拋四方帽的一刻,卻意味他需要由天堂進入社會煉獄,而家我後悔少年時曾說過:「希望自己快長大成人。」近排忙,關乎自己的工作範疇。自從政府賣地形式由拍賣改做投標之後,很多發展商都忙到「甩轆」。以前拍賣,實地視察過幅地、參考完市場價、估計建築費走勢等,便決定目標價,等賣地當日舉手,出價最多比第二最高標貴一口,中咗都有譜,唔得就再找機會。現時投標,猶如蒙著眼打拳,市好時,塊地吸引,個個發展商都想要,便會盲目搶高個價;市差或好像現時推地太多太急,個個想執死雞,結果有時會出現最高的投標價比市價低。最煩的是,以前拍賣會即時知結果,然而投標則要等幾天才開標。這幾天的變數很大,一陣市建局又拎幅地出嚟,港鐵又推。究竟買唔買呢?如果早幾日的標中了,而這幾天的標又中了,便需要拿出很大資金。整過賣地過程複雜程度及工作量大大提升!

金牙大狀講嘢林煥光轉移視線

行會召集人林煥光叫香港人反思,一條街有好多金鋪係咪個健康及平衡發展嘅現象。佢冇講出口,但言下之意清楚不過:呢個現象既不健康亦不平衡發展。按照咁嘅思維,我哋想問嚇林召集人,以下嘅現象是否健康而又平衡發展。一、香港有七百萬人,登記選民都超過三百萬,梁振英靠689張選票做咗特首,呢個又係唔係健康而平衡發展嘅現象呢,請問?二、喬曉陽自己識得講無從以法律界定乜嘢係愛國、愛港、唔同中央對抗,但就堅持以此為條件篩選特首候選人,呢個又係唔係健康而平衡發展嘅現象呢,請問?三、泛民攞票從來超過半數,行會入邊就半個泛民議員都冇,呢個又係唔係健康而平衡發展嘅現象呢,請問?大把既唔健康又唔平衡發展嘅現象唔去理,偏偏走去管一條街有幾多間金鋪,呢個又係唔係健康而平衡發展嘅現象呢,請問?

 

PermaLink: https://articles.zkiz.com/?id=102056

Next Page

ZKIZ Archives @ 2019