|
||||||
|
上週三，港隊單車手郭灝霆在荷蘭 世錦賽中奪冠，再創車壇奇跡。車手爭氣，令單車運動愈受重視，坊間更颳起一股「踩車熱」。開業八年的單車鋪——野牛單車（Bull Bike）食住熱潮，去年底投資五百萬，於油麻地租下六千呎唐樓，實行「發大嚟搞」。三十八歲的老闆何永生為求突圍，招攬一批前港隊車手做員工兼「生招 牌」，當中包括東亞運金牌得主，以及三項鐵人賽明星運動員李致和。車行以星級專業做賣點，主攻中高檔單車市場，現每月營業額逾二百萬。 野牛單車（Bull Bike）位於廣東道與窩打老道交界的唐樓，六千呎的店鋪，過百架公路車及山路車各佔一半，主打加拿大Cervelo、瑞士BMC兩大品牌，加上各式配 件，價值逾四百萬元。野牛賣的專業單車，入門版最平都要過萬元。「一玩就上癮，最鍾意同班朋友講吓單車性能，為咗令車身更輕，會不斷加碼買新配件。」在會 計師樓工作的阿Tang，踩了四年爬山車，第一部買入的二手單車僅三千元，現已準備擲過萬元「砌」車。 人稱「牛叔」的老闆何永生，既非專業車手，亦不懂「砌」車。領軍幫他賺錢的，是一班曾在本地及國際賽事獲獎的前港隊車手，由物色車款、推銷、砌車到客戶服 務等，一手包辦。上週六，多哈亞運三項鐵人賽銀牌得主李致和亦「埋陣」開工，令這個團隊增至五人。根據牛叔的如意算盤，單是團隊在車壇的知名度，已可吸引 不少忠實粉絲，變相免費宣傳。同時，再根據各人的專長分工，打造「專業」形象。「佢哋未退役我已經碼實o架啦，不過佢哋鬥車叻，社會經驗卻未夠，要好好管 理。」且看牛叔如何運用各人專長，幫他「生金蛋」。 銷售專員 鄧宏業（阿業） 戰績：09年東亞運公路車賽金牌 專長：口齒伶俐，擅於冧客 工作年期：3年 牛叔將當年贊助阿業出戰東亞運，奪冠而回的Cervelo戰車，掛在店鋪當眼處做生招牌，車價逾十萬元。「有粉絲一望到我部車，就話要砌部一樣嘅，仲要埋 我簽名。我仲會將戰衣掛喺鋪頭，幫野牛宣傳。」一臉陽光氣的阿業，經常笑口迎人，由於名氣大，又健談，主力負責銷售及接受媒體訪問。「唔同牌子嘅公路車佢 都踩過，好多初入行嘅顧客都信佢嘅推介。」牛叔指，近年越來越多女性玩專業單車，「依家有一成客係女仔。」 為吸引初學者，牛叔不時轉介員工做教練賺「外快」。牛叔不計較，學費教練自己袋，令阿業心服。「當年我退出港隊，留喺野牛打工，牛叔卻出錢出力支持我繼續參加東亞運，佢話我有前途一定得，叫我堅持，點知真係贏咗。」 專家顧問 陳玉光（光哥） 戰績：90及91年香港單車錦標賽冠軍 專長：經驗豐富，客人拜服 工作年期：4個月 光哥是單車界的老行尊，與洪松蔭同期加入港隊，退役後曾任單車教練，於大型單車鋪工作、司機等雜工。四個月前，他到野牛買東西，主動問牛叔「有冇嘢做」， 牛叔知道他經驗夠，便即時請他，主力替客人做Bike Fitting（包括度身、調校車身等，再自行配搭零件）。一架現成貨公路車只需兩至三萬元，但若自砌配件，埋單由數萬至十多萬元不等。以座位為例，普通 牌子五百元，但名牌要四千元，就連原本一蚊一粒銅螺絲，也有四十元的鈦金屬版選擇。 現時，公司平均每日可賣出一部單車，九成半的客人都要求「砌」車，很少原封不動買現成貨。光哥表示，為客人度身，有如中醫診症。「有個四十吋肚腩的男士走嚟問我，點解踩踩吓單車會腰骨痛，我話佢彎低身谷住肚腩扯住條筋，梗係會痛，調低座位咪無事。」 貨倉總管 林定邦（阿邦） 戰績：06年全港公路單車賽第一名 專長：細心、統籌能力高 工作年期：4年 野牛去年底由旺角搬至油麻地，面積大了一倍，存貨亦倍增。牛叔看中阿邦對零件品種熟悉，記性好。「一部單車基本有二十幾個配件，每個配件又有不同款式，貨 倉差不多有十萬種，佢分門別類好快。」牛叔指，公司每年向加拿大Cervelo及瑞士BMC的香港代理入貨，每個牌子約一百五十架，合共要五、六百萬元。 「一年大約賣剩二十至三十萬貨，約二十架車，年尾就會減價清貨，有時減到半價。」牛叔說，一部單車毛利約四成，半價已要蝕錢，但總好過「責死貨」。 ○七年已加入野牛的阿邦，是團隊中年資最長的，但亦最「難教」。「初時成日參加比賽，鍾意返工就返，仲成日遲大到。」阿邦說，在旁的牛叔聽到即接口道： 「以前話吓佢，佢立刻反駁。罵冇用，我就笑住來同佢講道理，佢又聽喎。」阿邦笑着「窒」牛叔：「而家唔敢啦，有老闆娘坐鎮睇實，遲到又要扣人工。」 客戶專員 徐震球（阿球） 戰績：04年亞洲錦標賽落山賽第三名 專長：人緣佳，拉攏熟客 工作年期：1年 早在○四年，阿球已在野牛做暑期工。去年牛叔胞妹結婚，發現阿球原來是妹夫胞弟，便叫他來幫手。阿球退役後活躍於單車聯會「鬥車」，不少「車友」因此成為 野牛的熟客。「做銷售係推銷人唔推銷貨，同人熟絡，佢一定返來幫襯我。我會確保公司有利潤之餘，俾到最大折扣客人。」阿球得意地說。不過牛叔卻有微言。 「佢賣嘢習慣鬆手，鍾意俾好多折扣，咁都唔係辦法，有時客人講求服務多過計較價錢，我惟有叫佢做多啲文書。」不過，為增加公司商品的曝光率，牛叔不時會贊 助單車賽事。去年底，他還參與組織單車運動學會，為一眾業餘及專業單車友提供聚腳場地，並用三十萬元訂製了六十套學會單車衣。「每套單車衣出面賣緊六百幾 蚊，但我會平一半賣俾會員。」 採購專員 李致和（阿和） 戰績：06年亞運三項鐵人賽銀牌 專長：人際網絡強助拓展 工作年期：1星期 在運動界享負盛名的李致和，原是野牛熟客，牛叔亦有份贊助單車予他出賽。去年底新鋪開張，牛叔睇中處於半退役狀態的阿和，力邀加盟，負責採購業務。「牛叔 比其他單車鋪老闆有誠意，不時同我講佢唔只賣單車，更想我幫佢拓展三項鐵人產品市場。人工約二萬元，同一個全職運動員收入無分別。如果我去搵其他工，未必 係咁嘅待遇。」阿和說。 牛叔希望借助阿和拓展品牌。「近年網絡二手配件大賣，價錢往往平一半，要諗多啲計吸客。阿和以前多次代表香港出賽，獲不同的廠商贊助，對產品牌子認識多，而且對方聽到佢個名，都會易傾好多。」 請會計難過登天 原本從事電腦系統程序分析員的牛叔，大學時已迷上踩單車，後來發現天水圍屋企附近單車鋪不多。「想買部單車俾姪仔都無。」○二年邊打工邊創業，店鋪面積只有三百呎，主要賣菜籃車及出售小量的專業單車零件。 兩年後，他發現普通單車鋪市場「做唔大」，專業配件則愈來愈講究，便辭掉年薪六十萬元的正職，轉投專業單車市場。「好多客人買部單車當砌模型，特別係專業人士，佢哋會請兩個星期假買機票去夏威夷踩單車。」 開鋪八年，由天水圍、旺角到油麻地，共搬鋪五次，愈做愈大，但請會計一職屢碰壁。「招聘廣告上寫體育用品店，點知應徵者來到門口，見到係單車鋪覺得無前 途，約咗面試都唔見，我心都實埋。」幸好去年結婚後，牛嫂答應幫手管數。腹大便便的牛嫂在一旁笑說：「好在佗緊嘅係仔，第日落鋪頭玩車轆，應該幾開心。」 五大熱賣車款 收費度身訂造套餐 牛叔去年到美國，於紐約Serotta international cycling institute（簡稱SICI）學習Bike Fitting，學費五千元，並引入近廿萬元專業車身量度儀器，對象為一班講究單車舒適度的業餘車手，度身訂造最佳尺寸，以免拉傷筋骨。車主先要度身高、 腳掌尺寸、下胯位高度等，再到專為測試用的特別車，連續踩半小時以上，其間拍攝下輸入電腦以慢鏡進行分析，並不斷調整騎姿，全套服務約二千五百元。 開業資料（11/2010） 租金：$400,000 * 入貨：$4,000,000 運費：$50,000 裝修：$800,000 雜費：$150,000▲ 人工：$200,000△ 總投資：$5,600,000 *三個月按金、一個月上期 ▲包括安裝防盜系統及管理費等 △連老闆共15人 營業資料（3/2011） 營業額：$2,000,000 銷售成本：$1,320,000 租金：$100,000 運費：$30,000 雜費：$120,000 人工：$250,000 盈利：$180,000 |
||||||