【馮仁昭四圍超】霆鋒鑊氣牛河一萬蚊一碟
1 :
GS(14)@2017-01-26 18:22:23謝霆鋒、韓星鄭容和同衛詩雅噚日喺中環大牌檔,宣傳新戲《決戰食神》,霆鋒更即場煮乾炒牛河做慈善義賣,每碟一萬蚊,佢炒咗三碟,現場吸引近一百名粉絲圍觀。霆鋒就話之前喺屋企準備食材:「喺屋企準備咗風乾牛肉,風乾咗牛筋兩個鐘頭,牛筋用空氣鍋煮咗似骨膠原片,好有益,以前細個住沙田,都有去隆亨邨食大牌檔,好鍾意大牌檔爐火,屋企冇咁有鑊氣。」衛詩雅即場問霆鋒會唔會收徒弟,又說:「碟牛河賣一萬蚊,我食咗一嚿,都一千幾,食落似牛肉乾好好味。」在旁嘅鄭容和就大讚霆鋒廚藝,以韓語表示:「以前不懂烹飪,現在有濃厚興趣,間中會煮麵,想學整餃子,拍戲時霆鋒還弄蘋果批給我吃,味道難忘。」
■霆鋒為慈善下廚兼宣傳新戲。
■鄭容和同衛詩雅大讚霆鋒廚藝,衛詩雅更想拜佢做師傅。
避談王菲
霆鋒同鄭容和喺戲中有唔少對手戲,佢哋講番自己語言,三頁半紙對白都冇NG,鄭容和表示:「完全不知他說甚麼,是看他的表情,以及綵排過,記着他講到哪個音接下去。」霆鋒透露新年會喺香港過,之後要返內地十八個城市宣傳。問到會唔會同女友王菲一齊過年,佢就話唔答。撰文:馮仁昭
來源:
http://hk.apple.nextmedia.com/entertainment/art/20170126/19908828