ZKIZ Archives


霆鋒掃二億地鋪 余文樂跟睇四千萬豪宅

2012-8-23  NM




出名投資有道的謝霆鋒,早於○五年已經在中環落釘買鋪做包租公,上月中,再豪花二億入市,買入擺花街兩個相連地鋪,富貴逼人。至於被謝霆鋒藐爆拒合作的余文樂,自從成為郭富城、沈嘉偉等有米人的鐵膽玩樂飯腳後,靚車買完一部又一部,努力upgrade做上等人,兩年無入市的他,緊隨霆鋒後,四出睇樓準備郁手。上星期,余文樂孖住波友阿彬專程入赤柱,到區內唯一放盤的歌敦臺睇頂樓連天台無敵海景單位,即使唔似霆鋒入貨以億元起跳,余文樂睇得上眼的,都要四千萬,過去半年,收入二千萬的他,供得起。煙駁煙睇樓

今年六月,被踢爆同?模王璐瑤(LuLu)互傳情慾短訊後獲封「機機樂」的余文樂,剛在內地拍完三十集電視劇《玲瓏局》,上星期二(八月十四日),余文樂揸住四驅王載着「橫洲工業」籃球隊波友阿彬同到赤柱,兩人先往附近巡地產鋪,在門外煲煙研究樓盤廣告。一名男經紀主動遞上宣傳單張力sell,余文樂毫無反應,到另一名女經紀上前招呼,三兩下手勢就氹掂他到位於佳美道的歌敦臺睇樓。一行人先睇一個千八呎連天台、三房兩廳無敵海景單位,煙駁煙的余文樂對該單位頗感興趣,在屋內逗留超過廿分鐘,之後再上天台hea多十分鐘才走人。之後經紀再帶他們睇另一個單位,余文樂循例行個圈便離開。據了解,余文樂所睇的無敵海景單位,開價四千萬,可租可售。「歌敦臺有四十八年樓齡,業主放盤都好一段時間,聽啲行家講,余文樂嗰日話搵樓買嚟投資。」區內一名地產經紀說。

三級片發圍

2010年以三級片上畫的《志明與春嬌》收700萬,跑贏三大天王黎明、劉華同學友分別主演的《火龍》、《未來警察》和《月滿軒尼詩》,令余文樂成功搣甩票房毒藥稱號,片酬、出騷價自此穩步上揚。今年上半年,已經賺過二千萬,是公司男吸金王。

攝到靚位上

昔日同陳冠希爭job再爭女,自從死敵發生淫照事件一沉不起,余文樂趁無對手加上影圈缺人攝上位,長拍長有。搵到錢,○五年首次上車做業主,以六百三十六萬買入元朗翠逸雅園與家人同住,之後成功黐到郭富城、沈嘉偉等富貴兵團,買衫買錶買車。一○年將元朗單位售出執二百萬,未幾再先後以六百二十萬買入錦綉花園洋房給家人,並以一千六百二十六萬買入肇輝臺一個千四呎單位自住。同年主演的《志明與春嬌》收七百萬反應好,余文樂片酬即時升至二百萬,今年續集《春嬌與志明》,香港好收,國內更收近一億,余文樂片酬企上三百萬。

心郁想買鋪

收入大躍進,老友沈嘉偉又不時在投資上提點教路,余文樂蠢蠢欲動入市再做業主。「近兩年樂仔跟住沈嘉偉、Chilam炒股都有唔少斬獲,但點都唔夠買磚頭賺得咁多,佢見霆鋒買鋪,眨吓眼就賺幾個開都好心郁,不過班富貴朋友叫佢買多幾間屋先,roll大啲筆錢,先再諗買鋪。佢拍咗個內地劇又賺咗一大嚿,返嚟咪即刻搵樓買,擺錢貶值呀!」余文樂身邊人透露。開turbo狂搵,一二年上半年,余文樂已經進賬二千萬,要掃四千萬豪宅,無難度!

PermaLink: https://articles.zkiz.com/?id=36500

Next Page

ZKIZ Archives @ 2019