ZKIZ Archives


醉死便埋 左丁山

2010-9-28  AD





 

肥仔K還是肥仔 之時,因體重與高度不成比例,BMI過高,於是買醫療保險之時,保險公司要徵收保單以外嘅附加費,肥仔K唔肯畀,索性參加中大嘅營養餐減肥計劃,五個月減 咗四十磅,大功告成,保險公司知道後,再向佢遊說買保險,但又竟然話佢短期內減肥速度太快,要佢去醫務所驗身,以求保證佢之體重下降不是因為有內在毛病, 賣保險賣得咁腌尖,當然係求穩陣,將來賠償額可以減少之故,客戶幫襯買保險,不勝其煩,不如買呢間公司嘅股票。

呢日睇到《am730》講村 上春樹於一九六八年時係早稻田學生,住在一間宿舍叫做「和敬塾」,於是問佢知唔知道有一個咁巴閉出名嘅校友。肥仔K唓一聲:「個個入住和敬塾嘅學生都知道 o架啦,我地人人讀過《挪威的森林》的故事。」肥仔K在和敬塾住咗三年,好似嘆世界咁款。呢間宿舍招收國際學生,位於東京豪宅區,步行至椿山莊四季酒店, 只需五分鐘。宿舍位於山丘之上,有不少大樹遮蔭,山坡下有一條小河,兩旁盡是櫻花樹。每年花開季節,嗰度就有不少遊人拍照,留下美景,寄宿在此,到早稻田 本部返學,十分鐘步行而已,好地方也。肥仔K話當年村上春樹所住嘅宿舍,早已破破爛爛,係日本人本科生居住嘅,國際學生住在新建「巽」翼,每個學生一間 房,舒適得多。和敬塾有兩個規矩,第一個就係入住嘅本科生新鮮人早午晚在飯堂內見到研究生(如肥仔K),一定要起身講一句早安/午安/晚安,禮貌十足,以 示尊敬大仙,第二個就係全體宿生每年要參加一個馬拉松步行,晚上飯後集體沿住東京市中心嘅JR山手線行足一個圈,要到第二朝天光先至返到早稻田,所有新入 住嘅學生,無論係新鮮人或是研究生,必須行畢全程,到咗第二年,肥仔K話成班同學行咗一半就開小差去咗飲酒,舍監唔會理。日本學生飲酒唔係人咁品,飲到大 醉(例如星期五晚上),就大有辛棄疾詞「醉後何妨死便埋」嘅氣概,倒頭便睡在高田馬場街頭,日本人直行直過,全不理會。如果在香港,有成羣大學生醉倒街 頭,必上《蘋果》頭版!


PermaLink: https://articles.zkiz.com/?id=18332

Next Page

ZKIZ Archives @ 2019