踏入七月份，林鄭形象煥然一新，政壇教父級人馬一相，就估佢對「特首」之位有野心，估計背後有高人指點形象包裝，首先搣甩副橢圓形金絲眼鏡，換咗副方形紅膠框鏡，仲戴上大大粒嘅耳環，穿上中式旗袍配珍珠頸鏈，以往愛素顏look嘅司長都化起靚妝，面珠登都滑淨好多；近鏡睇真啲，司長右眉上嘅一粒痣已經脫掉，小宗八卦，女人右邊眉毛上有痣，夫妻生活就唔多和諧o架，咁，林鄭脫總好過唔脫嘅！ 林鄭右眉上的一粒癦，已經脫掉，莫非有助夫妻感情？ 中環寸嘴：等我話你知銀行佬點契弟 工廈大王楊耀松長子，游走高級酒店、銀行，及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。 呢個陳法拉又話去美國讀戲劇，即管睇吓佢同黃子華套舞台劇《前度》有乜「嗱啦」，唓，都係發吓牢騷，講吓中文、英文粗口咁，計我話呢個黃子華入世未深，對白淨係識話啲銀行佬「契弟」「契弟」，其實，我話你哋知，好景時，銀行佬要跑數，多多錢都借俾你，仲會問你：「夠使o架嗱？」啲project愈大愈啱；到個市轉壞，咁就收遮冚旗，依家個市仲壞，為咗保持銀行業績日日捽數，又要出嚟撲生意，不過就忘記咗之前點樣玩謝晒啲客。我鍾意黃子華，佢都一把年紀，都仲有市場，唔少盛女來捧場，等我寸嘴楊都老懷安慰。嗱，唔好話我抽投行後腳，早排估A股入MSCI新興市場指數，高盛估有70%機會入到，瑞信估低過50%機會，花旗就估51%，點知好似「巴基之星」咁爆冷，A股冇份反而納入巴基斯坦股市，嗱，呢啲叫細細粒容易食，巴基股市得五百幾間上市公司，每日成交得嗰一、兩億美金，容易推高，今年以嚟升咗差唔多兩成，咁啲基金佬都要交功課o架，如果俾A股納入MSCI，多多錢倒落去都撩唔起啦！ 郭炳江天龍軒大擦一餐 新地前聯席主席郭炳江在獄中捱咗十八個月嘅「皇家飯」，聽聞餐餐都唔係好夠食，保釋出獄後第一時間歎番碗越南牛肉河同蛋撻之外，上週四晚，同阿媽郭老太到樓高一百零二層嘅天龍軒食飯，為公為私都好，立即巡視新地旗下高級酒店食肆，六月中市道低迷，新地股價跌到八十幾蚊，郭老太即出手增持，到郭炳江獲保釋後股價彈升至一百零七蚊，真係日日歎天龍軒都得啦。 老廉人才渴市 廉署一姐李寶蘭上週四last day後，首要解決居所問題，以她的職級住入以數千呎計嘅（NDQs-Non Departmental Quarters）政府宿舍，但李寶蘭辭職後兩個月內就要搬離，而佢老公陳一平雖然亦喺老廉入面，但職級是中文主任，未達攞政府宿舍條件；唔怕，以一姐個「朵」使乜愁呀，私人機構搶住向她招手，尤其金融界，好似前執行處處長陳德成（Gilbert），擁有大律師資格，○五年已被美資高盛挖角擔任法律顧問，真係花紅都多過份糧呀，家陣ISO國際標準，又整個（ABMS，Anti-Bribery Management System）出嚟，企業要獲得認證，去邊度搵人才搞呢，最就手梗係去老廉挖，聽聞獅子銀行已登咗有關招聘廣告。相信老廉一姐只係煩惱選擇邊份好工咋。 | ||