ZKIZ Archives


華電爆料記者:我都殺你全家


2013-08-08  NM
 
 

 

六名華潤電力(836)小股東,與董事局就收購「爛煤礦」對簿公堂,本週一開庭,預計年底正式開審。率先揭露醜聞嘅前《山西晚報》記者李建軍,專程來港,聽審贈興,兼大爆華電背後的政治內鬥,本週一下午仲親自去ICAC同商罪科舉報。佢同小宗講,除咗山西煤礦,華潤喺內蒙古買落嘅資產,通通有古怪!證據已在手。如此咄咄逼人,不怕自身安全嗎?一副斯文相嘅李建軍笑說:「我從小就愛打架,不停打!年輕的時候曾用刀砍人,每次都是十多個人對我一個。不當記者的話,一定是一個傑出的黑道!」

那家人的安全總不能不理吧?他再爆在去年,華電交易對手張新明的手下,找到他妻子和一歲多兒子,把兒子弄哭,再打電話給李建軍,威脅要綁架二人。「我對他說,你對我刀砍槍打都可以!但對我孩子下手?我也把你幹了!我敢死,你殺了我家人,我就殺了你家人!你以為我沒辦法嗎?」他指對方可能知他這種以眼還眼、以牙還牙的性格,最後都沒有下手。李建軍一臉正經說來,小宗不禁打個突;遇着連死都不怕嘅李建軍,潤電今次有排煩矣。

Give me a break 給珠寶第二生命

女人愛珠寶,但都有「唔愛」嘅時候,或因貪新忘舊,或舊事不堪記。想「放盤」套現?有個快速方便嘅方法,就係搵珠寶回購公司CIRCA。與拍賣行唔同嘅係,CIRCA唔收佣金,而係以二手市場價「買斷」珠寶,即時現金交易。OL同阿太,都係佢哋客仔,皆因回收門檻亦極低,由一百元嘅耳環銀鏈,至到幾百萬嘅名牌珠寶,來者不拒。回收後的珠寶會運往美國總部,轉售私人收藏家,避免珠寶在同一個圈子流傳嘅尷尬。洗走「前生」記憶嘅珠寶,便可在另一主人手上「重生」。CIRCA香港區業務總監梁曦文話,好多客仔係OL,套現無非為買新首飾或新手袋。「更多係分手後,識咗第二個男友,就將舊男友送嘅首飾攞嚟賣,呢啲我哋叫做old boyfriend jewelry。」客人當然不少得名人闊太,「佢哋有時同朋友去睇珠寶,明明唔鍾意,但現場壓力下,都要買埋一份,結果新簇簇就拎嚟回收。預約時間時仲講到明,佢上嚟之前之後嘅時段都要無人,費事撞到熟人會尷尬!」梁曦文笑笑口話,香港人唔使咁怕醜,回收珠寶只係善用資源,而CIRCA起源地美國,鋪頭仲多人到好似診所排街症咁。

本週WTF!

林老師西洋菜街句What the fuck一石激起千重浪,搞到退休前度假之劉達強警司都要出馬站台。然而馬恩國大狀喺立法會媽尊貴的議員長毛之You are not even a fucking Chinese一棍掃低十三億人,反而被人遺忘,此又豈為公允?為咗提升公民意識、英文水平,青關會、愛港之聲又豈不應請佢兩位去SOHO伊利近街之WTF食番餐,切磋、切磋?

誰是張震遠債主?

廉署唔立案起訴,啤梨張就咁甩難?休想!上週五張震遠遭上市公司新利控股(1240)嘅非執董梁志漢,入稟追討四千萬元債項,間接踢爆張震遠講大話。此位梁志漢,同張震遠牌面上無任何關係,而且行家話退咗休十幾年,閒時打golf;間新利控股,又係做地基打樁工程,同「商品」亦無瓜葛。行內人話,梁君只是人頭,玄機在「澳門」。咁又係,喺馬交響晒朵嘅洗米華,有間太陽國際證券,正是新利去年上市時的包銷商。據知向佢借錢,息口廿釐,唔算貴。早前曾爆出張震遠向上海仔借錢,咁,嗰啲千條絲、萬條縷嘅關係,係咪即刻近啲呢,又?

金牙大狀講嘢劉警司仲係劉警司

退休前度假之警司劉達強高調為反林慧思老師集會站台撐場,令人側目。警員唔係應該政治中立嘅咩?警方發聲明,指劉警司已交還警察委任狀,唔可以再行使警權執行任務,故此劉警司之行為冇問題。當真?劉警司一日未正式退休,劉警司一日仲支緊警司份糧,呢個事實唔會因為佢執行唔到任務而改變。情況猶如劉警司雙腳拗柴、打晒石膏,返唔到工,咁係咪話佢就可以大模廝樣,撐住枴杖去聲討林老師?請問:劉警司能否執行任務同埋佢以警司之身參與政治活動有乜關係先?劉警司一日仲未正式退休,佢一日都仲係劉警司;身為警司,劉sir可唔可以高調咁出席呢啲集會,警方理應心知肚明。明知唔啱都仲幫佢死撐,此又豈非混淆視聽?刻意顛倒是非,莫非有人嫌警方形象未夠低落?

PermaLink: https://articles.zkiz.com/?id=73289

【動畫】菲警掃毒連巿長都殺巿長太太拒捕釀15死

1 : GS(14)@2017-08-02 06:14:26

菲律賓的掃毒戰升級,南部一名市長周日在警方一場行動中被槍殺,行動一共造成15人死亡,而副巿長也被捕,昨天將被帶到馬尼拉調查。警方持搜查令前往奧三棉示市(Ozamiz City)市長帕洛基諾格(Reynaldo Parojinog Sr.)家中搜查非法武器及毒品。期間遭遇武裝抵抗,經過近兩小時交火後,警察進入帕洛基諾格住宅,但仍遭到反抗。帕洛基諾格的保鑣與警方爆發槍戰,帕洛基諾格、其妻子和其兄弟在交火中身亡,一名警察受傷。菲政府官員說,基於安全考慮,其女兒將會被移送到馬尼拉。當局最後從帕洛基諾格住宅中搜出手榴彈、來福槍、數量不明的毒品與金錢。總統杜特爾特當選不久後大力掃毒,更指摘有政府官員勾結販毒集團,帕洛基諾格亦榜上有名,被指涉嫌毒品走私。中新社




來源: http://hk.apple.nextmedia.com/international/art/20170801/20108357
PermaLink: https://articles.zkiz.com/?id=339360

Next Page

ZKIZ Archives @ 2019