張國榮睇好鄧一君 提攜過古仔基仔
1 :
GS(14)@2016-10-01 13:19:49哥哥張國榮重情重義，生前好提攜演藝圈嘅後輩，佢曾經講過睇好「雙古一鄧」…究竟「雙古一鄧」係乜水…就係古天樂、古巨基同鄧一君!鄧一君曾經喺《縱橫四海》演童年版周潤發，於《記得香蕉成熟時》演波仔更為人所知，童星出身嘅鄧一君，9歲就開始拍香港電台嘅教育電視劇，拍《縱橫四海》時，張國榮好欣賞鄧一君，盡力提攜，不過鄧一君天生童顏，多數扮戲中主角嘅弟弟，再唔係就做主角「後生版」，戲路受限制，鄧一君在2005年淡出娛樂圈，轉行做保險。古天樂古仔出道時不被睇好，可是哥哥喺吳君如主持電台節目中，大讚古天樂外型喺影視方面有前途，有啲似華仔同城城嘅feel。張國榮唔只喺節目讚古仔，更親自向導演引薦對方。當年哥哥拍《夜半歌聲》搵過古仔，不過當時無綫唔肯放人，最後個角色畀咗大陸演員黃磊主演「韋青」一角。古仔一直等到95年拍劇集《神鵰俠侶》而爆紅，00年後全身投入影圈大紅。古巨基基仔由記者轉行做新人，哥哥曾讚佢唱歌有啲似阿倫，推薦佢畀音樂人識，又教佢好多嘢。基仔喺張國榮逝世十周年紀念音樂會，唱出《由零開始》，講起自己初出碟，一直好感激哥哥對佢嘅鼓勵。
來源:
http://hk.apple.nextmedia.com/entertainment/art/20161001/19787748